15
Feb 2026
Sun
Kerala bids farewell to Alin Sherin തിരുവനന്തപുരം: സംസ്ഥാനത്തെ പ്രായം കുറഞ്ഞ അവയവദാതാവ് എന്ന നിലയില് കേരളത്തിന്റെ മനസ്സിലിടം നേടിയ ആലിന് ഷെറിന് ഇന്ന് വിട നല്കും. പത്ത് മാസം പ്രായമുള്ള ആലിന് ഷെറിന് എബ്രഹാമിന്റെ സംസ്കാരം ഇന്ന് പത്തനംതിട്ട മല്ലപ്പളളി നെടുങ്ങാടപ്പള്ളി സെന്റ് തോമസ് സിഎസ്ഐ പള്ളി സെമിത്തേരിയില് 3.30ന് നടത്തും.
 |
|
മസ്തിഷ്ക മരണത്തിന് പിന്നാലെ അവയവങ്ങള് ദാനം ചെയ്ത ആലിന് ഷെറിന് സംസ്ഥാനം ഔദ്യോഗിക ബഹുമതികളോടെയാവും വിട നല്കുക. പോസ്റ്റുമോര്ട്ടത്തിന് ശേഷം കുഞ്ഞിന്റെ മൃതദേഹം മല്ലപ്പള്ളിയിലെ സ്വകാര്യ ആശുപത്രിയിലേക്ക് മാറ്റിയിരുന്നു. ഇന്ന് രാവിലെ മൃതദേഹം ബന്ധുക്കള്ക്ക് കൈമാറി. ജോര്ജ് മാത്തന് മിഷന് ആശുപത്രി ചാപ്പലിലെ പ്രാര്ത്ഥനകള്ക്ക് ശേഷം വീട്ടില് പൊതുദര്ശനം ഉണ്ടാകും.
ആലിന് ഷെറിന്റെ അവയവം സ്വീകരിച്ച രണ്ട് കുഞ്ഞുങ്ങളുടെ ശസ്ത്രക്രിയ വിജയകരമായിരുന്നു. തിരുവനന്തപുരം കിംസ് ആശുപത്രിയില് നടന്ന കരള് മാറ്റ ശസ്ത്രക്രിയയില് ആലിന്റെ കരള് ആറ് മാസം പ്രായമുള്ള കുഞ്ഞിന് മാറ്റിവെച്ചു. സംസ്ഥാനത്തെ ഏറ്റവും പ്രായം കുറഞ്ഞ അവയവ സ്വീകര്ത്താവാണ് ഈ കുഞ്ഞ്. എസ്ഐടിയില് ചികിത്സയില് കഴിഞ്ഞിരുന്ന പത്തുവയസുകാരനാണ് ആലിന്റെ വൃക്കകള് നല്കിയത്.
ആലിന്റെ നേത്രപടലവും ഹൃദയവാല്വും ദാനം ചെയ്തിട്ടുണ്ട്. വാല്വ് എസ്ഐടിയില് സൂക്ഷിച്ചിരിക്കുകയാണ്. കൃത്യമായ സ്വീകര്ത്താവിനെ ലഭിച്ചാല് അവ നല്കുമെന്നാണ് അധികൃതര് അറിയിച്ചിരിക്കുന്നത്. ആലിന് ചികിത്സയിലിരുന്ന അമൃത ആശുപത്രിയില് തന്നെയാണ് നേത്രപടലം സൂക്ഷിക്കുന്നത്. ഇത് രണ്ട് പേര്ക്കായി നല്കാനാണ് തീരുമാനം.
പത്തനംതിട്ട മല്ലപ്പള്ളി സ്വദേശികളുടെ മകളാണ് ആലിന് ഷെറിന്. അപകടം നടന്ന ഉടന് തന്നെ കുഞ്ഞിനെ ചങ്ങനാശ്ശേരിയിലേയും തിരുവല്ലയിലേയും ആശുപത്രികളിലേക്കും പിന്നീട് ഫെബ്രുവരി 7ന് കൊച്ചിയിലെ അമൃത ആശുപത്രിയിലേക്കും പ്രവേശിപ്പിച്ചു. ഫെബ്രുവരി 13ന് കുട്ടിയ്ക്ക് മസ്തിഷ്ക മരണം സംഭവിക്കുകയും കുടുംബാംഗങ്ങള് അവയവദാനത്തിന് സമ്മതം നല്കുകയുമായിരുന്നു.
ഏക മകളുടെ അവയവങ്ങള് എറണാകുളം അമൃത ആശുപത്രിയില് അച്ഛന് അരുണ് എബ്രഹാമും അമ്മ ഷെറിന് ആന് ജോണുമാണ് ദാനം ചെയ്തത്.
സംസ്ഥാനത്തെ ഏറ്റവും പ്രായം കുറഞ്ഞ അവയവദാതാവിന് ഗാര്ഡ് ഓഫ് ഓണര് നല്കിയാണ് കൊച്ചി അമൃത ആശുപത്രിയില് നിന്ന് യാത്രയാക്കിയത്.
Latest News
More Stories
