1984-ൽ നാസ ബഹിരാകാശത്തേക്ക് അയച്ചത് 1.25 കോടി തക്കാളി വിത്തുകൾ; 6 വർഷത്തിന് ശേഷം ഭൂമിയിലെത്തിച്ച് 40,000 സ്കൂളുകളിൽ നട്ടു

1984-ൽ നാസ ബഹിരാകാശത്തേക്ക് അയച്ച 1.25 കോടി തക്കാളി വിത്തുകൾ ആറു വർഷത്തിന് ശേഷം, 1900-ൽ ഭൂമിയിൽ തിരിച്ചെത്തിച്ച ശേഷം വിദ്യാർത്ഥികൾക്കായി പ്ലാൻ്റിംഗ് കിറ്റുകളായി വിതരണം ചെയ്തു. ഈ പ്രസ്താവനയ്ക്ക് പിന്നിൽ പലരും അറിയാത്ത ഒരു ബഹിരാകാശ ദൗത്യത്തിന്റെ കഥയുണ്ട്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ബഹിരാകാശ അന്തരീക്ഷം തക്കാളി വിത്തുകളുടെ മുളയ്ക്കലിനെയും വളർച്ചയെയും എങ്ങനെ ബാധിക്കുന്നുവെന്ന് കണ്ടെത്താനായിരുന്നു ഈ ദൗത്യം, എന്നാൽ ഏജൻസിക്ക് ഇത് നേരിട്ട് നിരീക്ഷിക്കാൻ കഴിഞ്ഞിരുന്നില്ല.

പ്രതീക്ഷ നൽകിയ ഒരു പരീക്ഷണം

സീഡ്സ് (SEEDS – Space Exposed Experiment Developed for Students) എന്നായിരുന്നു ഈ പദ്ധതിയുടെ പേര്. നാസ ഹെഡ്ക്വാട്ടേഴ്സ്, ലാംഗ്ലി റിസർച്ച് സെന്റർ, പ്രമുഖ അമേരിക്കൻ വിത്ത് വിതരണക്കാരായ ജോർജ്ജ് ഡബ്ല്യു. പാർക്ക് സീഡ് കമ്പനി എന്നിവർ ചേർന്നാണ് ഇത് സംഘടിപ്പിച്ചത്. ഒരു കൂട്ടം വിത്തുകൾ ബഹിരാകാശത്തേക്ക് അയക്കുക, മറ്റൊരു കൂട്ടം വിത്തുകൾ ഭൂമിയിൽ സൂക്ഷിക്കുക എന്നതായിരുന്നു ആശയം.

തുടർന്ന്, വിദ്യാർത്ഥികൾക്ക് അടുത്തടുത്ത് നട്ട് ഫലങ്ങൾ താരതമ്യം ചെയ്യാനായി രണ്ട് വിത്തുകളും സ്കൂളുകൾക്ക് നൽകാൻ തീരുമാനിച്ചു. ‘റട്ഗേഴ്സ് കാലിഫോർണിയ സുപ്രീം’ (Rutgers California Supreme) എന്ന ഇനത്തിൽപ്പെട്ടതായിരുന്നു അയച്ച 1.25 കോടി വിത്തുകളും. ജനിതക മാറ്റങ്ങൾ പരീക്ഷണ ഫലത്തെ ബാധിക്കാതിരിക്കാനാണ് ഒരേയിനം തിരഞ്ഞെടുത്തത്.

പരീക്ഷണ ഉപകരണങ്ങൾ വഹിച്ചിരുന്നത് ‘ലോംഗ് ഡ്യൂറേഷൻ എക്സ്പോഷർ ഫെസിലിറ്റി’ (LDEF) എന്ന 9.7 ടൺ ഭാരമുള്ള, 12 വശങ്ങളുള്ള ഒരു സിലിണ്ടർ ഘടനയിലായിരുന്നു. ബഹിരാകാശത്തെ ശൂന്യത, വികിരണം (Radiation), സൂക്ഷ്മ ഉൽക്കകൾ എന്നിവയിൽ പരീക്ഷണ വസ്തുക്കൾ തുറന്നുവെക്കത്തക്ക രീതിയിലാണ് ഇത് നിർമ്മിച്ചത്.

