പഠനം തുടരാനാവാതെ കേരളത്തിൽ ബീഡി തെറുത്തയാൾ യുഎസിൽ ജില്ലാ ജഡ്ജിയായി

സാമ്പത്തിക പ്രതിസന്ധിമൂലം പത്താം ക്ലാസിൽ പഠനം നിർത്തി ബീഡിതെറുപ്പു ജോലി ചെയ്യേണ്ടി വന്ന കാസർകോഡുകാരൻ യുഎസിൽ ജഡ്ജിയായി ചുമതലേയറ്റു. ടെക്സാസിൽ ജില്ലാ ജഡ്ജിയായി ചുമതലയേറ്റ ശേഷമാണ് കാസർകോഡ് സ്വദേശി 51കാരനായ സു​രേന്ദ്രൻ കെ പട്ടേൽ തന്റെ പഴയകാലം പങ്കുവച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

വീട്ടിലെ സാമ്പത്തിക ബുദ്ധിമുട്ട് മൂലമാണ് പഠനംനിർത്തി ജോലി ചെയ്തത്. ഒരുവർഷത്തോളം ബിഡി തെറുക്കുകയുണ്ടായി. ഇതിനു ശേഷം പഠനം തുടരാൻ തീരുമാനിച്ചു. ​ഗ്രാമത്തിലെ കൂട്ടുകാർ ഇതിനു സഹായം നൽകി. പഠനത്തിനൊപ്പം പാർട് ടൈം ജോലി ചെയ്തു നിയമത്തിൽ ബിരുദം കരസ്ഥമാക്കി. നിയമബിരുദത്തിനു ശേഷം പ്രാക്ടീസ് ചെയ്യുകയും പിന്നീട് അമേരിക്കയിലേക്ക് കുടിയേറുകയായിരുന്നുവെന്നും സുരേന്ദ്രൻ പറയുന്നു.

ഈ സ്ഥാനത്തിനു വേണ്ടി ടെക്സാസിൽ താൻ മൽസരിച്ചപ്പോൾ ഏറെ പഴികൾ കേട്ടു. തന്റെ ഉച്ചാരണത്തെക്കുറിച്ചായിരുന്നു പ്രചാരണത്തിൽ കേട്ട കുറ്റപ്പെടുത്തലുകൾ. വിജയിക്കുമെന്ന് തന്റെ പാർട്ടിയായ ഡമോക്രാറ്റിക് പ്രൈമറി പാർട്ടി പോലും കരുതിയിരുന്നില്ല. ആരും വിജയിക്കുമെന്ന് വിശ്വസിച്ചില്ലെങ്കിലും ഇന്ന് താൻ ആ പദവിയിൽ എത്തിയിരിക്കുന്നു. ഒരു സന്ദേശമേ ഏവർക്കും നൽകാനുള്ളു. നിങ്ങളുടെ ഭാവി തീരുമാനിക്കാൻ ആരെയും അനുവദിക്കരുത്. നിങ്ങൾ മാത്രമായിരിക്കണം അതു തീരുമാനിക്കേണ്ടത്.