സഹപാഠികള്‍ക്കൊപ്പം വിനോദ യാത്രയ്‌ക്കൊരുങ്ങുവേ പഞ്ചായത്തംഗം കുഴഞ്ഞുവീണു മരിച്ചു; നാടിന് നൊമ്പരമായി ജനപ്രിയ മെമ്പറുടെ വിയോഗം

സഹപാഠികളുടെ സംഗമത്തിനും വിനോദയാത്രയ്ക്കുമുള്ള സന്തോഷത്തിനിടെ നാടിനെ ഒന്നാകെ കണ്ണീരിലാഴ്ത്തി ജനപ്രതിനിധിയുടെ അപ്രതീക്ഷിത വിയോഗം. മേലുകാവ് ഗ്രാമപഞ്ചായത്ത് കോണിപ്പാട് ആറാം വാര്‍ഡ് അംഗവും മുല്ലപ്പെരിയാര്‍ എസ്.ഐ കണ്ണംപള്ളില്‍ ജോണ്‍സണ്‍ ജോര്‍ജിന്റെ ഭാര്യയുമായ അന്നമ്മ ജോസഫ് (55) കുഴഞ്ഞുവീണ് മരിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മേലുകാവ് ഹെന്റി ബേക്കര്‍ കോളേജിലെ 1989 പ്രീഡിഗ്രി ബാച്ചിലെ സഹപാഠികളുമൊത്ത് വിനോദയാത്രയ്ക്ക് പുറപ്പെടാനുള്ള ഒരുക്കങ്ങള്‍ക്കിടെ രാവിലെ ആറരയോടെയാണ് ദുരന്തമുണ്ടായത്.

സന്തോഷയാത്ര ദുഃഖത്തില്‍ മുങ്ങി; വിടപറഞ്ഞത് സംഘാടനത്തിനിടെ

വര്‍ഷങ്ങള്‍ക്ക് ശേഷം കോളേജ് സഹപാഠികള്‍ ഒന്നിക്കുന്ന കളിചിരി നിറഞ്ഞ യാത്രയ്ക്കായുള്ള തയ്യാറെടുപ്പിലായിരുന്നു അന്നമ്മ. സഹപാഠികള്‍ വാഹനം സജ്ജമാക്കി കാത്തുനില്‍ക്കവേയാണ് അന്നമ്മ പെട്ടെന്ന് കുഴഞ്ഞുവീണത്. ഉടന്‍ തന്നെ തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. വിവരമറിഞ്ഞ് സഹപാഠികളും നാടൊന്നാകെയും ആശുപത്രിയിലേക്ക് കുതിച്ചെത്തി.

മരണത്തിന് തലേദിവസം വരെ പഞ്ചായത്തിലെ കേരളോത്സവ സംഘാടന പ്രവര്‍ത്തനങ്ങളില്‍ സജീവമായി പങ്കെടുത്തിരുന്ന നേതാവിന്റെ വേര്‍പാട് മേലുകാവ് നിവാസികള്‍ക്ക് വിശ്വസിക്കാനാകുന്നില്ല. ദുഃഖസൂചകമായി ഇന്നലെ നടത്താനിരുന്ന കേരളോത്സവ പരിപാടികള്‍ ഗ്രാമപഞ്ചായത്ത് മാറ്റിവെച്ചിട്ടുണ്ട്.

ആരോഗ്യരംഗത്ത് നിന്നും ജനസേവനത്തിലേക്ക്

മേലുകാവ് കോണിപ്പാട് നടുത്തൊട്ടിയില്‍ കുടുംബാംഗമായ അന്നമ്മ പൊതുപ്രവര്‍ത്തന രംഗത്തിറങ്ങുന്നതിന് മുന്‍പ് ദീര്‍ഘകാലം ആരോഗ്യമേഖലയില്‍ സേവനമനുഷ്ഠിച്ചിരുന്നു. മുട്ടം എം.എം ആശുപത്രിയിലും ഈരാറ്റുപേട്ട സണ്‍റൈസ് ആശുപത്രിയിലും നഴ്സായി ജോലി ചെയ്ത അന്നമ്മയുടെ ആതുരസേവന മനോഭാവം നാട്ടുകാര്‍ക്കിടയില്‍ വലിയ ജനപ്രീതി നേടി കൊടുത്തിരുന്നു.

പിന്നീട് തദ്ദേശ സ്വയംഭരണ തിരഞ്ഞെടുപ്പില്‍ സി.പി.എം സ്വതന്ത്ര സ്ഥാനാര്‍ത്ഥിയായി മത്സരിച്ച് വിജയിച്ച ഇവര്‍ വാര്‍ഡിലെ വികസന സാംസ്‌കാരിക പ്രവര്‍ത്തനങ്ങളില്‍ സജീവ സാന്നിധ്യമായിരുന്നു.

ഭൗതികശരീരം പോസ്റ്റ്‌മോര്‍ട്ടത്തിനും ഇന്‍ക്വസ്റ്റ് നടപടികള്‍ക്കും ശേഷം ബന്ധുക്കള്‍ക്ക് വിട്ടുനല്‍കി. സംസ്‌കാര ചടങ്ങുകള്‍ ഇന്ന് (തിങ്കള്‍) രാവിലെ 10 മണിക്ക് വസതിയില്‍ ആരംഭിക്കും. തുടര്‍ന്ന് 10.30-ന് മേലുകാവ് ഗ്രാമപഞ്ചായത്ത് ഓഫീസില്‍ പൊതുദര്‍ശനത്തിന് വെക്കും. ഭൗതികശരീരം 11 മണിക്ക് എള്ളുംപുറം സെന്റ് മത്ഥ്യാസ് സി.എസ്.ഐ പള്ളി സെമിത്തേരിയില്‍ സംസ്‌കരിക്കും.

Tags: Annamma Joseph, Melukavu Panchayat, Sudden Death, Kottayam News Malayalam, Henry Baker College Melukavu, Melukavu News, News Malayalam

News Tag Live യുട്യൂബ് ചാനല്‍ Subscribe ചെയ്യുക