ബോളിവുഡില്‍ വീണ്ടും ബിഷ്‌ണോയ് ഗ്യാങ്ങിന്റെ വിളയാട്ടം; ടൈഗര്‍ ഷ്റോഫിന് നേരെ ഉണ്ടായ വെടിവെപ്പിന്റെ ഉത്തരവാദിത്തം ഏറ്റെടുത്തു!

മുംബൈ: ബോളിവുഡ് ചലച്ചിത്ര ലോകത്തെ നടുക്കി നടൻ ടൈഗർ ഷ്‌റോഫിന് നേരെ ജുഹുവിലുണ്ടായ വെടിവെപ്പിന് പിന്നിൽ ലോറൻസ് ബിഷ്ണോയ് ഗ്യാങ്. ആക്രമണത്തിന്റെ ഉത്തരവാദിത്തം ഏറ്റെടുത്ത് ബിഷ്ണോയ് സംഘവുമായി ബന്ധമുള്ള അനിൽ പണ്ഡിറ്റ് സോഷ്യൽ മീഡിയയിലൂടെ രംഗത്തെത്തി. നടൻ സൽമാൻ ഖാനൊപ്പം പ്രവർത്തിക്കുന്ന ആരെയും വെറുതെ വിടില്ലെന്നും ഇത് ആദ്യത്തെയും അവസാനത്തെയും മുന്നറിയിപ്പാണെന്നും പോസ്റ്റിൽ വ്യക്തമാക്കുന്നു. എന്നാൽ ബിഷ്ണോയ് ഗ്യാങ്ങിന്റെ പങ്ക് മുംബൈ പൊലീസ് ഇതുവരെ ഔദ്യോഗികമായി സ്ഥിരീകരിച്ചിട്ടില്ല.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ക്ലബ്ബിൽ നിന്ന് മടങ്ങുമ്പോൾ പതിയിരുന്ന് ആക്രമണം

ജുഹുവിലെ പുഷ്പ പാർക്കിന് സമീപമാണ് നടുക്കുന്ന സംഭവം നടന്നത്. ക്ലബ്ബിൽ ഫുട്ബോൾ കളി കഴിഞ്ഞ് മടങ്ങുകയായിരുന്ന ടൈഗർ ഷ്‌റോഫിന്റെ വാഹനത്തിന് നേരെ അജ്ഞാതരായ മൂന്ന് അക്രമികൾ വെടിയുതിർക്കുകയായിരുന്നു.

ഈ ആക്രമണത്തിൽ ടൈഗർ ഷ്‌റോഫിന്റെ ഡ്രൈവർ ഫിർദോസ് ഉൾപ്പെടെ മൂന്ന് പേർക്ക് പരിക്കേറ്റു. ഫിർദോസിന്റെ കൈക്കാണ് വെടിയേറ്റതെന്ന് പൊലീസ് അറിയിച്ചു. പ്രതികളെ പിടികൂടുന്നതിനായി മുംബൈ പൊലീസിന്റെ 15-ഓളം പ്രത്യേക സംഘങ്ങൾ സ്ഥലത്തെ സി.സി.ടി.വി ദൃശ്യങ്ങൾ കേന്ദ്രീകരിച്ച് അന്വേഷണം വ്യാപിപ്പിച്ചിട്ടുണ്ട്.

സൽമാൻ ഖാൻ അനുകൂലികൾക്ക് കടുത്ത മുന്നറിയിപ്പ്

സമൂഹമാധ്യമങ്ങളിൽ പ്രചരിക്കുന്ന പോസ്റ്റിൽ ബിഷ്ണോയ് ഗ്യാങ്ങിന്റെ കടുത്ത ഭീഷണിയാണ് ഉള്ളത്.

“ഞങ്ങൾ അവനെ വിളിച്ച് കാര്യങ്ങൾ വിശദീകരിക്കാൻ ശ്രമിച്ചിരുന്നു, പക്ഷേ അവന് അത് മനസ്സിലായില്ല. അതുകൊണ്ട് ഇന്ന്, ഞങ്ങൾ അവന് കാര്യങ്ങൾ കൃത്യമായി പറഞ്ഞുമനസ്സിലാക്കി” – എന്ന് ഹിന്ദിയിൽ പങ്കുവെച്ച കുറിപ്പിൽ പറയുന്നു.

ബോളിവുഡ് സിനിമാ വ്യവസായത്തിൽ തങ്ങളുടെ മുന്നറിയിപ്പുകൾ അവഗണിക്കുന്നവരും സൽമാൻ ഖാനൊപ്പം സഹകരിക്കുന്നവരും ആയിരിക്കും അടുത്ത ഇരകളെന്നും പോസ്റ്റിൽ ഭീഷണി മുഴക്കുന്നുണ്ട്. കഴിഞ്ഞ ഫെബ്രുവരി ഒന്നിന് സംവിധായകൻ രോഹിത് ഷെട്ടിയുടെ ജുഹുവിലുള്ള വസതിക്ക് നേരെ ബൈക്കിലെത്തിയ സംഘം വെടിയുതിർത്ത സംഭവത്തിന് പിന്നാലെയാണ് സിനിമാ മേഖലയെ ഭീതിയിലാഴ്ത്തി ഈ പുതിയ ആക്രമണവും നടന്നിരിക്കുന്നത്.

Tags: Tiger Shroff Shooting, Lawrence Bishnoi Gang, Anil Pandit Bishnoi Gang, Salman Khan Threat Mumbai, Bollywood Crime News Malayalam, News Malayalam

News Tag Live യുട്യൂബ് ചാനല്‍ Subscribe ചെയ്യുക