ഖത്തര്‍ കെ.എം.സി.സി ഓഫീസിലെ കോടികളുടെ കവര്‍ച്ച: ബി.ജെ.പി പ്രാദേശിക നേതാവ് കീഴടങ്ങി; സംഭവത്തില്‍ ഉന്നതര്‍ കുടുങ്ങുമോ?

കോഴിക്കോട്: ഗള്‍ഫിലെ ഏറ്റവും വലിയ മലയാളി ജീവകാരുണ്യ പ്രവാസി സംഘടനയായ ഖത്തര്‍ കെ.എം.സി.സി (KMCC) ഹെഡ് ഓഫീസില്‍ നടന്ന കവര്‍ച്ചക്കേസില്‍ നിര്‍ണായക തിരിവ്. കേസില്‍ പ്രധാന പ്രതികളിലൊരാളായ ബി.ജെ.പി പ്രാദേശിക നേതാവ് കോഴിക്കോട് കൊയിലാണ്ടി പൊലീസിന് മുന്നില്‍ കീഴടങ്ങി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കഴിഞ്ഞ തദ്ദേശ സ്വയംഭരണ തെരഞ്ഞെടുപ്പില്‍ കൊയിലാണ്ടി മുനിസിപ്പാലിറ്റിയിലെ മൂന്നാം വാര്‍ഡില്‍ നിന്ന് ബി.ജെ.പി സ്ഥാനാര്‍ത്ഥിയായി മത്സരിച്ച ബാലകൃഷ്ണന്‍ ആണ് അറസ്റ്റിലായത്.

റൂം ബോയിയെ കെട്ടിയിട്ട് ഗ്യാസ് കട്ടര്‍ ഉപയോഗിച്ച് കവര്‍ച്ച

2025 സെപ്റ്റംബര്‍ 18-നാണ് കേസിനാസ്പദമായ സംഭവം നടക്കുന്നത്. ഖത്തറിലെ അല്‍ തുമാമയില്‍ പ്രവര്‍ത്തിക്കുന്ന കെ.എം.സി.സി സംസ്ഥാന കമ്മിറ്റി ഓഫീസില്‍ അതിക്രമിച്ച് കയറിയ ആറംഗ കവര്‍ച്ചാ സംഘം ഓഫീസിലെ റൂം ബോയിയെ ഭീഷണിപ്പെടുത്തുകയും കൈകാലുകള്‍ കൂട്ടിക്കെട്ടുകയും ചെയ്തു.

തുടര്‍ന്ന് ഓഫീസ് റൂമിലെ സ്ട്രോങ് റൂമിന്റെ പൂട്ട് തകര്‍ത്ത് അകത്തുകടന്ന അക്രമികള്‍, അവിടെയുണ്ടായിരുന്ന ലോക്കര്‍ ഗ്യാസ് കട്ടര്‍ ഉപയോഗിച്ച് അറുത്തുമാറ്റി 31 ലക്ഷം ഖത്തര്‍ റിയാല്‍ (ഏകദേശം 8 കോടി ഇന്ത്യന്‍ രൂപ) കവരുകയായിരുന്നു. സംഭവം നടന്നയുടന്‍ പ്രവാസി സമൂഹത്തില്‍ ഇത് വലിയ ആഘാതമുണ്ടാക്കിയിരുന്നു.

നാട്ടിലെ കേസും തുടരന്വേഷണവും

സംഭവത്തില്‍ കെ.എം.സി.സി ഭാരവാഹിയായ പി.കെ. അബ്ദുല്‍ റഹീം നല്‍കിയ പരാതിയുടെ അടിസ്ഥാനത്തില്‍ സെപ്റ്റംബര്‍ 15-നാണ് കൊയിലാണ്ടി പൊലീസ് ഇന്ത്യന്‍ ശിക്ഷാ നിയമത്തിലെ വിവിധ വകുപ്പുകള്‍ പ്രകാരം കേസെടുത്തത്.

