ക്ഷേത്രത്തില്‍ തൊഴാനെത്തിയ വയോധികയുടെ ഒന്നേകാല്‍ ലക്ഷം രൂപ വിലമതിക്കുന്ന മാല മോഷ്ടിച്ചു; മൂന്ന് തമിഴ് സ്ത്രീകള്‍ അറസ്റ്റില്‍

ക്ഷേത്രത്തില്‍ മാലമോഷണം: മൂന്ന് തമിഴ് സ്ത്രീകള്‍ അറസ്റ്റില്‍

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കൊല്ലം: ക്ഷേത്രത്തില്‍ ആരാധന നടത്താനെത്തിയ സ്ത്രീയുടെ മാല മോഷ്ടിച്ച തമിഴ്‌നാട് സ്വദേശിനികളായ മൂന്ന് സ്ത്രീകള്‍ പിടിയില്‍. സേലം സ്വദേശികളായ പൂവരശി (30), സുമിത്ര (50), സുകന്യ (45) എന്നിവരാണ് പിടിയിലായത്. അഞ്ചാലുംമൂട് പോലീസാണ് ഇവരെ പിടിച്ചത്. ചൊവ്വാഴ്ച രാവിലെ കടവൂര്‍ മഹാദേവര്‍ക്ഷേത്രത്തില്‍ തൊഴാനെത്തിയ ചാത്തിനാംകുളം സ്വദേശിനി മഹിളാമണിയമ്മ(77)യുടെ ഒന്നേകാല്‍ ലക്ഷം രൂപ വിലവരുന്ന സ്വര്‍ണമാലയാണ് ഇവര്‍ കവര്‍ന്നത്. മാല നഷ്ടമായെന്നു മനസ്സിലായതിനെത്തുടര്‍ന്ന് ക്ഷേത്രത്തിലെ നിരീക്ഷണ ക്യാമറ ദൃശ്യങ്ങള്‍ പരിശോധിച്ചാണ് മോഷ്ടാക്കളെ തിരിച്ചറിഞ്ഞത്. പോലീസ് സ്റ്റേഷനില്‍ വിവരമറിയിച്ചതിനെത്തുടര്‍ന്ന് കേസ് രജിസ്റ്റര്‍ ചെയ്തു നടത്തിയ അന്വേഷണത്തില്‍ മണിക്കൂറുകള്‍ക്കുള്ളില്‍ പ്രതികള്‍ വലയിലാവുകയുംചെയ്തു.