ബിഹാറിൽ ഗംഗാനദിക്ക് കുറുകെ നിർമിച്ച ആറുവരിപ്പാതയുള്ള 9.76 കിലോമീറ്റർ നീളമുള്ള നിതീഷ് സേതു പ്രധാനമന്ത്രി നരേന്ദ്ര മോദി ശനിയാഴ്ച ഉദ്ഘാടനം ചെയ്തു. വൈശാലി ജില്ലയിലെ ബിദുപൂർ ബ്ലോക്കിനെ പട്നയുടെ പ്രാന്തപ്രദേശത്തുള്ള കച്ചി ദർഗയുമായി ബന്ധിപ്പിക്കുന്നതാണ് പാലം. പദ്ധതി വിഭാവനം ചെയ്യുകയും നിർമാണം പൂർത്തീകരണത്തോടടുക്കുകയും ചെയ്ത മുൻ മുഖ്യമന്ത്രി നിതീഷ് കുമാറിന്റെ പേരാണ് പാലത്തിന് നൽകിയിരിക്കുന്നത്.
|
പട്നയിലെത്തിയ പ്രധാനമന്ത്രിയെ മുഖ്യമന്ത്രി നിതീഷ് കുമാർ വിമാനത്താവളത്തിൽ സ്വീകരിച്ചു. ഇരുവരും ആലിംഗനം ചെയ്യുകയും സൗഹൃദം പങ്കുവെക്കുകയും ചെയ്തു. മെയ് മാസത്തിൽ സമ്രാട്ട് ചൗധരി മുഖ്യമന്ത്രിയായി അധികാരമേറ്റതിന് പിന്നാലെ നടന്ന മന്ത്രിസഭാ വികസന ചടങ്ങിൽ പങ്കെടുത്തശേഷമുള്ള മോദിയുടെ ആദ്യ ബിഹാർ സന്ദർശനമാണിത്. സംസ്ഥാനത്ത് ഏകദേശം 34,470 കോടി രൂപയുടെ വിവിധ വികസന പദ്ധതികൾ ഉദ്ഘാടനം ചെയ്യാനും തറക്കല്ലിടാനും പ്രധാനമന്ത്രി എത്തിയിട്ടുണ്ട്.
റോഡ് ഗതാഗതം, ഊർജം, നഗരവികസനം, ജലവിഭവം, വിദ്യാഭ്യാസം, ആരോഗ്യം, ഗതാഗതം തുടങ്ങിയ മേഖലകളിലാണ് പദ്ധതികൾ. 100 പി.എം-ഇ ബസുകൾ പ്രധാനമന്ത്രി ഫ്ലാഗ് ഓഫ് ചെയ്യും. പ്രധാനമന്ത്രി ആവാസ് യോജന (നഗരം) പദ്ധതിയുടെ ഭാഗമായി 26,900ലധികം ഗുണഭോക്താക്കളുടെ ഗൃഹപ്രവേശന ചടങ്ങുകളും നടക്കും. സന്ദർശനത്തിന്റെ ഭാഗമായി വൈശാലിയിലും പട്നയിലും കനത്ത സുരക്ഷ ഏർപ്പെടുത്തിയിട്ടുണ്ട്.
അതേസമയം, പാലത്തിന് നിതീഷ് കുമാറിന്റെ പേര് നൽകിയതിനെച്ചൊല്ലി ഭരണകക്ഷിയായ എൻഡിഎയും പ്രതിപക്ഷമായ ആർജെഡിയും തമ്മിൽ രാഷ്ട്രീയ തർക്കം ആരംഭിച്ചു. പദ്ധതിയുടെ നേട്ടത്തിൽ തങ്ങൾക്കും പങ്കുണ്ടെന്ന് ആർജെഡി അവകാശപ്പെടുന്നുണ്ട്. നിതീഷ് കുമാറിനൊപ്പം മുൻകാലങ്ങളിൽ അധികാരം പങ്കിട്ടിട്ടുള്ള ആർജെഡി പാലത്തിന്റെ പേരിടലുമായി ബന്ധപ്പെട്ട് തങ്ങളുടെ പങ്ക് ഉന്നയിച്ചതോടെയാണ് തർക്കം ശക്തമായത്.
News Tag Live യുട്യൂബ് ചാനല് Subscribe ചെയ്യുക



