29
Oct 2026
Thu
പട്‌ന: ബീഹാര്‍ വിദ്യാഭ്യാസ വകുപ്പിലെ ഡിജിറ്റല്‍ ശമ്പള വിതരണ പോര്‍ട്ടല്‍ ദുരുപയോഗം ചെയ്ത് കോടികളുടെ അഴിമതി. വിദ്യാഭ്യാസ വകുപ്പ് നടപ്പിലാക്കിയ ഹ്യൂമന്‍ റിസോഴ്സ് മാനേജ്മെന്റ് സിസ്റ്റത്തില്‍ (HRMS) ഉദ്യോഗസ്ഥരും ജീവനക്കാരും ചേര്‍ന്ന് വന്‍ സാമ്പത്തിക തട്ടിപ്പ് നടത്തിയതായി ആഭ്യന്തര ഓഡിറ്റ് റിപ്പോര്‍ട്ടില്‍ കണ്ടെത്തി.
 |
|
പ്രധാന വിവരങ്ങൾ (Key Highlights)
- കോടികളുടെ ശമ്പള തട്ടിപ്പ്: ബീഹാർ വിദ്യാഭ്യാസ വകുപ്പിലെ ഹ്യൂമൻ റിസോഴ്സ് മാനേജ്മെന്റ് സിസ്റ്റം (HRMS) പോർട്ടൽ ദുരുപയോഗം ചെയ്ത് 1.85 കോടിയിലധികം രൂപയുടെ സാമ്പത്തിക ക്രമക്കേട് നടന്നതായി ആഭ്യന്തര ഓഡിറ്റിൽ കണ്ടെത്തൽ.
- വ്യാജ അധ്യാപകരും അലവൻസുകളും: ഇല്ലാത്ത അധ്യാപകരുടെ പേരിൽ ശമ്പളം നൽകിയും, യഥാർത്ഥ ശമ്പളത്തോടൊപ്പം ലക്ഷങ്ങളുടെ വ്യാജ അലവൻസുകൾ കൂട്ടിച്ചേർത്തും ഉദ്യോഗസ്ഥരും ക്ലർക്കുമാരും തട്ടിപ്പ് നടത്തി.
- നാല് ഉദ്യോഗസ്ഥർക്ക് സസ്പെൻഷൻ: സംഭവം വിവാദമായതോടെ ഡിസ്ട്രിക്ട് പ്രോഗ്രാം ഓഫീസർ ഉൾപ്പെടെ ഉയർന്ന ഉദ്യോഗസ്ഥരെ പോലീസും വിദ്യാഭ്യാസ വകുപ്പും ചേർന്ന് അറസ്റ്റ് ചെയ്യുകയും സസ്പെൻഡ് ചെയ്യുകയും ചെയ്തു.
- 38 ജില്ലകളിലും സമഗ്ര പരിശോധന: തട്ടിപ്പ് പുറത്തുവന്നതോടെ സംസ്ഥാനത്തെ 38 ജില്ലകളിലും വിജിലൻസ് ആഭ്യന്തര ഓഡിറ്റ് പൂർത്തിയാക്കാൻ ബീഹാർ വിദ്യാഭ്യാസ മന്ത്രി മിഥിലേഷ് തിവാരി നിർദ്ദേശം നൽകി.
ഇല്ലാത്ത അധ്യാപകരുടെ പേരില്‍ കോടികള്‍ മാറിയെടുക്കുക, ശമ്പള പോര്‍ട്ടലില്‍ അനാവശ്യ അലവന്‍സുകള്‍ കൂട്ടിച്ചേര്‍ത്ത് വന്‍ തുക സ്വന്തം അക്കൗണ്ടുകളിലേക്ക് മാറ്റുക തുടങ്ങി ഞെട്ടിക്കുന്ന ക്രമക്കേടുകളാണ് പട്‌ന, നവാഡ, ഭഗല്‍പൂര്‍ ജില്ലകളില്‍ നടന്നിട്ടുള്ളത്. പ്രാഥമിക അന്വേഷണത്തില്‍ 1.85 കോടി രൂപയുടെ അപഹരണം കണ്ടെത്തിയതിനെ തുടര്‍ന്ന് ഡിസ്ട്രിക്ട് എഡ്യൂക്കേഷന്‍ ഓഫീസര്‍ (DEO) അടക്കം ഉയര്‍ന്ന ഉദ്യോഗസ്ഥരെ സസ്‌പെന്‍ഡ് ചെയ്യുകയും ക്രിമിനല്‍ കേസെടുത്ത് അറസ്റ്റ് ചെയ്യുകയും ചെയ്തു.
കേസ് 1: നവാഡ (46,000 ശമ്പളമുള്ള അധ്യാപികയ്ക്ക് ലഭിച്ചത് 4.9 ലക്ഷം!)
നവാഡ ജില്ലയിലെ രാജൗലി ബെലാദിഹ് പ്രാഥമിക വിദ്യാലയത്തിലെ അധ്യാപികയുടെ ശമ്പള ബില്ലില്‍ വന്‍ തിരിമറി നടന്നു. ബി.ഇ.ഒ (Block Education Officer) പാസാക്കിയ ശമ്പള ബില്ലില്‍ അധ്യാപികയുടെ പ്രതിമാസ ശമ്പളം 46,772 രൂപയായിരുന്നു. എന്നാല്‍ പോര്‍ട്ടലില്‍ വിവരങ്ങള്‍ നല്‍കുന്ന ‘മേക്കര്‍’ (Maker), ബില്‍ പരിശോധിക്കുന്ന ‘ചെക്കര്‍’ (Checker) എന്നീ ചുമതലകളുള്ള ഓഫീസിലെ ക്ലര്‍ക്കുമാര്‍ ചേര്‍ന്ന് 4.52 ലക്ഷം രൂപയുടെ വ്യാജ അലവന്‍സ് കൂട്ടിയിട്ട് ശമ്പളം 4,91,772 രൂപയായി ഉയര്‍ത്തുകയായിരുന്നു.
