പ്രശസ്ത വ്ലോഗര്‍ ഹൈദര്‍ മധൂര്‍ എംഡിഎംഎയുമായി അറസ്റ്റില്‍; പിടിയിലായത് ഡാന്‍സാഫ് സംഘത്തിന്റെ നിരീക്ഷണത്തിനിടെ

കാസര്‍കോട്: ലഹരിമരുന്ന് വേട്ടയ്ക്കിടയില്‍ കാസര്‍കോട്ടെ പ്രശസ്തനായ സോഷ്യല്‍ മീഡിയ വ്ലോഗര്‍ പിടിയില്‍. മധൂരില്‍ 3.61 ഗ്രാം എംഡിഎംഎയുമായി വ്ലോഗര്‍ ഹൈദര്‍ മധൂറാണ് വിദ്യാനഗര്‍ പൊലീസിന്റെയും ഡാന്‍സാഫ് സംഘത്തിന്റെയും പിടിയിലായത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഇന്‍സ്റ്റഗ്രാമിലും ഫെയ്സ്ബുക്കിലുമായി 75,000-ത്തോളം ഫോളോവേഴ്സുള്ള വ്ലോഗറാണ് ഹൈദര്‍ മധൂര്‍.

വാഹന പരിശോധനയ്ക്കിടെ കുടുങ്ങി

വെള്ളിയാഴ്ച വൈകിട്ട് ആറരയോടെ മധൂര്‍ ജുമാ മസ്ജിദ് പരിസരത്ത് വിദ്യാനഗര്‍ പോലീസും ഡാന്‍സാഫ് ടീമും ചേര്‍ന്ന് സംയുക്തമായി വാഹന പരിശോധന നടത്തുന്നതിനിടയിലാണ് ഹൈദര്‍ പിടിയിലാകുന്നത്. ഇയാളുടെ പെരുമാറ്റത്തില്‍ അസ്വാഭാവികത തോന്നിയതിനെത്തുടര്‍ന്ന് പൊലീസ് വാഹനം വിശദമായി പരിശോധിക്കുകയായിരുന്നു. ഇതിലാണ് പോക്കറ്റില്‍ ഒളിപ്പിച്ചു വെച്ച നിലയില്‍ വില്‍പനയ്ക്കായി സൂക്ഷിച്ച 3.61 ഗ്രാം എംഡിഎംഎ കണ്ടെടുത്തത്.

ലഹരിമരുന്ന് കടത്തുന്നുണ്ടെന്ന രഹസ്യവിവരത്തിന്റെ അടിസ്ഥാനത്തില്‍ കഴിഞ്ഞ കുറച്ചുനാളുകളായി ഹൈദര്‍ മധൂര്‍ ജില്ലാ പൊലീസ് മേധാവിയുടെ കീഴിലുള്ള ഡാന്‍സാഫ് സംഘത്തിന്റെ നിരീക്ഷണത്തിലായിരുന്നുവെന്ന് പൊലീസ് വ്യക്തമാക്കി.

അന്വേഷണം വ്യാപിപ്പിച്ച് പൊലീസ്

പിടിച്ചെടുത്ത ലഹരിമരുന്ന് സ്വന്തം ഉപയോഗത്തിനും ഒപ്പം മറ്റ് ആവശ്യക്കാര്‍ക്ക് വില്‍പന നടത്തുന്നതിനുമായി എത്തിച്ചതാണെന്നാണ് ഹൈദര്‍ പൊലീസിന് നല്‍കിയിട്ടുള്ള പ്രാഥമിക മൊഴി. സോഷ്യല്‍ മീഡിയയിലൂടെ വലിയൊരു സുഹൃദ്വലയമുള്ള ഇയാള്‍ക്ക് ലഹരി മാഫിയയുമായി ഏതെങ്കിലും തരത്തിലുള്ള ബന്ധമുണ്ടോ എന്നും, എവിടെ നിന്നാണ് എംഡിഎംഎ എത്തിച്ചത് എന്നത് സംബന്ധിച്ചും വിദ്യാനഗര്‍ പൊലീസ് വിശദമായ അന്വേഷണം ആരംഭിച്ചിട്ടുണ്ട്. സംഭവത്തില്‍ കേസ് രജിസ്റ്റര്‍ ചെയ്ത പൊലീസ് മേല്‍നടപടികള്‍ സ്വീകരിച്ചുവരികയാണ്.

Tags: Haider Madhur, Kasaragod Vlogger Arrest, MDMA Seizure Kerala, Vidyanagar Police, DANSAF Team Kasaragod, Crime News Malayalam, Malayalam News

News Tag Live യുട്യൂബ് ചാനല്‍ Subscribe ചെയ്യുക