തൃശൂരില്‍ യുവതിയുടെ വീട്ടിലെത്തി 23കാരന്‍ തീകൊളുത്തി മരിച്ചു

തൃശൂര്‍ കുട്ടനെല്ലൂരില്‍ യുവതിയുടെ വീട്ടിലെത്തി 23കാരന്‍ ദേഹത്ത് പെട്രോളൊഴിച്ചു തീകൊളുത്തി മരിച്ചു. കണ്ണാറ സ്വദേശി ഒലയാനിക്കല്‍ വീട്ടില്‍ അര്‍ജുന്‍ ലാലാണ് മരിച്ചത്. ചൊവ്വാഴ്ച രാത്രിയാണ് സംഭവം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പ്രണയനൈരാശ്യത്തെ തുടര്‍ന്നാണ് അര്‍ജുന്‍ ലാല്‍ ജീവനൊടുക്കിയതെന്നാണ് യുവാവിന്റെ കൂട്ടുകാരുടെ മൊഴി. യുവതിയും അര്‍ജുന്‍ ലാലും സുഹൃത്തുക്കളായിരുന്നു. എന്നാല്‍ ഒരുവര്‍ഷമായി ഇരുവരും അകല്‍ച്ചയിലായിരുന്നു.

കഴിഞ്ഞദിവസം അര്‍ജുന്‍ ലാല്‍ യുവതിയുടെ ഫോട്ടോ സാമൂഹികമാധ്യമത്തില്‍ പങ്കുവച്ചു. ഇതുശ്രദ്ധയില്‍ പെട്ട യുവതിയും വീട്ടുകാരും അര്‍ജുനോട് ഈ ചിത്രം നീക്കം ചെയ്യണമെന്നാവശ്യപ്പെട്ടു. എന്നാല്‍ ഫോട്ടോ നീക്കം ചെയ്യില്ലെന്നും വീട്ടിലെത്തി ജീവനൊടുക്കുമെന്നുമായിരുന്നു അര്‍ജുന്റെ മറുപടി.

തുടര്‍ന്ന് ചൊവ്വാഴ്ച രാത്രി യുവതിയുടെ വീട്ടിലെത്തിയ അര്‍ജുന്‍ ദേഹത്ത് പെട്രോളൊഴിച്ചു തീകൊളുത്തുകയായിരുന്നു. വിവരമറിഞ്ഞ് ഒല്ലൂര്‍ പോലീസെത്തിയാണ് അര്‍ജുന്‍ ലാലിനെ ആശുപത്രിയിലെത്തിച്ചത്. ഇവിടെ ചികില്‍സയിലിരിക്കെയാണ് യുവാവ് മരിച്ചത്.