കേസില്‍ ആകെ ആറ് പ്രതികളാണുള്ളത്. ബാലകൃഷ്ണന്‍ (കീഴടങ്ങിയ പ്രതി), ബോംബെ ഷാജി, റാഷി, സാലിഹ് (ബാവ), ഹസന്‍ (മമ്മാലി), നിസാര്‍ എന്നിവരാണ് പ്രതികള്‍.

കേസില്‍ ഒന്നാം പ്രതിയായ ബാലകൃഷ്ണന്‍ കീഴടങ്ങിയതോടെ മോഷണത്തിന് പിന്നിലെ ഗൂഢാലോചനയും പണം കടത്തിയ വഴികളും സംബന്ധിച്ച വിവരങ്ങള്‍ പുറത്തുവരുമെന്നാണ് പൊലീസ് കരുതുന്നത്. ഒളിവിലുള്ള മറ്റ് അഞ്ച് പ്രതികളെയും ഉടന്‍ തന്നെ പിടികൂടുമെന്ന് അന്വേഷണ സംഘം അറിയിച്ചു.

കേരളത്തില്‍നിന്ന് നാലുപേരെ മോഷണത്തിനായിമാത്രം ഖത്തറിലേക്ക് കൊണ്ടുപോവുകയും അവിടെവെച്ച് മോഷണംനടത്തുകയും ചെയ്‌തെന്നാണ് കേസ്. കേരളത്തില്‍നിന്നെത്തിയ സംഘത്തിന് ഖത്തറില്‍ തങ്ങാനും കവര്‍ച്ച ആസൂത്രണം ചെയ്യാനും രണ്ടുപേരുടെ സഹായം ലഭിച്ചതായും കണ്ടെത്തിയിട്ടുണ്ട്.

മോഷണം നടന്ന് ഒരുവര്‍ഷം കഴിഞ്ഞിട്ടും ഇതുമായി ബന്ധപ്പെട്ട് പരാതി നല്‍കാന്‍ കെ.എം.സി.സി. നേതൃത്വം തയ്യാറായില്ലെന്നത് വലിയ ആക്ഷേപത്തിന് ഇടയാക്കിയിരുന്നു. മാത്രമല്ല, ഖത്തര്‍ കെ.എം.സി.സി.യിലെ ചിലര്‍ ഇതിനെതിരേ പരസ്യമായി രംഗത്തുവരികയും ലീഗ് നേതൃത്തിന് ഒളിച്ചുകളിയുണ്ടെന്ന് ആരോപണം ഉന്നയിക്കുകയും ചെയ്തിരുന്നു. വിഷയത്തില്‍ സാമൂഹിക മാധ്യമങ്ങളിലൂടെ വിമര്‍ശനമുന്നയിച്ച ചില കെ.എം.സി.സി പ്രവര്‍ത്തകരെ സംസ്ഥാന മുസ്ലിം ലീഗ് നേതൃത്വം സസ്പെന്‍ഡ് ചെയ്യുകയും ചെയ്തിരുന്നു. ഇതോടെ പാര്‍ട്ടിക്കകത്ത് തന്നെയുള്ള പ്രമുഖര്‍ക്ക് മോഷണത്തില്‍ പങ്കുണ്ടോ എന്ന സംശയവും ഉയര്‍ന്നിരുന്നു.

ഇതിനിടയിലാണ് വിവാദങ്ങള്‍ക്ക് വിരാമമിട്ട് സംഘടനയുടെ വൈസ് പ്രസിഡന്റ് കൊയിലാണ്ടി പോലീസില്‍ പരാതിനല്‍കിയത്. ആ പരാതിയില്‍  കേസെടുക്കുകയും തുടര്‍ന്ന് അറസ്റ്റിലേക്ക് നീങ്ങുകയുമായിരുന്നു.

Tags: Qatar KMCC Office Robbery News, BJP Leader Arrested KMCC Heist, Koyilandy Police Case Robbery, Kozhikode News Malayalam, Gulf Crime News Malayalam, News Malayalam

News Tag Live യുട്യൂബ് ചാനല്‍ Subscribe ചെയ്യുക