28
Oct 2026
Tue
കാസര്‍കോട്: ജനങ്ങള്‍ക്ക് സുരക്ഷയൊരുക്കേണ്ട പോലീസ് സ്റ്റേഷന് തന്നെ കവര്‍ച്ചാ കേന്ദ്രമായി മാറിയ ഞെട്ടിക്കുന്ന സംഭവത്തില്‍ സേനയ്ക്ക് നാണക്കേട്. കാസര്‍കോഡ് ജില്ലയിലെ ചന്തേര പോലീസ് സ്റ്റേഷനില്‍ പൊതുജനങ്ങള്‍ കളഞ്ഞുകിട്ടി ഏല്‍പ്പിച്ച മൊബൈല്‍ ഫോണ്‍ അടിച്ചുമാറ്റി രഹസ്യമായി വില്‍പ്പന നടത്തിയ സീനിയര്‍ സിവില്‍ പോലീസ് ഓഫീസര്‍ക്കെതിരെയാണ് കേസെടുത്തിരിക്കുന്നത്. നീര്‍ച്ചാല്‍ സ്വദേശിയായ വൈ. ബൈജുവിനെതിരെയാണ് (41) ജില്ലാ പോലീസ് മേധാവിയുടെ നിര്‍ദ്ദേശപ്രകാരം മോഷണക്കുറ്റത്തിന് കേസെടുത്തിട്ടുള്ളത്.
 |
|
എസ്.ഐ വിഷ്ണു എസ്. നായര്‍ തയ്യാറാക്കി സമര്‍പ്പിച്ച വിശദമായ അന്വേഷണ റിപ്പോര്‍ട്ടിന്റെ അടിസ്ഥാനത്തില്‍ ജില്ലാ പോലീസ് ചീഫ് നിധിന്‍ രാജിന്റെ ഉത്തരവുപ്രകാരമാണ് നടപടി.
സ്റ്റേഷനില്‍ ഏല്‍പ്പിച്ച ഫോണ്‍ അപ്രത്യക്ഷമായി
ഈ മാസം 8-നാണ് കേസിനാസ്പദമായ സംഭവം നടക്കുന്നത്. അന്ന് ചന്തേര സ്റ്റേഷനില്‍ പാറാവ് ഡ്യൂട്ടിയിലുണ്ടായിരുന്നത് സീനിയര്‍ സിവില്‍ പോലീസ് ഓഫീസര്‍ ബൈജുവായിരുന്നു.
കളഞ്ഞുകിട്ടിയ ഫോണ്‍: സ്റ്റേഷന് സമീപത്ത് താമസിക്കുന്ന അന്യസംസ്ഥാന തൊഴിലാളിക്ക് 10,000 രൂപ വിലവരുന്ന റെഡ്മിയുടെ മൊബൈല്‍ ഫോണ്‍ വഴിയില്‍ നിന്ന് കളഞ്ഞുകിട്ടിയിരുന്നു. അദ്ദേഹം ഇത് സ്റ്റേഷനില്‍ കൊണ്ടുവന്ന് ഏല്‍പ്പിക്കുകയും, ഉടമയെ കണ്ടെത്താനായി പാറാവ് ബുക്കില്‍ ഔദ്യോഗികമായി രേഖപ്പെടുത്തുകയും ചെയ്തിരുന്നു. രാമന്തളി സ്വദേശിനിയായ വീട്ടമ്മയുടെതായിരുന്നു ഈ ഫോണ്‍.
വന്നത് മകന്‍: അടുത്ത ദിവസം തന്നെ ഫോണ്‍ കൈപ്പറ്റാന്‍ എത്താമെന്ന് വീട്ടമ്മ പൊലീസിനെ അറിയിച്ചിരുന്നുവെങ്കിലും ചില കാരണങ്ങളാല്‍ ഒരാഴ്ച കഴിഞ്ഞാണ് വീട്ടമ്മയുടെ മകന്‍ ഫോണ്‍ വാങ്ങാനായി സ്റ്റേഷനില്‍ എത്തിയത്. എന്നാല്‍ സ്റ്റേഷനിലെ മേശവലിപ്പില്‍ ഭദ്രമായി സൂക്ഷിച്ചിരുന്ന ഫോണ്‍ പരിശോധിച്ചപ്പോഴാണ് അത് കാണാനില്ലെന്ന വിവരം ഉദ്യോഗസ്ഥര്‍ അറിയുന്നത്.
