ബൈക്കില്‍ പരീക്ഷയ്ക്ക് പോകുംവഴി ദുരന്തം; പട്ടത്തിന്റെ നൂല്‍ കഴുത്തില്‍ കുരുങ്ങി 19-കാരനായ ഐ.ടി.ഐ വിദ്യാര്‍ത്ഥിക്ക് ദാരുണാന്ത്യം

ബെളഗാവി: കര്‍ണാടകയിലെ ബെളഗാവിയില്‍ പട്ടം പറത്താന്‍ ഉപയോഗിക്കുന്ന രാസവസ്തുക്കളും ചില്ലുപൊടിയും ചേര്‍ത്ത മൂര്‍ച്ചയേറിയ ‘മാഞ്ച’ നൂല്‍ കഴുത്തില്‍ കുരുങ്ങി ഐ.ടി.ഐ വിദ്യാര്‍ത്ഥിക്ക് ദാരുണാന്ത്യം. മഹന്തേഷ് നഗര്‍ സ്വദേശിയായ ധ്രുവ് സന്തോഷ് കര്‍ജഗി (19) ആണ് ദാരുണമായി കൊല്ലപ്പെട്ടത്. ബെളഗാവിയിലെ സ്വകാര്യ കോളേജില്‍ ഐ.ടി.ഐ വിദ്യാര്‍ത്ഥിയായ ധ്രുവ്, പരീക്ഷ എഴുതാനായി ബന്ധുവിന്റെ ഇരുചക്രവാഹനം വാങ്ങി കോളേജിലേക്ക് പോകുമ്പോഴായിരുന്നു അപകടം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

വ്യാഴാഴ്ച ഗാന്ധിനഗര്‍ പ്രദേശത്തെ ദേശീയപാത മേല്‍പ്പാലത്തിന് സമീപത്തുകൂടി ബൈക്കില്‍ സഞ്ചരിക്കവെ, റോഡിന് കുറുകെ കിടന്ന മാഞ്ച നൂല്‍ പെട്ടെന്ന് ധ്രുവിന്റെ കഴുത്തില്‍ കുരുങ്ങുകയായിരുന്നു. അപ്രതീക്ഷിതമായി നൂല്‍ കുരുങ്ങിയതോടെ ബൈക്കിന്റെ വേഗതയില്‍ കഴുത്ത് ആഴത്തില്‍ മുറിയുകയും രക്തധമനികള്‍ പൊട്ടി അമിതമായി രക്തം വാര്‍ന്നൊഴുകുകയും ചെയ്തു. ബൈക്കില്‍ നിന്ന് തെറിച്ചുവീണ ധ്രുവ് സംഭവസ്ഥലത്തുതന്നെ മരിച്ചു.

നിരോധിച്ചിട്ടും വിനയായി മാഞ്ച നൂലുകള്‍

റോഡിലൂടെ പോകുന്ന യാത്രക്കാരുടെയും കാല്‍നടക്കാരുടെയും ജീവന് കടുത്ത ഭീഷണിയാകുന്ന മാഞ്ച നൂലുകളുടെ അപകടസാധ്യത വീണ്ടും വെളിവാക്കുന്നതാണ് ഈ ദാരുണ സംഭവം. പ്ലാസ്റ്റിക്, നൈലോണ്‍, ഗ്ലാസ് പൊടികള്‍ എന്നിവ ചേര്‍ത്താണ് ഇത്തരം നൂലുകള്‍ നിര്‍മ്മിക്കുന്നത്. നിരോധനം നിലനില്‍ക്കുന്നുണ്ടെങ്കിലും പലയിടങ്ങളിലും കുട്ടികളും മുതിര്‍ന്നവരും ഇത് ഉപയോഗിച്ച് പട്ടം പറത്തുന്നത് തുടരുന്നത് വലിയ അപകടങ്ങള്‍ക്ക് വഴിവെക്കുന്നുണ്ട്.

സംഭവത്തില്‍ ബെളഗാവി നോര്‍ത്ത് ട്രാഫിക് പോലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്. അപകടത്തിന് കാരണമായ മാഞ്ച നൂല്‍ എവിടെ നിന്നാണ് വന്നതെന്നും അശ്രദ്ധമായി പട്ടം പറത്തിയവരെ കണ്ടെത്തുന്നതിനുമുള്ള തിരച്ചില്‍ ശക്തമാക്കിയതായി പോലീസ് അറിയിച്ചു.

Tags: Belagavi News, Kite Manja Accident, Dhruv Karjagi, Karnataka News, Road Accident, ITI Student Death, National News Malayalam

News Tag Live യുട്യൂബ് ചാനല്‍ Subscribe ചെയ്യുക