മുസ് ലിം സമൂഹത്തിനായി ഹലാല്‍ മോര്‍ട്ട്‌ഗെജുകള്‍ അവതരിപ്പിച്ച് കാനഡ

ടൊറന്റോ: കാനഡയിലെ മുസ് ലിം സമൂഹത്തിനായി ഹലാല്‍ മോര്‍ട്ട്‌ഗെജുകള്‍ അവതരിപ്പിച്ച് ധനമന്ത്രി ക്രിസ്റ്റിയ ഫ്രീലാന്‍ഡ്. മുസ് ലിം കനേഡിയന്‍ പൗരന്മാര്‍ക്ക് രാജ്യത്ത് വീടുകള്‍ സ്വന്തമാക്കാന്‍ സഹായിക്കുക എന്ന ലക്ഷ്യമിട്ടുള്ള പ്രധാനമന്ത്രി ജസ്റ്റിന്‍ ട്രൂഡോയുടെ പദ്ധതിയുടെ ഭാഗമാണിത്. കാനഡയില്‍ ഹലാല്‍ സാമ്പത്തിക പദ്ധതികളുടെ അഭാവം മൂലം നിക്ഷേപം നടത്താനും വീടുകള്‍ വാങ്ങാനും ചെറിയ സ്ഥാപനങ്ങളെ അനുവദിക്കുന്നതിനായി നിരവധി മുസ് ലിംകള്‍ കാത്തിരിക്കുന്ന സാഹചര്യത്തിലാണ് പ്രഖ്യാപനം.(Canada introduces halal mortgage plans for Canadian Muslims)

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മുസ് ലിം കനേഡിയന്‍ പൗരന്മാരെയും മറ്റ് വൈവിധ്യമാര്‍ന്ന സമൂഹങ്ങളെയും ഭവന വിപണിയില്‍ കൂടുതല്‍ പങ്കാളികളാക്കാന്‍ പ്രാപ്തരാക്കുന്നതിനുള്ള മാര്‍ഗമായി ഹലാല്‍ മോര്‍ട്ട്‌ഗെജുകള്‍ ഉള്‍പ്പെടെയുള്ള ബദല്‍ ധനസഹായ പദ്ധതികള്‍ക്ക് രൂപം നല്‍കുമെന്നും ക്രിസ്റ്റിയ ഫ്രീലാന്‍ഡ് വ്യക്തമാക്കി. ഇതിന്റെ ഭാഗമായി ധനകാര്യ സ്ഥാപനങ്ങളുമായും വിവിധ കമ്മ്യൂണിറ്റികളുമായും കൂടിയാലോചനകള്‍ ആരംഭിച്ചതായും ധനമന്ത്രി അറിയിച്ചു. അതേസമയം വിദേശികള്‍ക്ക് വീടുകള്‍ വാങ്ങുന്നതിനുള്ള വിലക്ക് ഫെഡറല്‍ സര്‍ക്കാര്‍ നീട്ടിയപ്പോളും ബാങ്കുകളില്‍ ഹലാല്‍ മോര്‍ട്ട്‌ഗെജുകള്‍ അവതരിപ്പിക്കാനുള്ള പദ്ധതി ജനങ്ങളുടെ വിമര്‍ശനം നേരിടുന്നുണ്ട്.

ഇസ്ലാമിക നിയമം, അല്ലെങ്കില്‍ ശരിയ നിയമം, മുസ് ലിം മതസ്ഥരെ ചൂഷണം ചെയ്യുന്നതും അധാര്‍മികവുമായി പലിശ ഈടാക്കുന്നതിനോ സ്വീകരിക്കുന്നതിനോ വിലക്കുന്നു. വായ്പ നല്‍കുന്നതിനുപകരം, പലിശ ഈടാക്കുന്നത് ഒഴിവാക്കാന്‍ ഇസ് ലാമിക് ബാങ്കുകള്‍ വ്യത്യസ്ത പേയ്മെന്റ് ഘടനകള്‍ ഉപയോഗിക്കുന്നു.