മോഷണത്തിനിടെ ലിഫ്റ്റിനിടയിൽ കുടുങ്ങി യുവാവിന് ദാരുണാന്ത്യം

ലിഫ്റ്റിനും ഭിത്തിക്കുമിടയിൽ കുടുങ്ങി മോഷണത്തിനെത്തിയ യുവാവിന് ദാരുണാന്ത്യം. ഡൽഹിയിലെ മാളവ്യ ന​ഗറിൽ മേൽപ്പാലത്തിലേക്കുള്ള ലിഫ്റ്റിനിടയിൽ കുടുങ്ങിയാണ് യുവാവ് മരിച്ചത്. 25കാരനാണ് മരിച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ശനിയാഴ്ച രാത്രി എട്ടരയോടെയാണ് അപകടം. ലിഫ്റ്റ് പാതിവഴിയില് നിന്നതോടെ കുടുങ്ങിയ മൂന്ന് വിദ്യാർഥികൾ പൊലീസിലും ഫയർഫോഴ്സിലും വിളിച്ചു സഹായം തേടിയതോടെയാണ് വിവരം പുറത്തറിയുന്നത്. ലിഫ്റ്റിന്റെ വാതിലിനും ഭിത്തിക്കും ഇടയിലുള്ള ഭാ​ഗത്താണ് യുവാവ് കുടുങ്ങിയത്.

മരിച്ചയാൾ മോഷ്ടാവാണെന്ന് പൊലീസ് പറഞ്ഞു. ഇയാൾ ലിഫ്റ്റിനിടയിൽ കുടുങ്ങിയതിനെ തുടർന്നാണ് ലിഫ്റ്റിന്റെ പ്രവർത്തനം തകരാറിലായതെന്ന് പൊലീസ് പറഞ്ഞു. ലിഫ്റ്റിന്റെ വിലപിടിപ്പുള്ള ഭാ​ഗം മോഷ്ടിക്കാനായാണ് യുവാവ് ഇതിനിടയിൽ കയറിയതെന്നും പൊലീസ് പറയുന്നു.