ഹൂത്തി ആക്രമണം രൂക്ഷം; സൗദിയുടെ സംരക്ഷണത്തിന് തുര്‍ക്കിയും പാകിസ്താനും സൈന്യത്തെ അയക്കുന്നു! ‘മക്ക പ്രതിരോധ സഖ്യം’ സജീവമായി

റിയാദ്: യമനില്‍ ഹൂത്തി വിമതരുടെ ആക്രമണങ്ങള്‍ കൂടുതല്‍ ശക്തമായ പശ്ചാത്തലത്തില്‍ സൗദി അറേബ്യയുടെ സുരക്ഷ ഉറപ്പാക്കാനും പ്രതിരോധം ശക്തമാക്കാനുമായി തുര്‍ക്കിയും പാകിസ്താനും സൗദിയിലേക്ക് സൈന്യത്തെ അയക്കുന്നു. തിങ്കളാഴ്ച റിയാദില്‍ ചേര്‍ന്ന അടിയന്തര സുരക്ഷാ യോഗത്തിലാണ് മൂന്ന് രാജ്യങ്ങളും ചേര്‍ന്ന് ‘വേഗത്തിലുള്ള സൈന്യവിന്യാസത്തിന്’ തീരുമാനമെടുത്തത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കഴിഞ്ഞ ഓഗസ്റ്റില്‍ സൗദി അറേബ്യയും തുര്‍ക്കിയും പാകിസ്താനും ഒപ്പുവെച്ച ചരിത്രപരമായ ‘മക്ക സംയുക്ത പ്രതിരോധ കരാര്‍’ (Mecca Joint Defence Agreement) അടിസ്ഥാനമാക്കിയാണ് പുതിയ നടപടികള്‍.

മേഖലയിലെ പുതിയ ‘നാറ്റോ’ മാതൃകാ സഖ്യം

ഏതെങ്കിലും ഒരു രാജ്യത്തിന് നേരെ ഉണ്ടാകുന്ന അധിനിവേശത്തെ മൂന്ന് രാജ്യങ്ങള്‍ക്കും എതിരെയുള്ള ആക്രമണമായി കണക്കാക്കുമെന്ന വകപ്പാണ് ഈ കരാറിലുള്ളത്. നാറ്റോ (NATO) വ്യവസ്ഥകള്‍ക്ക് സമാനമായ ഈ സഖ്യത്തിലൂടെ നാറ്റോയിലെ രണ്ടാമത്തെ വലിയ സൈനിക ശക്തിയായ തുര്‍ക്കിയും, ഇസ്ലാമിക ലോകത്തെ ഏക അണുശക്തിയായ പാകിസ്താനും, ഗള്‍ഫിലെ സാമ്പത്തിക-രാഷ്ട്രീയ പ്രമുഖരായ സൗദി അറേബ്യയും ഒരു കുടക്കീഴില്‍ അണിനിരന്നിരിക്കുകയാണ്.

റിയാദില്‍ നടന്ന യോഗത്തില്‍ വിദേശകാര്യ പ്രതിരോധ മന്ത്രിമാര്‍ പങ്കെടുക്കുകയും, വിശുദ്ധ നഗരങ്ങളായ മക്ക, മദീന എന്നിവയുടെ സുരക്ഷ മുന്‍നിര്‍ത്തി പ്രസ്താവന ഇറക്കുകയും ചെയ്തു. രാജ്യങ്ങളുടെ പരമാധികാരത്തിനും ഭൗമ അഖണ്ഡതയ്ക്കും എതിരെ ഉണ്ടാകുന്ന ഭീഷണികളെ വച്ചുപൊറുപ്പിക്കില്ലെന്ന് സംയുക്ത പ്രസ്താവനയില്‍ വ്യക്തമാക്കി.

യമനില്‍ വന്‍ പ്രത്യാക്രമണം

യമനില്‍ സൗദി പിന്തുണയുള്ള ഔദ്യോഗിക സര്‍ക്കാര്‍ ഹൂത്തി കള്‍ക്കെതിരെ ശക്തമായ സൈനിക പ്രത്യാക്രമണം ആരംഭിച്ചതിന് തൊട്ടുപിന്നാലെയാണ് പ്രതിരോധ കരാര്‍ സജീവമാക്കിയിരിക്കുന്നത്. കഴിഞ്ഞ കുറച്ച് മാസങ്ങളായി ഹൂത്തി വിമതര്‍ യമനിലെ തന്ത്രപ്രധാനമായ തീരദേശ മേഖലകളും തയ്യിബ് എയര്‍പോര്‍ട്ടും അടക്കം പിടിച്ചെടുത്തിരുന്നു. ഇതിന് മറുപടിയായി സൗദി സൈന്യത്തിന്റെ മേല്‍നോട്ടത്തില്‍ വിപുലമായ കര-വ്യോമ ആക്രമണങ്ങളാണ് യമന്‍ സര്‍ക്കാര്‍ സേന തിങ്കളാഴ്ച ആരംഭിച്ചത്.

പാകിസ്താനില്‍ നിന്നുള്ള വിദഗ്ധ സൈനിക സംഘവും വ്യോമസേന പിന്തുണയും ഇതിനോടകം തന്നെ സൗദി അതിര്‍ത്തി പ്രദേശങ്ങളില്‍ നിലയുറപ്പിച്ചിട്ടുണ്ടെന്നാണ് റിപ്പോര്‍ട്ടുകള്‍. വരും ദിവസങ്ങളില്‍ തുര്‍ക്കിയുടെ അത്യാധുനിക ഡ്രോണുകളും കടല്‍ അധിഷ്ഠിത പ്രതിരോധ സംവിധാനങ്ങളും സൗദി മണ്ണിലേക്ക് കൂടുതല്‍ ശേഷിയോടെ എത്തുമെന്നാണ് പ്രതീക്ഷിക്കുന്നത്.

Tags: Saudi Arabia, Turkey, Pakistan, Mecca Defense Pact, Houthi Attack, Yemen War, Middle East Crisis, International News Malayalam, World News

News Tag Live യുട്യൂബ് ചാനല്‍ Subscribe ചെയ്യുക