എൽഡിഎഫും യുഡിഎഫും വോട്ട്​ അഭ്യർഥിച്ചെത്തിയെന്ന് എസ്ഡിപിഐ തിരുവനന്തപുരം ജില്ലാ പ്രസിഡന്റ്

തിരുവനന്തപു​രം: എൽഡിഎഫും യുഡിഎഫും വോട്ട്​ അഭ്യർഥിച്ച്​ തങ്ങളെ സമീപിച്ചിരുന്നെന്ന്​ ​എസ്​ഡിപിഐ തിരുവനന്തപുരം ജില്ലാ പ്രസിഡന്‍റ്. നേമത്ത്​ എൽഡിഎഫ്​ സ്ഥാനാർഥി വി ശിവൻകുട്ടിക്കും തിരുവനന്തപുരത്ത്​ യുഡിഎഫ്​ സ്ഥാനാർഥി വി എസ്​ ശിവകുമാറിനും എസ്​ഡിപിഐ വോട്ട്​ ചെയ്​തെന്നും ജില്ലാ പ്രസിഡന്റ് സിയാദ് കണ്ടള മാധ്യമങ്ങളോട്​ പറഞ്ഞു.

എസ്ഡിപിഐ അടക്കമുള്ളവരോട് ബന്ധ​മില്ലെന്നും വോട്ട്​ ചോദിച്ചിട്ടില്ലെന്നും ഇരുമുന്നണികളും അവകാശപ്പെട്ടിരുന്നു. ആ വാദങ്ങൾ പാെളിക്കുന്നതാണ് എസ്‍ഡിപിഐ നേതാവിന്റെ​ ഈ വെളിപ്പെടുത്തൽ.

ഇരു മണ്ഡലങ്ങളിലും ബിജെപിയുടെ ജയ സാധ്യത തടയാനാണ്​ വോട്ട്​ ചെയ്​തത്​. നേമത്ത് 10000 വോട്ടും തിരുവനന്തപുരത്ത്​ 3000ഓളം വോട്ടും പാർട്ടിക്കുണ്ട്​. പാർട്ടിക്ക്​ സ്ഥാനാർഥിയില്ലാത്ത കഴക്കൂട്ടം ഉൾപ്പടെയുള്ള മിക്ക മണ്ഡലങ്ങളിലും ഇരു മുന്നണികളും എസ്​ഡിപി​ഐയോട്​ വോട്ട്​ അഭ്യർഥിച്ചിരുന്നു.

കടുത്ത ത്രികോണ മത്സരമുണ്ടായിരുന്ന കഴക്കൂട്ടത്ത് ഒരു മുന്നണിയോടും പ്രത്യേക താൽപര്യം കാണിച്ചില്ല. മനസാക്ഷിവോട്ട്​ ചെയ്യാനാണ്​ പ്രവർത്തകർക്ക്​ നിർദേശം നൽകിയതെന്നും അദ്ദേഹം പറഞ്ഞു.