ആഡംബര കാര്‍ സമ്മാനം; എനര്‍ജി ഡ്രിങ്ക് ചലഞ്ചില്‍ പങ്കെടുത്ത 13 കാരന് ദാരുണാന്ത്യം!

ബാഗ്ദാദ്: ആഡംബര കാര്‍ സമ്മാനമായി നേടാമെന്ന മോഹനവാഗ്ദാനത്തില്‍ വീണ് അപകടകരമായ എനര്‍ജി ഡ്രിങ്ക് മത്സരത്തില്‍ പങ്കെടുത്ത 13 വയസ്സുകാരന് ദാരുണാന്ത്യം. ഇറാഖിലെ ദിയാല പ്രവിശ്യയിലെ ബാക്കൂബ അല്‍-അബ്ബാറ സ്വദേശിയായ ദുള്‍ഫിക്കര്‍ അല്‍-സഈദി (Zulfiqar Al-Saeedi) ആണ് മരിച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഓണ്‍ലൈനിലും പ്രാദേശികമായും തരംഗമായ മത്സരത്തില്‍ വിജയിക്കാന്‍ ചുരുങ്ങിയ സമയത്തിനുള്ളില്‍ ഒന്നിനു പിറകെ ഒന്നായി ആറ് ക്യാന്‍ എനര്‍ജി ഡ്രിങ്കുകള്‍ കുടിക്കുകയായിരുന്നു.

ഹൃദയാഘാതത്തിന് കാരണം അമിതമായ കഫീന്‍ അളവ്

ചലഞ്ചില്‍ പങ്കെടുത്ത് മിനിറ്റുകള്‍ക്കകം ദുള്‍ഫിക്കറിന് കടുത്ത അസ്വസ്ഥതയും ശ്വാസതടസ്സവും അനുഭവപ്പെടുകയും കുഴഞ്ഞുവീഴുകയുമായിരുന്നു. ഉടന്‍ തന്നെ സമീപത്തെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. അമിത അളവില്‍ എനര്‍ജി ഡ്രിങ്ക് പെട്ടെന്ന് ശരീരത്തിലെത്തിയതിനെ തുടര്‍ന്നുണ്ടായ കടുത്ത ഹൃദയാഘാതമാണ് (Heart Failure) മരണകാരണമെന്ന് ഡോക്ടര്‍മാര്‍ സ്ഥിരീകരിച്ചു.

കുട്ടികളുടെ മുന്‍പിലുള്ള കമ്പനികളുടെ പ്രൊമോഷന്‍ ചലഞ്ചുകളും സോഷ്യല്‍ മീഡിയ ട്രെന്‍ഡുകളും എത്രത്തോളം അപകടകരമാണെന്ന് തെളിയിക്കുന്നതാണ് ഈ സംഭവമെന്ന് ഇറാഖിലെ ആരോഗ്യവിദഗ്ദ്ധര്‍ മുന്നറിയിപ്പ് നല്‍കി.

കുട്ടികളിലെ എനര്‍ജി ഡ്രിങ്ക് ഉപയോഗം: കടുത്ത ആശങ്ക

എനര്‍ജി ഡ്രിങ്കുകളില്‍ വലിയ തോതില്‍ അടങ്ങിയിരിക്കുന്ന കഫീന്‍ (Caffeine), പഞ്ചസാര, മറ്റ് ഉദ്ദീപകങ്ങള്‍ എന്നിവ പെട്ടെന്ന് ശരീരത്തിലെത്തുന്നത് രക്തസമ്മര്‍ദ്ദം കുതിച്ചുയരാനും ഹൃദയമിടിപ്പ് അനിയന്ത്രിതമാകാനും കാരണമാകും.

കുട്ടികളിലും കൗമാരക്കാരിലും ഇത്തരം ഉല്‍പ്പന്നങ്ങള്‍ നിയന്ത്രണമില്ലാതെ വില്‍ക്കുന്നതിനെതിരെയും വ്യാജ വാഗ്ദാനങ്ങള നല്‍കി കുട്ടികളെ ജീവന്‍ അപകടപ്പെടുത്തുന്ന ചലഞ്ചുകളിലേക്ക് തള്ളിവിടുന്ന ഏജന്‍സികള്‍ക്കെതിരെയും ഇറാഖില്‍ പ്രതിഷേധം ശക്തമായിട്ടുണ്ട്. അപകടകരമായ ഇത്തരം ചലഞ്ചുകളില്‍ നിന്ന് കുട്ടികളെ പിന്തിരിപ്പിക്കാന്‍ മാതാപിതാക്കള്‍ ജാഗ്രത പാലിക്കണമെന്ന് അധികൃതര്‍ അഭ്യര്‍ത്ഥിച്ചു.

Tags: Energy Drink Challenge, Iraq News, Zulfiqar Iraq Death, Dangerous Social Media Challenge, World News Malayalam, Diyala Iraq Tragedy, Energy Drink Cardiac Arrest

News Tag Live യുട്യൂബ് ചാനല്‍ Subscribe ചെയ്യുക