സ്വയം പ്രവർത്തിക്കാനുള്ള ഇന്ധനമോ ഊർജ്ജമോ LDEF-ന് ഉണ്ടായിരുന്നില്ല. ഒരു സ്പേസ് ഷട്ടിൽ വിക്ഷേപിക്കുകയും മറ്റൊരു ഷട്ടിൽ ഇത് തിരികെ കൊണ്ടുവരികയും ചെയ്യുന്ന രീതിയിലായിരുന്നു ആസൂത്രണം.

അപകടവും രക്ഷാപ്രവർത്തനവും

1984 ഏപ്രിൽ 7-ന് STS-41C ദൗത്യത്തിനിടെ സ്പേസ് ഷട്ടിൽ ചാലഞ്ചറാണ് LDEF-നെ ഭ്രമണപഥത്തിലെത്തിച്ചത്. ഒരു വർഷത്തിനുള്ളിൽ ഇത് തിരികെ കൊണ്ടുവരാനായിരുന്നു പദ്ധതി. എന്നാൽ രണ്ടു വർഷത്തിന് ശേഷം, 1986 ജനുവരി 28-ന്, ചാലഞ്ചർ ഷട്ടിൽ വിക്ഷേപിച്ച് 73 സെക്കൻഡിനുള്ളിൽ സ്ഫോടനത്തിൽ തകരുകയും 7 ബഹിരാകാശ യാത്രികർ കൊല്ലപ്പെടുകയും ചെയ്തു.

ഇതോടെ നാസയുടെ തുടർ ദൗത്യങ്ങൾ താത്കാലികമായി നിർത്തിവെച്ചു. ഭ്രമണപഥം ക്രമീകരിക്കാൻ എഞ്ചിനില്ലാതിരുന്ന LDEF, അന്തരീക്ഷത്തിന്റെ ഘർഷണം മൂലം സാവധാനം താഴ്ന്നു തുടങ്ങി. വർഷങ്ങൾ കൊണ്ട് ഇതിന്റെ ഭ്രമണപഥം 280 കിലോമീറ്റർ വരെയായി താഴ്ന്നു. ഭൂമിയുടെ അന്തരീക്ഷത്തിൽ കടന്ന് കത്തിയമരാൻ ആഴ്ചകൾ മാത്രം ബാക്കിയുള്ളപ്പോഴാണ് രക്ഷാ ദൗത്യം എത്തിയത്.

1990 ജനുവരി 12-ന് STS-32 ദൗത്യത്തിനിടെ സ്പേസ് ഷട്ടിൽ കൊളംബിയ ഈ പ്ലാറ്റ്‌ഫോമിനെ വിജയകരമായി പിടിച്ചെടുത്തു. ആകെ 69 മാസങ്ങൾ (ഏകദേശം 6 വർഷം), 32,000-ത്തിലധികം തവണ ഇത് ഭൂമിയെ വലംവെച്ചു. പെട്ടികൾക്കുള്ളിൽ സീൽ ചെയ്ത നിലയിലായിരുന്നതിനാൽ വിത്തുകൾ സുരക്ഷിതമായിരുന്നു.

സ്കൂളുകളിലേക്ക് എത്തിയ പ്ലാൻ്റിംഗ് കിറ്റുകൾ

ഭൂമിയിൽ തിരിച്ചെത്തിച്ച ശേഷം പദ്ധതിയുടെ വിദ്യാഭ്യാസ ഘട്ടം ആരംഭിച്ചു. നാസയുടെ റിപ്പോർട്ട് പ്രകാരം ഏകദേശം 40,000 സ്കൂളുകളിലായി 1,32,000 പ്ലാൻ്റിംഗ് കിറ്റുകൾ വിതരണം ചെയ്തു. ഏകദേശം 33 ലക്ഷം വിദ്യാർത്ഥികളിലേക്ക് ഈ പദ്ധതിയെത്തി. അമേരിക്കയിലെ 50 സംസ്ഥാനങ്ങൾക്ക് പുറമെ മറ്റ് 30 രാജ്യങ്ങളിലെ പ്രീ-സ്കൂൾ മുതൽ യൂണിവേഴ്സിറ്റി വരെയുള്ള ക്ലാസുകൾ ഇതിൽ പങ്കാളികളായി.

