പ്രത്യേക ഫോമും തിരിച്ചറിയൽ രേഖയും വേണ്ട, ചൊവ്വാഴ്ച മുതൽ 2000 രൂപ നോട്ടുകൾ മാറ്റാമെന്ന് SBI

ന്യൂഡൽഹി: 2000 രൂപയുടെ നോട്ടുമാറാൻ പ്രത്യേക ഫോമിന്റെ ആവശ്യമില്ലെന്ന് പ്രമുഖ പൊതുമേഖല ബാങ്ക് എസ്ബിഐ. നോട്ടുമാറാൻ ശാഖയിൽ വരുമ്പോൾ ഉപഭോക്താവ് തിരിച്ചറിയൽ രേഖ നൽകേണ്ടതും ഇല്ല. ഫോം പൂരിപ്പിച്ചത് നൽകാതെ ഒരേ സമയം 20,000 രൂപ വരെ മാറ്റിയെടുക്കാമെന്നും എസ്ബിഐ അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ചൊവ്വാഴ്ച മുതലാണ് നോട്ടുമാറുന്നതിനുള്ള ക്രമീകരണം ബാങ്കുകളിൽ ഒരുക്കുന്നത്. ഇതിന് പിന്നാലെയാണ് നോട്ടുമാറാൻ പ്രത്യേക ഫോമിന്റെ ആവശ്യമില്ലെന്ന അറിയിപ്പുമായി എസ്ബിഐ രംഗത്തെത്തിയത്.നോട്ടുമാറാൻ പ്രത്യേക സ്ലിപ്പിന്റെ ആവശ്യവുമില്ല. തിരിച്ചറിയൽ രേഖ ഇല്ലാതെ തന്നെ ഉപഭോക്താവിന് നോട്ട് മാറിയെടുക്കാവുന്നതാണെന്നും എസ്ബിഐയുടെ അറിയിപ്പിൽ പറയുന്നു.

വെള്ളിയാഴ്ച രാത്രിയയാണ് റിസർവ് ബാങ്ക് 2000 രൂപ നോട്ട് പിൻവലിച്ചത്. നിലവിൽ നോട്ടിന് നിയമപ്രാബല്യം ഉണ്ടാവുമെന്ന് പറഞ്ഞ റിസർവ് ബാങ്ക് സെപ്റ്റംബർ 30നകം ബാങ്ക് ശാഖകളിൽ നിന്നും റിസർവ് ബാങ്ക് റീജിണൽ ഓഫീസുകളിൽ നിന്നും നോട്ട് മാറ്റിയെടുക്കണമെന്നും അഭ്യർഥിച്ചിട്ടുണ്ട്.