22
Mar 2026
Sun
Strait of Hormuz ഇറാന്-അമേരിക്ക യുദ്ധം നാലാം വാരത്തിലേക്ക് കടക്കുമ്പോള് കടുത്ത ഭീഷണിയുമായി അമേരിക്കന് പ്രസിഡന്റ് ഡൊണാള്ഡ് ട്രംപ്. ഹോര്മുസ് കടലിടുക്കിലൂടെയുള്ള കപ്പല് ഗതാഗതം 48 മണിക്കൂറിനുള്ളില് പൂര്ണ്ണമായി പുനഃസ്ഥാപിച്ചില്ലെങ്കില് ഇറാന്റെ ഊര്ജ്ജ നിലയങ്ങള് (Power Plants) തകര്ക്കുമെന്ന് ട്രംപ് മുന്നറിയിപ്പ് നല്കി.
 |
|
ഫ്ലോറിഡയിലെ വസതിയിലിരുന്ന് ശനിയാഴ്ച രാത്രി വൈകി തന്റെ ‘ട്രൂത്ത് സോഷ്യല്’ പ്ലാറ്റ്ഫോമിലൂടെയാണ് ട്രംപ് ഈ അന്ത്യശാസനം നല്കിയത്.
‘ഈ നിമിഷം മുതല് 48 മണിക്കൂറിനുള്ളില് ഇറാന് ഹോര്മുസ് കടലിടുക്ക് ഭീഷണിയില്ലാതെ പൂര്ണ്ണമായി തുറന്നുകൊടുത്തില്ലെങ്കില്, അമേരിക്ക ഇറാന്റെ വിവിധ പവര് പ്ലാന്റുകളെ ലക്ഷ്യം വെച്ച് തകര്ക്കും. ഏറ്റവും വലിയ നിലയത്തില് നിന്നായിരിക്കും ആക്രമണം തുടങ്ങുക,’ ട്രംപ് കുറിച്ചു.
ഏത് പവര് പ്ലാന്റിനെയാണ് താന് ഉദ്ദേശിച്ചതെന്ന് ട്രംപ് വ്യക്തമാക്കിയിട്ടില്ല. യുദ്ധം അവസാനിപ്പിക്കുന്നതിനെക്കുറിച്ച് (winding down) കഴിഞ്ഞ ദിവസം ട്രംപ് സംസാരിച്ചിരുന്നെങ്കിലും, പെട്ടെന്നുണ്ടായ ഈ നിലപാട് മാറ്റം ലോകരാജ്യങ്ങളെ ആശങ്കയിലാക്കിയിട്ടുണ്ട്.
തിരിച്ചടിക്കുമെന്ന് ഇറാന്
ട്രംപിന്റെ ഭീഷണിക്ക് പിന്നാലെ കടുത്ത പ്രതികരണവുമായി ഇറാന് സൈന്യവും രംഗത്തെത്തി. ഇറാന്റെ ഇന്ധന-ഊര്ജ്ജ ശൃംഖലകള്ക്ക് നേരെ ആക്രമണമുണ്ടായാല് മേഖലയിലെ അമേരിക്കയുടെ മുഴുവന് ഊര്ജ്ജ കേന്ദ്രങ്ങളെയും തിരികെ ആക്രമിക്കുമെന്ന് ഇറാന് വ്യക്തമാക്കി.
ഇറാന്റെ വൈദ്യുതി ശൃംഖലയെ ലക്ഷ്യം വെച്ചാല് വെറും അരമണിക്കൂറിനുള്ളില് മിഡില് ഈസ്റ്റ് മേഖലയിലാകെ വൈദ്യുതി ബന്ധം വിച്ഛേദിക്കപ്പെടുമെന്ന് (Blackout) ഇറാന് സൈന്യം മുന്നറിയിപ്പ് നല്കി. കൊല്ലപ്പെട്ട മുന് സുരക്ഷാ കൗണ്സില് തലവന് അലി ലാറിജാനിയുടെ വാക്കുകള് ഉദ്ധരിച്ചാണ് ഇറാന്റെ ഈ ഓര്മ്മപ്പെടുത്തല്.
അമേരിക്കയുമായും ഇസ്രായേലുമായും ബന്ധപ്പെട്ട ഊര്ജ്ജ നിലയങ്ങള് മാത്രമല്ല, കുടിവെള്ള വിതരണത്തിനുള്ള ഡീസലൈനേഷന് പ്ലാന്റുകള് (Desalination plants), ഇന്ഫര്മേഷന് ടെക്നോളജി (IT) അടിസ്ഥാന സൗകര്യങ്ങള് എന്നിവയും തകര്ക്കുമെന്ന് ഇറാന്റെ ഖാത്തം അല്-അന്ബിയ സെന്ട്രല് കമാന്ഡ് വക്താവ് ഇബ്രാഹിം സോള്ഫാഘരി പറഞ്ഞു.
ഹോര്മുസ് കടലിടുക്കിലെ പ്രതിസന്ധി
ലോകത്തെ എണ്ണ-വാതക വിതരണത്തിന്റെ അഞ്ചിലൊന്ന് കടന്നുപോകുന്ന ഹോര്മുസ് കടലിടുക്ക് യുദ്ധം തുടങ്ങിയത് മുതല് ഏതാണ്ട് പൂര്ണ്ണമായും അടഞ്ഞുകിടക്കുകയാണ്. അമേരിക്കയുടെയും സഖ്യകക്ഷികളുടെയും കപ്പലുകള് കടത്തിവിടില്ലെന്നാണ് ഇറാന്റെ നിലപാട്.
കപ്പല് ഗതാഗതം തടസ്സപ്പെട്ടതോടെ അന്താരാഷ്ട്ര വിപണിയില് എണ്ണവില കുതിച്ചുയരുകയും ഓഹരി വിപണികള് ഇടിയുകയും ചെയ്തു.
പൊളിയുന്ന അവകാശവാദം
ഇറാന്റെ മിസൈല് വിക്ഷേപണ കേന്ദ്രങ്ങള് തകര്ത്തതായും അവരുടെ ശേഷി കുറച്ചതായും യുഎസ് സെന്ട്രല് കമാന്ഡ് അവകാശപ്പെടുന്നു. എന്നാല് യുഎസ് സൈന്യത്തിന്റെ അവകാശവാദങ്ങളും ട്രംപിന്റെ പുതിയ ഭീഷണിയും തമ്മില് പൊരുത്തക്കേടുകളുണ്ടെന്ന് രാഷ്ട്രീയ നിരീക്ഷകര് ചൂണ്ടിക്കാട്ടുന്നു.
ഫെബ്രുവരി 28-ന് തുടങ്ങിയ യുദ്ധം കൂടുതല് സിവിലിയന് കേന്ദ്രങ്ങളിലേക്ക് വ്യാപിക്കുമോ എന്ന ഭീതിയിലാണ് പശ്ചിമേഷ്യന് രാജ്യങ്ങള്.
Latest News
More Stories
All Rights Reserved © 2022