ഒരു നൂറ്റാണ്ടിനിടെ ആദ്യം! യുഎസ് സൈനികരെ കൂട്ടക്കൊല ചെയ്ത മേജര്‍ നിദാല്‍ ഹസന്റെ വധശിക്ഷ ഫയറിങ് സ്‌ക്വാഡ് വഴി; ലൈവായി കാണിക്കും; പെന്റഗണിന്റെ വന്‍ തീരുമാനം!

വാഷിങ്ടണ്‍: 2009-ല്‍ ഫോര്‍ട്ട് ഹൂഡ് സൈനിക താവളത്തില്‍ നിരായുധരായ 13 സഹപ്രവര്‍ത്തകരെ വെടിവെച്ചുകൊന്ന കേസില്‍ മരണശിക്ഷയ്ക്ക് വിധിക്കപ്പെട്ട മുന്‍ ആര്‍മി മേജറും മാനസികരോഗ വിദഗ്ദ്ധനുമായ നിദാല്‍ ഹസന്റെ വധശിക്ഷ തത്സമയം സംപ്രേക്ഷണം ചെയ്യുമെന്ന് പെന്റഗണ്‍ വ്യക്തമാക്കി. പൊതുജനങ്ങള്‍ക്ക് തത്സമയം കാണാന്‍ സാധിക്കുന്ന രീതിയിലായിരിക്കും വധശിക്ഷ നടപ്പാക്കുക എന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് ഔദ്യോഗികമായി അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പരമ്പരാഗതമായി നല്‍കിവരുന്ന വിഷ സൂചി(Lethal Injection) മുറയ്ക്ക് പകരം, ഒന്നിലധികം പേര്‍ ഒരേസമയം റൈഫിളുകള്‍ ഉപയോഗിച്ച് വെടിയുതിര്‍ക്കുന്ന ‘ഫയറിങ് സ്‌ക്വാഡ്’ (Firing Squad) രീതിയായിരിക്കും വധശിക്ഷയ്ക്കായി തിരഞ്ഞെടുക്കുക.

ഡിസംബര്‍ മൂന്നിന് തത്സമയ സംപ്രേക്ഷണം; ഒരു നൂറ്റാണ്ടിനിടയിലെ ആദ്യ പരസ്യ വധശിക്ഷ

ഡിസംബര്‍ മൂന്നിന് ഫോര്‍ട്ട് ഹൂഡില്‍ വെച്ചായിരിക്കും വധശിക്ഷ നടപ്പിലാക്കുകയെന്ന് യുഎസ് സൈനിക വക്താക്കള്‍ അറിയിച്ചു. ബിബിസി റിപ്പോര്‍ട്ട് അനുസരിച്ച്, ഒരു നൂറ്റാണ്ടിനിടയില്‍ യുഎസ് മണ്ണില്‍ നടക്കുന്ന ആദ്യത്തെ പരസ്യ വധശിക്ഷയായിരിക്കും ഇത്. കൂടാതെ കഴിഞ്ഞ 65 വര്‍ഷത്തിനിടെ യുഎസ് സൈന്യം നടപ്പാക്കുന്ന ആദ്യത്തെ സൈനിക വധശിക്ഷ കൂടിയാണിത്.

ഹസന്‍ എന്തെങ്കിലും അവസാന ആഗ്രഹങ്ങള്‍ ഉന്നയിച്ചിട്ടുണ്ടോ എന്ന മാധ്യമപ്രവര്‍ത്തകരുടെ ചോദ്യത്തിന് ‘അതൊന്നും ഞങ്ങള്‍ കാര്യമാക്കുന്നില്ല, ഡിസംബര്‍ മൂന്നിന് ഞങ്ങള്‍ അയാളെ അവിടെ കാണും’ എന്നായിരുന്നു പ്രതിരോധ സെക്രട്ടറി പീറ്റ് ഹെഗ്സെത്തിന്റെ കടുപ്പിച്ച മറുപടി.

2009-ലെ ഭീകരാക്രമണവും ഹസന്റെ നിലപാടും

2009 നവംബര്‍ അഞ്ചിനാണ് അമേരിക്കയെ വിറപ്പിച്ച കൊലപാതകം നടക്കുന്നത്. അഫ്ഗാനിസ്താനിലേക്ക് നിയോഗിക്കപ്പെടുന്നതിന് മുന്നോടിയായി പ്രതിരോധ കുത്തിവയ്പ്പുകള്‍ക്കും മെഡിക്കല്‍ ക്ലിയറന്‍സിനുമായി നീണ്ട നിരയില്‍ കാത്തുനില്‍ക്കുകയായിരുന്ന സഹപ്രവര്‍ത്തകര്‍ക്ക് നേരെയാണ് മേജര്‍ ഹസന്‍ അപ്രതീക്ഷിതമായി വെടിയുതിര്‍ത്തത്.

