മനുഷ്യാവകാശ ലംഘനങ്ങളെ വിമർശിച്ച പാശ്ചാത്യ ബ്രാൻഡുകൾക്ക് ചൈനയിൽ വിചിത്ര വിലക്ക്

ഉയ്​ഗൂർ മുസ് ലിംകൾക്കെതിരേ നടക്കുന്ന മനുഷ്യാവകാശലംഘനങ്ങൾക്കെതിരേ ശബ്ദമുയർത്തിയ വിദേശ ബ്രാൻഡുകൾക്ക് ചൈനയിൽ കാഴ്ചാ വിലക്ക്.ടി ഷർട്ടുകൾ മുതൽ ഷൂസുകൾ വരെയുള്ള ബ്രാൻഡുകൾക്കാണ് ടെലിവിഷനിൽ കാഴ്ചാവിലക്കേർപ്പെടുത്തിയിരിക്കുന്നത്.എച്ച്ആന്റ്എം, നൈക്ക്, അഡിഡാസ് തുടങ്ങിയ ബ്രാൻഡുകൾ പ്രേക്ഷകർക്ക് കാണാനാവാത്ത വിധമാണ് ടെലിവിഷനുകളിൽ പ്രദർശിപ്പിക്കുന്നത്.

അതേസമയം സിൻജിയാങിൽ ഉൽപ്പാദിപ്പിക്കുന്ന പരുത്തിയെ പ്രോൽസാഹിപ്പിക്കുന്നതിനു വേണ്ടിയാണ് ഇത്തരമൊരു നടപടിയെന്നാണ് ചൈനയുടെ വിശദീകരണം.

ഉയ്​ഗൂർ പ്രവിശ്യയിലുള്ള ചൈനീസ് വസ്ത്രനിർമാണ കമ്പനികളുമായി സഹകരിക്കില്ലെന്ന് എച്ച്ആന്റ്എം അടുത്തിടെ വ്യക്തമാക്കിയിരുന്നു. ലോകത്തിലെ ഏറ്റവും കൂടുതൽ പരുത്തി ഉൽപ്പാദിപ്പിക്കുന്ന പ്രദേശമാണ് സിൻജിയാങ് ഉയ്​ഗൂർ ഓട്ടോണമസ് റീജ്യൻ.

ചൈനീസ് വിമർശനം നടത്തിയ വിദേശ ബ്രാൻഡുകൾ ധരിച്ചുള്ള ചൈനീസ് സെലിബ്രിറ്റികളുടെ ടെലിവിഷൻ ഷോകൾ പ്രക്ഷേപണം ചെയ്യുമ്പോൾ ഇത്തരം ബ്രാൻഡുകൾ പ്രേക്ഷകർ കാണാത്തരീതിയിൽ അദൃശ്യമാക്കിയാണ് പ്രദർശിപ്പിക്കുന്നത്. ഉയ്​ഗൂർ മുസ് ലിംകൾക്കെതിരേ ചൈനീസ് സർക്കാർ നടത്തുന്ന അതിക്രമങ്ങളുടെ ദൃശ്യങ്ങൾ ചോർന്ന സാഹചര്യത്തിലായിരുന്നു വിദേശ ബ്രാൻഡുകൾ നടപടിയെ അപലപിച്ചു രം​ഗത്തെത്തിയത്.