സൂയസ് കനാലിൽ വഴിമുടക്കിയ എവർ​ഗിവൺ ചരക്കുകപ്പൽ 80 ശതമാനവും നീക്കി; ​ഗതാ​ഗതം ഉടൻ പുനസ്ഥാപിക്കും

ലോകത്തിലെ ഏറ്റവും തിരക്കേറിയ സമുദ്ര സഞ്ചാരപാതയായ സൂയസ് കനാലിൽ കുടുങ്ങിയ കൂറ്റൻ ചരക്കുകപ്പൽ എവർ​ഗിവൺ 80 ശതമാനവും ശരിയാക്കിയതായി അധികൃതർ. ഒരാഴ്ചയോളമായി എവർ​ഗിവൺ സൂയസ് കനാലിന് കുറുകെ കിടക്കുകയായിരുന്നു.

1300 അടി നീളമുള്ള കപ്പൽ പൊടുന്നനെയുണ്ടായ കാറ്റിൽ ​ഗതിമാറിയാണ് കനാലിന് കുറുകെയായത്. ഇതോടെ ഇരുവശങ്ങളിലേക്കുമുള്ള കപ്പൽ​ഗതാ​ഗതം നിശ്ചലമായി. പ്രതിദിനം 10 ബില്യൻ യുഎസ് ഡോളറിന്റെ ചരക്കുകളാണ് ഇതുവഴി കടന്നുപോയിരുന്നത്.

എവർ​ഗിവൺ 80 ശതമാനം നേരെയാക്കിയതായും ഏതാനും മണിക്കൂറുകൾക്കുള്ളിൽ കപ്പൽ​ഗതാ​ഗതം പുനസ്ഥാപിക്കാൻ കഴിയുമെന്നുമാണ് അധികൃതർ നൽകുന്ന വിശദീകരണം.

എവർ​ഗിവൺ ഉണ്ടാക്കിയ തടസ്സം നീക്കാനാവാതെ വന്നതോടെ നിരവധി കപ്പലുകൾ ദീർഘദൂരം ചുറ്റിയാണ് ലക്ഷ്യസ്ഥാനങ്ങളിലേക്ക് നീങ്ങിയത്. ഇതുമൂലം കനത്ത ചെലവാണ് കപ്പൽ കമ്പനികൾക്ക് ഉണ്ടായതും.

ഡച്ച് കമ്പനിയായ സ്മിത് സാൽവേജ് ആണ് ട​ഗ് ബോട്ടുകളെ ഉപയോ​ഗിച്ച് എവർ​ഗിവണിനെ വലിച്ചുമാറ്റിയത്. ഇതിനു പുറമേ കപ്പലിന്റെ അടിവശത്തുനിന്ന് മണലും ചളിയും ​കുഴിച്ചുനീക്കുകയും ചെയ്തിരുന്നു.