മിസ് ഇന്ത്യ കിരീടം ചൂടി രാജസ്ഥാൻ സ്വദേശിനി നന്ദിനി ഗുപ്ത

മുംബൈ: മിസ് ഇന്ത്യ 2023 കിരീടം ചൂടി രാജസ്ഥാൻ സ്വദേശിനി നന്ദിനി ഗുപ്ത. ഡൽഹിയിലെ ശ്രേയ പൂഞ്ച ഫസ്റ്റ് റണ്ണർ അപ്പും മണിപ്പൂരിലെ തൗനോജം സ്‌ട്രെല ലുവാങ് സെക്കന്റ് റണ്ണർ അപ്പുമായി. ഫെമിന മിസ് ഇന്ത്യ വേൾഡ് 2023 സൗന്ദര്യ മത്സരത്തിൽ രാജ്യത്തിൻറെ വിവിധ ഭാഗങ്ങളിൽ നിന്നുമെത്തിയ സുന്ദരികളെ പരാജയപ്പെടുത്തിയാണ് നന്ദിനി ഗുപ്ത ഇന്ത്യയുടെ പുതിയ സൗന്ദര്യറാണി പട്ടം നേടിയത്. മണിപ്പൂർ ഇംഫാലിലെ ഖുമാൻ ലംപക്കിലുള്ള ഇൻഡോർ സ്റ്റേഡിയത്തിലാണ് 59മത് മിസ് ഇന്ത്യ മത്സരം നടന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

19 കാരിയായ നന്ദിനി രാജസ്ഥാനിലെ കോട്ട സ്വദേശിനിയും ബിസിനസ് മാനേജ്‌മെൻറിൽ ബിരുദധാരിയുമാണ്. യുഎഇയിൽ നടക്കുന്ന 71-ാമത് മിസ് വേൾഡ് മത്സരത്തിൽ ഇന്ത്യയെ പ്രതിനിധീകരിക്കുന്നത് നന്ദിനിയാണ്. രത്തൻ ടാറ്റയാണ് തൻറെ ജീവിതത്തിലെ ഏറ്റവും പ്രചോദനം ചെലുത്തിയ മനുഷ്യനെന്ന് നന്ദിനി പറഞ്ഞു. ‘എന്നും ലാളിത്വത്തോടെ ജീവിക്കുന്ന മനുഷ്യകുലത്തിന് വേണ്ടി എല്ലാം ചെയ്ത. തൻറെ സമ്പദ്യം മുഴുവൻ ചാരിറ്റിക്ക് നൽകിയ അദ്ദേഹമാണ് എൻറെ മാനസഗുരു’ – നന്ദിനി പറയുന്നു.

ബോളിവുഡ് താരങ്ങൾ അടക്കം നിരവധി പേരാണ് ഫിനാലെ കാണാനെത്തിയത്. ബോളിവുഡ് താരങ്ങളായ കാർത്തിക് ആര്യനും, അനന്യ പാണ്ഡെയും സ്റ്റേജിൽ പെർഫോമൻസുകളുമായി എത്തി. മുൻ ജേതാക്കളായ സിനി ഷെട്ടി, റൂബൽ ഷെഖാവത്, ഷിനതാ ചൗഹാൻ, മാനസ വാരണാസി, മണിക ഷിയോകാന്ദ്, മാന്യ സിംഗ്, സുമൻ റാവു, ശിവാനി ജാദവ് എന്നിവരുടെ പ്രകടനങ്ങളും വേദിയെ ആവേശത്തിലാഴ്ത്തി.

2002ലെ മിസ് ഇന്ത്യ യൂണിവേഴ്സായ മെന്റർ നേഹ ധൂപിയ, ഇന്ത്യൻ ബോക്സിങ് ഐക്കൺ ലൈഷ്റാം സരിതാ ദേവി, പ്രശസ്ത കൊറിയോഗ്രാഫർ ടെറൻസ് ലൂയിസ്, ചലച്ചിത്ര നിർമാതാവും എഴുത്തുകാരനുമായ ഹർഷവർദ്ധൻ കുൽക്കർണി, എയ്സ് ഡിസൈനർമാരായ റോക്കി സ്റ്റാർ, നമ്രത ജോഷിപുര എന്നിവരടങ്ങിയ ജഡ്ജിമാരുടെ പാനലാണ് ജേതാക്കളെ വിലയിരുത്തിയത്.