24
May 2025
Tue
തിരുവനന്തപുരം: കേരളത്തില് ഇന്നും ഒറ്റപ്പെട്ട പ്രദേശങ്ങളില് ശക്തമായമഴ തുടരും. ശക്തമായ മഴ കണക്കിലെടുത്ത് വിവിധ ജില്ലകളില് യെല്ലോ അലര്ട്ട് പ്രഖ്യാപിച്ചു. നാളെ (മെയ് 14) വരെ ഒറ്റപ്പെട്ട ശക്തമായ മഴ തുടരുമെന്നാണ് മുന്നറിയിപ്പില് പറയുന്നത്.
 |
|
ഇന്ന് പത്തനംതിട്ട, ഇടുക്കി, മലപ്പുറം ജില്ലകളിലാണ് യെല്ലോ മുന്നറിയിപ്പുള്ളത്. ബുധനാഴ്ച എറണാകുളം, മലപ്പുറം, വയനാട്, കണ്ണൂര് ജില്ലകളിലും യെല്ലോ അലര്ട്ട് പ്രഖ്യാപിച്ചതായി കേന്ദ്ര കാലാവസ്ഥാ വകുപ്പ് അറിയിച്ചു.
കള്ളക്കടല് പ്രതിഭാസത്തിന്റെ ഭാഗമായി കേരളാ തീരത്ത് നാളെ രാത്രി 11.30 വരെ 0.4 മുതല് 0.8 മീറ്റര് വരെ ഉയര്ന്ന തിരമാലകള് കാരണം കടലാക്രമണത്തിന് സാധ്യതയും നിലനില്ക്കുന്നു. കന്യാകുമാരി തീരത്ത് നാളെ രാത്രി 11.30 വരെ കള്ളക്കടല് പ്രതിഭാസത്തിന്റെ ഭാഗമായി 0.9 മുതല് 1.0 മീറ്റര് വരെ ഉയര്ന്ന തിരമാലകള് കാരണം കടലാക്രമണത്തിന് സാധ്യതയുണ്ട്. കടലാക്രമണത്തിന് സാധ്യതയുള്ളതിനാല് മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കണമെന്ന് ദേശീയ സമുദ്രസ്ഥിതി പഠന ഗവേഷണ കേന്ദ്രം അറിയിച്ചു.
അതേസമയം, കനത്ത മഴയില് മൂന്നാര് ഗ്യാപ് റോഡില് കരിങ്കല്ല് റോഡില് പതിച്ചതിനെത്തുടര്ന്ന് ഇന്നലെ മൂന്നാര് ഗ്യാപ്പ് റോഡ് വഴിയുള്ള ഗതാഗതം നിരോധിച്ച് ഇടുക്കി ജില്ലാ കലക്ടര് ഉത്തരവിട്ടു. കൂടുതല് കല്ലുകള് റോഡിലേയ്ക്ക് പതിക്കാനുള്ള സാധ്യത കണക്കിലെടുത്ത് മറ്റൊരു ഉത്തരവ് ഉണ്ടാകുന്നതുവരെ നിരോധനം തുടരും. മഴ തുടരാന് സാധ്യതയുള്ളതിനാല് ജില്ലയിലെ മലയോര പ്രദേശങ്ങളിലൂടെ യാത്ര ചെയ്യുന്നവര് അതീവ ജാഗ്രത പാലിക്കണമെന്നും കലക്ടര് പറഞ്ഞു.
വളരെ ഉയരത്തിലുള്ള മണ്തിട്ടയില് നിന്നും അടര്ന്ന് വീണ പാറക്കല്ലുകള് റോഡില് വീണ് ചിതറി പോയിരുന്നു. ഈ സമയം സംഭവസ്ഥലത്ത് വാഹനങ്ങളോ ആളുകളോ ഇല്ലാതിരുന്നതിനാല് വലിയ അപകടം ഒഴിവാകുകയായിരുന്നു.
Kerala Rain Alert: Rain will continue in Kerala; Yellow alert in 3 districts today
Latest News
More Stories
All Rights Reserved © 2022