അടുത്ത മാസവും ഇത്തരത്തില്‍ 3.49 ലക്ഷം രൂപ ഇവര്‍ക്ക് നല്‍കി. തുടര്‍ന്ന് ഈ അധ്യാപിക തനിക്ക് അധികമായി ലഭിച്ച തുകയില്‍ നിന്ന് 1 ലക്ഷം രൂപ ഹെഡ് ക്ലര്‍ക്കായ സതീഷ് കുമാറിന്റെ ബാങ്ക് അക്കൗണ്ടിലേക്ക് ഗൂഗിള്‍ പേ വഴിയും ബാങ്ക് ട്രാന്‍സ്ഫര്‍ വഴിയും നല്‍കിയതായി പോലീസ് കണ്ടെത്തി. ആകെ 10.43 ലക്ഷം രൂപയാണ് നവാഡയില്‍ മാത്രം ഇത്തരത്തില്‍ വകമാറ്റിയത്.
കേസ് 2: പട്‌ന (ഐ.ഡി ഹാക്ക് ചെയ്ത് 76 ലക്ഷത്തിന്റെ തട്ടിപ്പ്)
പട്‌നയിലെ ഗുല്‍സാര്‍ബാഗ് എഫ്.എന്‍.എസ് അക്കാദമിയിലെ ക്ലര്‍ക്കായ വിജയ് കുമാര്‍, ജില്ലാ വിദ്യാഭ്യാസ ഓഫീസറുടെ (DEO) ഔദ്യോഗിക ‘മേക്കര്‍ ലോഗിന്‍ ഐ.ഡി’ നിയമവിരുദ്ധമായി കൈക്കലാക്കി. തുടര്‍ന്ന് വ്യാജ പോര്‍ട്ടല്‍ എന്‍ട്രികള്‍ ഉണ്ടാക്കി സര്‍ക്കാരിന്റെയും വകുപ്പിന്റെയും ഫണ്ടില്‍ നിന്ന് 76,71,983 രൂപ അക്കൗണ്ടുകളിലേക്ക് വകമാറ്റുകയായിരുന്നു. സംഭവത്തില്‍ ഇയാളെ സര്‍വീസില്‍ നിന്ന് സസ്‌പെന്‍ഡ് ചെയ്യുകയും ക്രിമിനല്‍ ഗൂഢാലോചനയ്ക്ക് കേസെടുക്കുകയും ചെയ്തു.
കേസ് 3: ഭഗല്‍പൂര്‍ (ഇല്ലാത്ത അധ്യാപകരുടെ പേരില്‍ ലക്ഷങ്ങള്‍!)
ഭഗല്‍പൂരില്‍ ‘തനുശ്രീ’ എന്ന പേരില്‍ വ്യാജമായി സൃഷ്ടിച്ച അധ്യാപികയുടെ അക്കൗണ്ടിലേക്ക് നിരവധി മാസങ്ങളിലായി ശമ്പളമെന്ന വ്യാജേന 98,12,773 രൂപ കൈമാറിയ സംഭവത്തില്‍ ജില്ലാ വിദ്യാഭ്യാസ ഓഫീസറെ സസ്‌പെന്‍ഡ് ചെയ്തു. മറ്റൊരു സംഭവത്തില്‍ വ്യാജ അധ്യാപകരുടെ പേരില്‍ പോര്‍ട്ടല്‍ വഴി പണം തട്ടിയതിന് ഡിസ്ട്രിക്ട് പ്രോഗ്രാം ഓഫീസര്‍ ശശി ചന്ദന്‍ ചൗധരിയെ പോലീസ് അറസ്റ്റ് ചെയ്തു.
38 ജില്ലകളിലും ഓഡിറ്റ് കടുപ്പിക്കാന്‍ സര്‍ക്കാര്‍
ഡിജിറ്റല്‍ പോര്‍ട്ടലുകള്‍ ഉപയോഗിച്ച് ജീവനക്കാര്‍ നടത്തിയ വന്‍ തട്ടിപ്പ് പുറത്തുവന്നതോടെ ബീഹാറിലെ 38 ജില്ലകളിലും സമഗ്ര ആഭ്യന്തര ഓഡിറ്റിന് ഉത്തരവിട്ടതായി വിദ്യാഭ്യാസ മന്ത്രി മിഥിലേഷ് തിവാരി അറിയിച്ചു. നവംബര്‍ പകുതിയോടെ ഓഡിറ്റ് പൂര്‍ത്തിയാക്കാന്‍ നിര്‍ദ്ദേശിച്ചിട്ടുണ്ട്. ഓണ്‍ലൈന്‍ ശമ്പള വിതരണ സംവിധാനത്തിലെ സുരക്ഷാ വിടവുകള്‍ അടയ്ക്കാനും വ്യാജ അധ്യാപകരെയും അഴിമതിക്കാരായ ഉദ്യോഗസ്ഥരെയും കണ്ടെത്താനുമുള്ള ശക്തമായ നടപടികള്‍ തുടരുമെന്നും മന്ത്രി വ്യക്തമാക്കി.
Tags: Bihar Education Department HRMS Scam, Bihar Teacher Salary Scam News, Mithilesh Tiwari Bihar Education Minister, Nawada Bhagalpur Patna Fraud Cases, National News Malayalam, News Malayalam
News Tag Live യുട്യൂബ് ചാനല്‍ Subscribe ചെയ്യുക
Latest News
Trending
More Stories
All Rights Reserved © 2026