വാട്‌സാപ്പ് ഗ്രൂപ്പിലെ സന്ദേശവും സൈബര്‍ അന്വേഷണവും
ഫോണ്‍ കാണാതായതോടെ പരിഭ്രാന്തരായ ഉദ്യോഗസ്ഥര്‍ സ്റ്റേഷനിലെ പൊലീസുകാരുടെ വാട്‌സാപ് ഗ്രൂപ്പില്‍ ഇതുസംബന്ധിച്ച് സന്ദേശമയച്ചു. ‘ഫോണ്‍ ആരെങ്കിലും അബദ്ധത്തില്‍ മാറ്റിവെച്ചിട്ടുണ്ടെങ്കില്‍ അത് തിരികെ നല്‍കണം’ എന്നായിരുന്നു സന്ദേശം. ഈ ഗ്രൂപ്പ് സന്ദേശത്തിലൂടെയാണ് എസ്.ഐ അടക്കമുള്ള ഉയര്‍ന്ന ഉദ്യോഗസ്ഥര്‍ സ്റ്റേഷനില്‍ ഫോണ്‍ മോഷണം പോയ വിവരം അറിയുന്നത്.
തുടര്‍ന്ന് സൈബര്‍ സെല്ലിന്റെ സഹായത്തോടെ നടത്തിയ സാങ്കേതിക അന്വേഷണത്തിലാണ് നിര്‍ണ്ണായക വിവരങ്ങള്‍ പുറത്തുവന്നത്. ബദിയടുക്കയിലുള്ള ഒരാള്‍ ഈ മൊബൈല്‍ ഫോണ്‍ ഉപയോഗിക്കുന്നതായി കണ്ടെത്തിയ പോലീസ്, അയാളെ ബന്ധപ്പെട്ട് സ്റ്റേഷനിലേക്ക് വിളിച്ചുവരുത്തി ചോദ്യം ചെയ്തു. ഒരു പൊലീസുകാരനാണ് തനിക്ക് ഈ ഫോണ്‍ വില്‍പന നടത്തിയത് എന്ന് അയാള്‍ മൊഴി നല്‍കിയതോടെയാണ് ഡ്യൂട്ടിയിലുണ്ടായിരുന്ന ബൈജുവാണ് കള്ളനെന്ന് വ്യക്തമായത്.
സിസിടിവി ദൃശ്യങ്ങള്‍ കുരുക്കായി
തുടര്‍ന്ന് സ്റ്റേഷനിലെ സിസിടിവി ദൃശ്യങ്ങള്‍ പരിശോധിച്ചതോടെ ബൈജുവാണ് പ്രതിയെന്ന് വ്യക്തമായി തെളിഞ്ഞു. പാറാവ് ഡ്യൂട്ടിയിലുണ്ടായിരുന്ന ബൈജു മേശവലിപ്പില്‍ നിന്ന് ഫോണ്‍ എടുക്കുന്നതും അതിലെ സിം കാര്‍ഡ് ഊരിമാറ്റുന്നതും ദൃശ്യങ്ങളില്‍ വ്യക്തമായി പതിഞ്ഞിരുന്നു.
സേനയുടെ അന്തസ്സ് കെടുത്തുന്ന ഇത്തരം പ്രവൃത്തികള്‍ വച്ചുപൊറുപ്പിക്കില്ലെന്ന നിലപാടിലാണ് ജില്ലാ പോലീസ് മേധാവി. ബൈജുവിനെതിരെ കേസെടുത്തതിന് പിന്നാലെ കൂടുതല്‍ വകുപ്പുകള്‍ ചേര്‍ക്കാനും വകുപ്പ് തല അന്വേഷണത്തിലൂടെ സസ്‌പെന്‍ഷന്‍ ഉള്‍പ്പെടെയുള്ള കടുത്ത നടപടികളിലേക്ക് കടക്കാനുമാണ് പോലീസിന്റെ തീരുമാനം.
Tags: Chandera Police Station Mobile Theft, CPO Baiju Kasaragod Crime News, Kerala Police Suspended Theft Case, Kasaragod Malayalam News, News Malayalam
News Tag Live യുട്യൂബ് ചാനല്‍ Subscribe ചെയ്യുക
Latest News
More Stories
All Rights Reserved © 2026