അക്രമത്തില്‍ 13 സൈനികര്‍ കൊല്ലപ്പെടുകയും 32 പേര്‍ക്ക് ഗുരുതരമായി പരിക്കേല്‍ക്കുകയും ചെയ്തു. അഫ്ഗാനിസ്താനിലേക്ക് പോകുന്ന യുഎസ് സൈന്യത്തെ തടയാനും അവിടുത്തെ നിരപരാധികളെ രക്ഷിക്കാനുമാണ് താന്‍ ഇത് ചെയ്തതെന്നാണ് പിന്നീട് ഹസന്‍ വാദിച്ചത്.

സുരക്ഷാ ഉദ്യോഗസ്ഥരുടെ വെടിയേറ്റതിനെ തുടര്‍ന്ന് നട്ടെല്ലിന് ഗുരുതരമായി പരിക്കേറ്റ ഹസന്റെ അരയ്ക്ക് താഴേക്ക് തളര്‍ന്നുപോയിരുന്നു. വിചാരണ നേരിടുമ്പോള്‍ മുതല്‍ വീല്‍ചെയറിലാണ് ഇയാള്‍ കഴിയുന്നത്. വിചാരണ വേളയില്‍ അഭിഭാഷകരെ ഒഴിവാക്കി സ്വന്തമായി വാദിച്ച ഹസന്‍, താനാണ് വെടിയുതിര്‍ത്തതെന്ന് സമ്മതിച്ചിരുന്നെങ്കിലും പ്രതിരോധത്തിനായി സാക്ഷികളെയോ തെളിവുകളെയോ ഹാജരാക്കിയിരുന്നില്ല.

സൈനിക ചരിത്രവും വധശിക്ഷാ രീതിയും

രണ്ടാം ലോകമഹായുദ്ധത്തിന് ശേഷം യുഎസ് സൈന്യം ഫയറിങ് സ്‌ക്വാഡ് വഴി ഒരു സൈനികനെയും വധിച്ചിട്ടില്ലെന്ന് പെന്റഗണ്‍ രേഖകള്‍ വ്യക്തമാക്കുന്നു. ആര്‍മി പ്രൈവറ്റ് ജോണ്‍ ബെന്നറ്റസിനെ തൂക്കിലേറ്റിക്കൊണ്ട് 1961 ഏപ്രില്‍ 13-നാണ് യുഎസ് സൈന്യം അവസാനമായി ഒരു സൈനികന്റെ വധശിക്ഷ നടപ്പിലാക്കിയത്.

ആംനസ്റ്റി ഇന്റര്‍നാഷണലിന്റെ (Amnesty International) കണക്കുകള്‍ പ്രകാരം, ലോകത്താകമാനം കഴിഞ്ഞ വര്‍ഷം 17 രാജ്യങ്ങളിലായി 2,700-ലധികം വധശിക്ഷകള്‍ നടപ്പിലായെങ്കിലും രണ്ട് രാജ്യങ്ങള്‍ മാത്രമാണ് അവ പരസ്യമായി നടത്തിയത്. 2025-ല്‍ ഇറാനില്‍ 11-ഉം അഫ്ഗാനിസ്ഥാനില്‍ ആറും പരസ്യ വധശിക്ഷകള്‍ നടപ്പിലാക്കിയിട്ടുണ്ട്. ഇതിന് പിന്നാലെയാണ് മനുഷ്യാവകാശ വശങ്ങളെയും ആഗോള നിയമങ്ങളെയും മറികടന്ന് പരസ്യ വധശിക്ഷ നടപ്പാക്കാന്‍ യുഎസ് തീരുമാനിച്ചിരിക്കുന്നത്.

Tags: Nidal Hasan Execution, US Military Firing Squad, Pete Hegseth Pentagon, Fort Hood Shooting 2009, US Military Death Penalty, World News Malayalam, International News Malayalam

News Tag Live യുട്യൂബ് ചാനല്‍ Subscribe ചെയ്യുക