ആരോഗ്യവാനാണെങ്കിൽ പോലും മുജ്തബ ഖാംനഇ പൊതുവേദികളിൽ പ്രത്യക്ഷപ്പെടാത്തത് എന്തുകൊണ്ട്?വിശദീകരണവുമായി ഇറാൻ നയതന്ത്രജ്ഞൻ

ഇറാന്റെ പരമോന്നത നേതാവ് മുജ്തബ ഖാംനഇയുടെ ആരോഗ്യനിലയെക്കുറിച്ചുള്ള അഭ്യൂഹങ്ങൾക്കിടെ അദ്ദേഹം പൂർണ ആരോഗ്യവാനാണെന്നും ഔദ്യോഗിക ചുമതലകൾ നിർവഹിക്കുന്നുണ്ടെന്നും വിശദീകരിച്ച് ഇറാൻ നയതന്ത്രജ്ഞൻ അബ്ദുൽ മജീദ് ഹക്കീം ഇലാഹി. കഴിഞ്ഞയാഴ്ച ഇറാൻ പ്രസിഡന്റ് മസൂദ് പെസെഷ്കിയാനുമായി മുജ്തബ ഖാംനഇ ഏഴ് മണിക്കൂർ നീണ്ട കൂടിക്കാഴ്ച നടത്തിയെന്നും അദ്ദേഹം പറഞ്ഞു. എൻഡിടിവിയോടായിരുന്നു നയതന്ത്രജ്ഞന്റെ പ്രതികരണം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

എട്ട് മാസത്തോളമായി മുജ്തബ ഖാംനഇ പൊതുവേദികളിൽ പ്രത്യക്ഷപ്പെടാത്തതാണ് അദ്ദേഹത്തിന്റെ ആരോഗ്യനിലയും ഭരണത്തിലെ പങ്കും സംബന്ധിച്ച് ചോദ്യങ്ങൾ ഉയരാൻ കാരണം. അമേരിക്കയും ഇസ്രായേലും നടത്തിയ വ്യോമാക്രമണത്തിൽ പരിക്കേറ്റതിനെത്തുടർന്നാണ് അദ്ദേഹം പൊതുജനമധ്യത്തിൽനിന്ന് മാറിനിൽക്കുന്നതെന്നാണ് റിപ്പോർട്ടുകൾ. ആക്രമണത്തിൽ പിതാവും മുൻ പരമോന്നത നേതാവുമായ ആയത്തുല്ല അലി ഖാംനഇ കൊല്ലപ്പെട്ടിരുന്നു.

പിതാവിന്റെ മരണത്തിനുശേഷം പരമോന്നത നേതാവായി ചുമതലയേറ്റ മുജ്തബ ഖാംനഇ ഇതുവരെ രേഖാമൂലമുള്ള പ്രസ്താവനകളിലൂടെയാണ് പ്രതികരിച്ചിട്ടുള്ളത്. നേരിട്ടുള്ള പൊതുപരിപാടികളിൽ പങ്കെടുക്കാത്തത് അദ്ദേഹത്തിന്റെ സുരക്ഷയെക്കുറിച്ചും ആരോഗ്യത്തെക്കുറിച്ചും സംശയങ്ങൾക്ക് ഇടയാക്കിയിരുന്നു.

എന്നാൽ മുജ്തബ ഖാംനഇ ആരോഗ്യവാനാണെന്നും ചുമതലകൾ കാര്യക്ഷമമായി നിർവഹിക്കുന്നുണ്ടെന്നും ഇലാഹി വ്യക്തമാക്കി. പാർലമെന്റ് സ്പീക്കറും അദ്ദേഹവുമായി ദീർഘനേരം കൂടിക്കാഴ്ച നടത്തിയതായി അറിയിച്ചിട്ടുണ്ടെന്നും നയതന്ത്രജ്ഞൻ പറഞ്ഞു. മുജ്തബ ഖാംനഇ പിതാവിന്റെ സംസ്കാരച്ചടങ്ങിൽ പങ്കെടുത്തിരുന്നുവെന്നും താൻ ഇറാനിലുണ്ടായിരുന്ന സമയത്ത് അദ്ദേഹത്തിന്റെ രണ്ട് സഹോദരങ്ങളെ കണ്ടിരുന്നുവെന്നും ഇലാഹി അവകാശപ്പെട്ടു.

സുരക്ഷാ കാരണങ്ങളാലാണ് മുജ്തബ ഖാംനഇ മാധ്യമങ്ങൾക്കു മുന്നിൽ പ്രത്യക്ഷപ്പെടാത്തതെന്നാണ് ഇറാനിലെ മുതിർന്ന ഉദ്യോഗസ്ഥരെ ഉദ്ധരിച്ചുള്ള റിപ്പോർട്ടുകൾ. പ്രധാന വിഷയങ്ങളിൽ അന്തിമ തീരുമാനമെടുക്കുന്നത് അദ്ദേഹം തന്നെയാണെന്നും മുതിർന്ന നേതാക്കളുമായി കൂടിക്കാഴ്ചകൾ തുടരുന്നുണ്ടെന്നും റിപ്പോർട്ടുകൾ പറയുന്നു. എന്നാൽ അദ്ദേഹത്തിന്റെ ആരോഗ്യനിലയെക്കുറിച്ചുള്ള സ്വതന്ത്രമായ സ്ഥിരീകരണം പരസ്യമായി ലഭ്യമായിട്ടില്ല.

ഇറാന്റെ ഭരണസംവിധാനത്തിൽ യഥാർഥത്തിൽ ആരാണ് തീരുമാനങ്ങളെടുക്കുന്നതെന്ന് വ്യക്തമല്ലെന്ന് അമേരിക്കൻ പ്രസിഡന്റ് ഡോണൾഡ് ട്രംപ് നേരത്തെ അഭിപ്രായപ്പെട്ടിരുന്നു. ഇറാന്റെ നേതൃത്വത്തിൽ വലിയ മാറ്റങ്ങളുണ്ടായ സാഹചര്യത്തിൽ രാജ്യത്തിന്റെ തീരുമാനമെടുക്കൽ രീതി വ്യക്തമായി മനസ്സിലാക്കുക പ്രയാസമാണെന്ന് അമേരിക്കൻ വൈസ് പ്രസിഡന്റ് ജെ.ഡി. വാൻസും പറഞ്ഞിരുന്നു.

അതേസമയം, ഇറാന്റെ ഭരണസംവിധാനവും തീരുമാനമെടുക്കുന്ന രീതിയും അമേരിക്കൻ ഉദ്യോഗസ്ഥർക്ക് അറിയാമെന്നായിരുന്നു ഇറാൻ വിദേശകാര്യ മന്ത്രാലയത്തിന്റെ പ്രതികരണം.

യുദ്ധവും സാമ്പത്തിക പ്രതിസന്ധിയും നേരിടുന്ന ഇറാനിൽ മുജ്തബ ഖാംനഇയുടെ പൊതുസാന്നിധ്യമില്ലായ്മയും ഭരണത്തിലെ അദ്ദേഹത്തിന്റെ പങ്കും രാജ്യാന്തരതലത്തിൽ ശ്രദ്ധാകേന്ദ്രമായി തുടരുകയാണ്.

News Tag Live യുട്യൂബ് ചാനല്‍ Subscribe ചെയ്യുക