പയർ ഇല പറിച്ചു; 14കാരിയായ ദലിത് പെൺകുട്ടിയെ കൃഷിയുടമ തല്ലിക്കൊന്നു

പട്ന: വയലിൽ നിന്ന് പയർ ചെടിയുടെ ഇലകൾ പറിച്ചതിന് 14കാരിയായ ദലിത് പെൺകുട്ടിയെ കൃഷിയുടമ തല്ലിക്കൊന്നു. ബിഹാറിലെ കൈമൂർ ജില്ലയിലാണ് കൊടുംക്രൂരത. സംഭവത്തിൽ കേസെടുത്തിട്ടുണ്ടെന്നും ഒളിവിൽ പോയ പ്രതികൾക്കായുള്ള തെരച്ചിൽ പുരോ​ഗമിക്കുകയാണെന്നും പൊലീസ് അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പെൺകുട്ടിയും ബന്ധുവും തങ്ങളുടെ കൃഷിയിടത്തിലൂടെ നടക്കുന്നതിനിടെയാണ് സമീപത്തെ കൃഷിയിടത്തിലെ പയർ ചെടികൾ ശ്രദ്ധയിൽപ്പെട്ടത്. പിന്നാലെ പെൺകുട്ടി ഇലകൾ പറിക്കുന്നത് കണ്ട കൃഷിയുടമ രാമദർ യാദവും മകൻ ​ഗൗരവും വടിയുമായെത്തി കുട്ടികളെ ക്രൂരമായി മർദിക്കുകയായിരുന്നു. പ്രതികളിൽ നിന്നും രക്ഷപ്പെട്ട പെൺകുട്ടി വീട്ടിലെത്തിയതിന് പിന്നാലെ കുഴഞ്ഞുവീഴുകയും മരിക്കുകയുമായിരുന്നു.

സംഭവത്തിന് പിന്നാലെ പ്രതികൾ ഒളിവിൽ പോയതായാണ് റിപ്പോർട്ട്. ഇവർക്കെതിരായ അന്വേഷണം പുരോ​ഗമിക്കുകയാണെന്നും പ്രതികളെ പിടികൂടുമെന്നും ശിക്ഷയുറപ്പാക്കുമെന്നും പൊലീസ് അറിയിച്ചു.