AMMA ഇടപെട്ടു, ഷെയിൻ നിഗവുമായുള്ള പ്രശ്‌നം പരിഹരിച്ചു; ശ്രീനാഥ് ഭാസിയുടെ കാര്യത്തിൽ നാളെ തീരുമാനം

കൊച്ചി: താരസംഘടനയായ അമ്മ ഇടപെട്ടതോടെ നടൻ ഷെയ്ൻ നിഗവും നിർമാതാക്കളും തമ്മിലുള്ള തർക്കം പരിഹരിച്ചു. വിലക്ക് നേരിട്ടിരുന്ന മറ്റൊരു നടൻ ശ്രീനാഥ് ഭാസിയുടെ അംഗത്വത്തിൽ നാളെ തീരുമാനമെടുക്കും.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഒരേ സമയം പല നിർമ്മാതാക്കൾക്കും സംവിധായകർക്കും ഡേറ്റ് നൽകുന്നു എന്നാണ് ഷെയിനിനെതിരെ ഉയർന്ന പരാതി. പ്രൊമോഷൻ വർക്കുകകളിലോ ഡബ്ബിങ്ങിലോ കൃത്യമായി ഷെയിൻ പങ്കെടുക്കുന്നില്ലെന്നും പരാതിയുണ്ടായിരുന്നു. നിർമാതാക്കൾക്ക് നിരന്തരമായി ബുദ്ധിമുട്ടുകൾ ഉണ്ടാക്കുന്നുവെന്ന് ചൂണ്ടിക്കാട്ടിയാണ് ഷെയിനിനെതിരെ നടപടിയെടുത്തത്. തുടർന്നാണ് അമ്മയുടെ ഇടപെടൽ. ആറുമാസക്കാലം ഡേറ്റ് നല്കുന്നതടക്കം എല്ലാ കാര്യങ്ങളും അമ്മയുടെ മേൽനോട്ടത്തിലാകും നടക്കുക. ജൂൺ 25ന് നടക്കുന്ന അമ്മയുടെ ജനറൽ ബോഡി യോഗത്തിലും ഷെയിൻ പങ്കെടുക്കും.

അതേസമയം, ഷെയിനിനൊപ്പം വിലക്ക് വീണ ശ്രീനാഥ് ഭാസിയുടെ കാര്യത്തിലും നാളെ തീരുമാനമുണ്ടായേക്കും. അമ്മയിൽ അംഗത്വമെടുക്കാൻ ശ്രീനാഥ് ഭാസി താല്പര്യം പ്രകടിപ്പിച്ചിട്ടുണ്ടെന്നാണ് വിവരം. ജനറൽ ബോഡി യോഗത്തിന് മുന്നോടിയായി നാളെ നടക്കുന്ന എക്‌സിക്യൂട്ടീവ് യോഗത്തിൽ ശ്രീനാഥ് ഭാസിയുടെ അംഗത്വമടക്കം ചർച്ചയായേക്കും.

ശ്രീനാഥ് ഭാസിയുമായി സഹകരിക്കില്ലെന്ന് നേരത്തെ ചലച്ചിത്ര സംഘടനകൾ പ്രഖ്യാപിച്ചതിന് പിന്നാലെയായിരുന്നു നടൻ താര സംഘടനയായ ‘അമ്മ’യിൽ അംഗത്വം നേടാൻ അപേക്ഷ നൽകിയത്.