മഹാരാഷ്ട്രയിൽ മുസ്‌ലിം ആത്മീയ നേതാവിനെ വെടിവച്ചു കൊന്നു

മഹാരാഷ്ട്രയില്‍ 'സൂഫി ബാബ' എന്ന പേരിലറിയപ്പെടുന്ന മുസ്‌ലിം ആത്മീയ നേതാവിനെ വെടിവച്ച് കൊന്നു. നാസിക് ജില്ലയിലെ യോല നഗരത്തില്‍ താമസിക്കുന്ന അഫ്ഗാന്‍ സ്വദേശിയായ ഖാജാ സയ്യിദ് ചിസ്തിയാണ് (35) കൊല്ലപ്പെട്ടത്.

ചൊവ്വാഴ്ച വൈകിട്ട് യോല ടൗണിലായിരുന്നു സംഭവം. അഞ്ജാത സംഘമാണ് വെടിവച്ചത്. നാലു പേരടങ്ങിയ സംഘമാണ് സുഫി ബാബയെ കൊലപ്പെടുത്തിയതെന്നാണ് റിപ്പോര്‍ട്ട്.

തലയില്‍ വെടിയേറ്റ അദ്ദേഹം തല്‍ക്ഷണം മരിച്ചു. കൊലപാതകത്തിന് പിന്നാലെ അക്രമിസംഘം സൂഫി ബാബയുടെ കാറും തട്ടിയെടുത്താണ് കടന്നുകളഞ്ഞത്. കൊലപാതകത്തിന് പിന്നിലെ കാരണം വ്യക്തമായിട്ടില്ല.

സംഭവത്തിൽ യോല പൊലീസ് സ്റ്റേഷനിൽ കൊലപാതക കുറ്റത്തിന് കേസ് രജിസ്റ്റർ ചെയ്തിട്ടുണ്ടെന്നും കൊലയാളികളെ പിടികൂടാനുള്ള തിരച്ചിൽ തുടരുകയാണെന്നും പൊലീസ് ഉദ്യോഗസ്ഥർ പറഞ്ഞു.