മോദി ഷോ ചീറ്റി; എല്ലാ മേഖലയിലും കോണ്‍ഗ്രസ് മുന്നേറ്റം; അനക്കമില്ലാതെ ബിജെപി ഓഫീസുകൾ

കര്‍ണാടകയില്‍ ശക്തമായ തിരിച്ചുവരവിന്‍റെ സൂചന നല്‍കി എല്ലാ മേഖലയിലും മുന്നേറ്റം
തുടരുകയാണ് കോണ്‍ഗ്രസ്. വോട്ടെണ്ണല്‍ പുരോഗമിക്കവെ കോണ്‍ഗ്രസ് കേവല ഭൂരിപക്ഷ സംഖ്യ പിന്നിട്ട് മേധാവിത്വം നിലനിര്‍ത്തുകയാണ്. 119 സീറ്റുകളിലാണ് കോണ്‍ഗ്രസ് മുന്നേറുന്നത്

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

70 സീറ്റുകളില്‍ മാത്രമാണ് ഭരണകക്ഷിയായ ബിജെപി മുന്നില്‍. ബിജെപിയുടെ പല മന്ത്രിമാരും പ്രമുഖ നേതാക്കളും പിന്നിലാണ്. ജെഡിഎസ് 29 സീറ്റുകളിലും മറ്റുള്ളവര്‍ ആറ് സീറ്റുകളിലും ലീഡ് ചെയ്യുന്നു. ബിജെപിയുടെ മോദി ഷോയും വര്‍ഗീയതയിലും വിദ്വേഷത്തിലുമൂന്നിയ പ്രചരണം ചീറ്റി എന്ന് തെളിയിക്കുന്ന കണക്കുകളാണ് തുടക്കം മുതല്‍ തന്നെ കാണാനായത്. വോട്ടെണ്ണലിന്‍റെ ആദ്യഘട്ടം മുതല്‍ കോണ്‍ഗ്രസ് മുന്നേറ്റമാണ് പ്രകടമായത്.

കോണ്‍ഗ്രസ് സംസ്ഥാന അധ്യക്ഷനും പ്രതിപക്ഷ നേതാവുമായ ഡി കെ ശിവകുമാറും മുന്‍ മുഖ്യമന്ത്രി സിദ്ധരാമയ്യയും ഉള്‍പ്പെടെയുള്ളവര്‍ മുന്നിലാണ്.

അതേസമയം, കോണ്‍ഗ്രസ് കേന്ദ്രങ്ങളില്‍ ഇതിനോടകം ആഹ്ലാദവും ആഘോഷവും തുടങ്ങിയിട്ടുണ്ട്. എന്നാല്‍ ആളൊഴിഞ്ഞ് ശോകമൂകമാണ് ബിജെപി ഓഫീസുകള്‍. ബിജെപിയുടെ അഴിമതി-വര്‍ഗീയ രാഷ്ട്രീയത്തിനെതിരായ കോണ്‍ഗ്രസ് പ്രചരണം വിജയം കണ്ടെന്നു തെളിയിക്കുന്നതാണ് ഇപ്പോഴും തുടരുന്ന ആധിപത്യം.

36 കേന്ദ്രങ്ങളിലായി വോട്ടെണ്ണല്‍ നടക്കുന്നത്. ഉച്ചകഴിയുന്നതോടെ പൂര്‍ണചിത്രമറിയാം. 224 സീറ്റുകളിലേക്ക് നടന്ന തെരഞ്ഞെടുപ്പില്‍ 113 ആണ് കേവല ഭൂരിപക്ഷത്തിനു വേണ്ടത്.