ഓരോ കിറ്റിലും ബഹിരാകാശത്ത് 6 വർഷം ചെലവഴിച്ച വിത്തുകളും, ഭൂമിയിൽ നിയന്ത്രിത അന്തരീക്ഷത്തിൽ സൂക്ഷിച്ച വിത്തുകളും ഉണ്ടായിരുന്നു. മാറ്റങ്ങൾ ബഹിരാകാശ യാത്ര മൂലമാണോ എന്ന് കൃത്യമായി മനസ്സിലാക്കാൻ ഭൂമിയിലെ വിത്തുകൾ (Control set) സഹായിച്ചു.

വിദ്യാർത്ഥികൾ വിത്തുകൾ മുളച്ച നിരക്ക്, ആദ്യ മുള വരാനെടുത്ത സമയം, ചെടിയുടെ വളർച്ച, പൂക്കൾ, കായ്കൾ എന്നിവയുടെ വിവരങ്ങൾ രേഖപ്പെടുത്തി നാസയ്ക്ക് അയച്ചുകൊടുത്തു. ഏകദേശം 8,000 റിപ്പോർട്ടുകളാണ് നാസയ്ക്ക് ലഭിച്ചത്.

പരീക്ഷണ ഫലം

• മുളയ്ക്കൽ നിരക്ക്: ബഹിരാകാശ വിത്തുകൾക്ക് 73.8 ശതമാനവും ഭൂമിയിലെ വിത്തുകൾക്ക് 70.3 ശതമാനവുമായിരുന്നു മുളയ്ക്കൽ നിരക്ക്.

• മുളയ്ക്കാൻ എടുത്ത സമയം: ബഹിരാകാശ വിത്തുകൾ ശരാശരി 8 ദിവസത്തിലും ഭൂമിയിലെ വിത്തുകൾ 8.3 ദിവസത്തിലും മുളച്ചു.

• ആദ്യ വളർച്ച: ആദ്യ 3-4 ആഴ്ചകളിൽ ബഹിരാകാശ വിത്തുകൾക്ക് ചെറിയ വേഗത്തിലുള്ള വളർച്ച പ്രകടനമുണ്ടായെങ്കിലും, പിന്നീട് സാധാരണ ചെടികൾ അതിനൊപ്പമെത്തി.

അവസാന ഘട്ടത്തിൽ രണ്ട് വിഭാഗം ചെടികളും തമ്മിലോ അവയുടെ ഫലങ്ങൾ തമ്മിലോ കാര്യമായ വ്യത്യാസങ്ങളൊന്നും കണ്ടെത്തിയില്ല. പങ്കെടുത്ത ആളുകളുടെ എണ്ണത്തിലും വ്യാപ്തിയിലും, ബഹിരാകാശ സാമ്പിളുകൾ ഉപയോഗിച്ച് ക്ലാസ് റൂമുകളിൽ നടപ്പിലാക്കിയ ചരിത്രത്തിലെ ഏറ്റവും വലിയ ശാസ്ത്ര പരീക്ഷണങ്ങളിൽ ഒന്നായി SEEDS പദ്ധതി മാറി.

Tags: NASA, Space Tomato Seeds, LDEF Experiment, Space Shuttle Challenger, STS 32 Columbia, NASA SEEDS Project, Space News Malayalam, Science News Malayalam

News Tag Live യുട്യൂബ് ചാനല്‍ Subscribe ചെയ്യുക