ദേവിയുടെ അനുഗ്രഹത്തിൽ പണം ഇരട്ടിയാകുമെന്ന തട്ടിപ്പിൽ 76കാരന് നഷ്ടം 19.60 ലക്ഷം രൂപ

ദേവിയുടെ അനുഗ്രഹം ലഭിക്കുമെന്നും തടഞ്ഞുവെച്ച പണം ഇരട്ടിയായി തിരിച്ചുകിട്ടുമെന്നും വിശ്വസിപ്പിച്ച് 76കാരനിൽനിന്ന് 19.60 ലക്ഷം രൂപയിലധികം തട്ടിയെടുത്ത കേസിൽ മൂന്ന് പേർ കൂടി അറസ്റ്റിൽ. ഗുജറാത്തിലെ വൽസാദ് സൈബർ ക്രൈം പൊലീസാണ് മഹിസാഗർ ജില്ലയിലെ വീർപൂരിൽനിന്ന് പ്രതികളെ പിടികൂടിയത്. മഹ്ബൂബ് ഷെയ്ഖ് (23), സർഫറാസ് പത്താൻ (39), സാഹിൽമിയ ഷെയ്ഖ് (23) എന്നിവരാണ് അറസ്റ്റിലായത്. അഘോരി ബാബയുടെയും ഗുരുവിന്റെയും വേഷത്തിലെത്തിയ സംഘം ഏപ്രിൽ 29നാണ് തട്ടിപ്പ് നടത്തിയതെന്നാണ് പൊലീസിന്റെ കണ്ടെത്തൽ.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പരാതിക്കാരനായ 76കാരനെ ഇന്റർനെറ്റ് വഴി ബന്ധപ്പെട്ട പ്രതികൾ ദേവിയുടെ അനുഗ്രഹം ലഭിക്കുമെന്നും കൈവശമുള്ള പണം ഇരട്ടിയാകുമെന്നും വിശ്വസിപ്പിച്ചു. തുടർന്ന് വിവിധ ബാങ്ക് അക്കൗണ്ടുകളുടെ വിവരങ്ങൾ നൽകി പണം നിക്ഷേപിക്കാൻ പ്രേരിപ്പിച്ചു. ഇത്തരത്തിൽ 19,60,500 രൂപയിലധികം തട്ടിയെടുത്തെന്നാണ് പരാതി.

ഭാരതീയ ന്യായ സംഹിതയിലെ 318(4), 61(2) വകുപ്പുകൾക്കും ഐടി നിയമത്തിലെ 66(D) വകുപ്പിനും കീഴിലാണ് വൽസാദ് സൈബർ ക്രൈം പൊലീസ് കേസ് രജിസ്റ്റർ ചെയ്തത്. നേരത്തെ അഞ്ചുപേരെ അറസ്റ്റ് ചെയ്തിരുന്നു. ആറുപേരെ കൂടി പിടികൂടാനുണ്ടായിരുന്നുവെന്ന് പൊലീസ് അറിയിച്ചു. സോഷ്യൽ മീഡിയ അക്കൗണ്ടുകൾ, ബാങ്ക് ഇടപാടുകൾ, ഫോൺ രേഖകൾ എന്നിവ പരിശോധിച്ചും രഹസ്യവിവരങ്ങൾ ശേഖരിച്ചുമാണ് ഒളിവിലായിരുന്ന പ്രതികളെ കണ്ടെത്തിയത്. ഒക്ടോബർ 26ന് ലഭിച്ച വിവരത്തിന്റെ അടിസ്ഥാനത്തിൽ മഹ്ബൂബിനെ ആദ്യം പിടികൂടി. ഇയാളിൽനിന്ന് ലഭിച്ച വിവരമനുസരിച്ചാണ് സർഫറാസ് പത്താനെയും സാഹിൽമിയ ഷെയ്ഖിനെയും അറസ്റ്റ് ചെയ്തത്.

മൂന്ന് പ്രതികളെയും ചോദ്യംചെയ്തുവരികയാണ്. താന്ത്രിക വിദ്യകളിലൂടെ പണം ഇരട്ടിയാക്കാമെന്ന വാഗ്ദാനങ്ങൾ തട്ടിപ്പാണെന്ന് പൊലീസ് മുന്നറിയിപ്പ് നൽകി. അപരിചിതരുടെ ഫോൺവിളികളിൽ വിശ്വസിച്ച് പണം കൈമാറുകയോ വ്യക്തിഗത വിവരങ്ങൾ പങ്കുവെക്കുകയോ ചെയ്യരുതെന്നും നിർദേശിച്ചു. സൈബർ തട്ടിപ്പിനിരയായാൽ ഉടൻ 1930 എന്ന ദേശീയ സൈബർ ക്രൈം ഹെൽപ്‌ലൈൻ നമ്പറിൽ ബന്ധപ്പെടണമെന്നും പൊലീസ് അറിയിച്ചു.

ALSO READ: പൂജയ്ക്കായി പൂക്കൾ പറിക്കാൻ ശ്രമിക്കുന്നതിനിടെ 23-ാം നിലയിൽനിന്ന് വീണ് അച്ഛനും മകനും മരിച്ചു

News Tag Live യുട്യൂബ് ചാനല്‍ Subscribe ചെയ്യുക