നെടുമങ്ങാട് ജില്ലാ ആശുപത്രിയില്‍ യുവഡോക്ടര്‍ക്ക് നേരെ ലൈംഗികാതിക്രമം; സീനിയര്‍ ഡോക്ടര്‍ അറസ്റ്റില്‍, പ്രതിഷേധത്തിന് പിന്നാലെ പുലര്‍ച്ചെ വീട്ടില്‍ നിന്ന് കസ്റ്റഡിയിലെടുത്തു

തിരുവനന്തപുരം: നെടുമങ്ങാട് ജില്ലാ ആശുപത്രിയില്‍ ഹൗസ് സര്‍ജന്‍സി ചെയ്യുന്ന യുവഡോക്ടര്‍ക്ക് നേരെ ലൈംഗികാതിക്രമം നടത്തിയ സീനിയര്‍ ഡോക്ടര്‍ അറസ്റ്റില്‍. ആശുപത്രിയിലെ സര്‍ജനായ ഡോ. വി.കെ. വിനുവിനെയാണ് നെടുമങ്ങാട് പൊലീസ് അറസ്റ്റ് ചെയ്തത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

വെള്ളിയാഴ്ച ഉച്ചയോടെ കണ്‍സള്‍ട്ടിങ് മുറിയിലേക്ക് വിളിച്ചുവരുത്തി ഡെന്റല്‍ പിജി വിദ്യാര്‍ത്ഥിനിയായ യുവഡോക്ടറെ പീഡിപ്പിക്കാന്‍ ശ്രമിച്ചെന്നാണ് പരാതി. സംഭവത്തിന് പിന്നാലെ ഒളിവില്‍ പോയ പ്രതിയെ, ഡിവൈഎഫ്‌ഐ പ്രവര്‍ത്തകരുടെ ശക്തമായ പ്രതിഷേധത്തിന് പിന്നാലെ ശനിയാഴ്ച പുലര്‍ച്ചെ രണ്ട് മണിയോടെ വീട്ടില്‍ നിന്നാണ് പൊലീസ് കസ്റ്റഡിയിലെടുത്തത്.

ചികിത്സ തേടിയെത്തിയ യുവഡോക്ടര്‍ക്ക് നേരെ അതിക്രമം

വെള്ളിയാഴ്ച ഉച്ചയോടെയാണ് മനഃസാക്ഷിയെ ഞെട്ടിക്കുന്ന സംഭവം നടന്നത്. ശരീരത്തിലുണ്ടായ ഒരു മുഴയുമായി ബന്ധപ്പെട്ട് ചികിത്സ തേടിയാണ് പിജി വിദ്യാര്‍ത്ഥിനിയായ ഹൗസ് സര്‍ജന്‍ സീനിയര്‍ ഡോക്ടറായ വിനുവിനെ സമീപിച്ചത്. പരിശോധനയ്ക്കായി കണ്‍സള്‍ട്ടിങ് മുറിയിലേക്ക് വിളിച്ചുവരുത്തിയ ഡോക്ടര്‍ യുവതിയോട് അപമര്യാദയായി പെരുമാറുകയും കടന്നുപിടിക്കാന്‍ ശ്രമിക്കുകയുമായിരുന്നു.

സീനിയര്‍ ഡോക്ടറുടെ അതിക്രമശ്രമത്തെ ചെറുത്ത യുവതി മുറിയില്‍ നിന്ന് പുറത്തേക്ക് ഓടി രക്ഷപ്പെടുകയായിരുന്നു. ഉടന്‍ തന്നെ ആശുപത്രിയിലെ മറ്റ് സഹപ്രവര്‍ത്തകരോട് വിവരം അറിയിച്ച യുവതി, അവരുടെ സഹായത്തോടെ നെടുമങ്ങാട് പൊലീസ് സ്റ്റേഷനിലെത്തി പരാതി നല്‍കി.

അടുത്തിടെയാണ് ഡോ. വിനു നെടുമങ്ങാട് ജില്ലാ ആശുപത്രിയില്‍ ജോലിയില്‍ ചാര്‍ജെടുത്തത്.

ആശുപത്രിയും പൊലീസ് സ്റ്റേഷനും ഉപരോധിച്ച് ഡിവൈഎഫ്‌ഐ

പരാതി ലഭിച്ച് എഫ്.ഐ.ആര്‍ രജിസ്റ്റര്‍ ചെയ്തിട്ടും പ്രതിയെ പിടികൂടാന്‍ പൊലീസ് തയ്യാറാകുന്നില്ലെന്ന് ആരോപിച്ച് വെള്ളിയാഴ്ച രാത്രിയോടെ ഡിവൈഎഫ്‌ഐ പ്രവര്‍ത്തകര്‍ ശക്തമായ പ്രതിഷേധവുമായി രംഗത്തെത്തി. പ്രവര്‍ത്തകര്‍ ആദ്യം നെടുമങ്ങാട് ജില്ലാ ആശുപത്രി ഉപരോധിക്കുകയും, തുടര്‍ന്ന് രാത്രി വൈകി നെടുമങ്ങാട് പൊലീസ് സ്റ്റേഷന് മുന്നില്‍ കുത്തിയിരുന്ന് പ്രതിഷേധിക്കുകയും ചെയ്തു.

യുവഡോക്ടറുടെ വിശദമായ മൊഴി രേഖപ്പെടുത്തിയതിന് പിന്നാലെ റൂറല്‍ പൊലീസ് മേധാവിയുടെ നിര്‍ദ്ദേശപ്രകാരം അന്വേഷണം ഊര്‍ജ്ജിതമാക്കുകയായിരുന്നു. തുടര്‍ന്ന് ശനിയാഴ്ച പുലര്‍ച്ചെ രണ്ട് മണിയോടെ പ്രതിയുടെ വസതിയില്‍ നടത്തിയ പരിശോധനയില്‍ വിനുവിനെ കസ്റ്റഡിയിലെടുത്തു. പ്രാഥമിക ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തിയ പ്രതിയെ കോടതിയില്‍ ഹാജരാക്കാനുള്ള നടപടികള്‍ പൊലീസ് ആരംഭിച്ചു.

Tags: Nedumangad Hospital, Doctor Arrested Kerala, Sexual Harassment Case, Thiruvananthapuram News, DYFI Protest, Crime News Malayalam, Malayalam News

News Tag Live യുട്യൂബ് ചാനല്‍ Subscribe ചെയ്യുക