Lionel Messi Kerala Visit Scam തിരുവനന്തപുരം: കേരളത്തിലെ കായിക-രാഷ്ട്രീയ മേഖലകളെ പിടിച്ചുകുലുക്കിയ ലയണല് മെസ്സി സന്ദര്ശന തട്ടിപ്പ് കേസില് മുന് കായികമന്ത്രി വി. അബ്ദുറഹ്മാനെ പ്രത്യേക അന്വേഷണ സംഘം പ്രതിചേര്ത്തു. അബ്ദുറഹ്മാന് പുറമെ സംസ്ഥാന സ്പോര്ട്സ് കൗണ്സില് മുന് പ്രസിഡന്റ് യു. ഷറഫലി, മുന്മന്ത്രിയുടെ പ്രൈവറ്റ് സെക്രട്ടറിയായിരുന്ന സി. സത്യപാലന് എന്നിവരെയും കേസില് പ്രതികളാക്കിയിട്ടുണ്ട്.
|
സ്പോണ്സര്ക്ക് (റിപ്പോര്ട്ടര് ബ്രോഡ്കാസ്റ്റിംഗ് കമ്പനി) അന്യായമായ സാമ്പത്തിക നേട്ടമുണ്ടാക്കാന് വി. അബ്ദുറഹ്മാന് ഔദ്യോഗിക പദവി ദുരുപയോഗം ചെയ്ത് നിയമവിരുദ്ധമായി ഇടപെട്ടെന്നാണ് എഡിജിപി പി. വിജയന് നേതൃത്വം നല്കുന്ന പ്രത്യേക അന്വേഷണ സംഘത്തിന്റെ കണ്ടെത്തല്. മുന്മന്ത്രിയെ അഴിമതി നിരോധന നിയമപ്രകാരം പ്രോസിക്യൂട്ട് ചെയ്യാന് ഗവര്ണര് ഓം പ്രകാശ് മാത്തൂര് നേരത്തെ അനുമതി നല്കിയിരുന്നു. ഇതിന് പിന്നാലെ വ്യാഴാഴ്ച (നവംബര് 20) സംസ്ഥാന ആഭ്യന്തര വകുപ്പ് ഔദ്യോഗിക ഉത്തരവ് പുറപ്പെടുവിച്ചതോടെയാണ് എസ്ഐടി എഫ്ഐആറില് ഇവരെ പ്രതികളാക്കി തുടര്നടപടികളിലേക്ക് കടന്നത്.
ഇതോടെ റിപ്പോര്ട്ടര് ചാനല് ഉടമ ആന്റോ അഗസ്റ്റിന് അടക്കം കേസിലെ ആകെ പ്രതികളുടെ എണ്ണം അഞ്ചായി ഉയര്ന്നു.
എസ്ഐടി കണ്ടെത്തിയ ഗുരുതര ക്രമക്കേടുകള്
ഏകദേശം 210 കോടി രൂപ ചെലവ് കണക്കാക്കിയിരുന്ന അര്ജന്റീന ഫുട്ബോള് ടീമിന്റെ കേരള സന്ദര്ശനത്തിന്റെ മറവില് നടന്ന വന് അട്ടിമറികളാണ് അന്വേഷണ സംഘം പുറത്തുകൊണ്ടുവന്നത്. യാതൊരുവിധ ടെന്ഡര് നടപടികളും പാലിക്കാതെ സ്വകാര്യ കമ്പനിയെ സ്പോണ്സറായി തിരഞ്ഞെടുത്തു. സര്ക്കാര് ഉത്തരവിറങ്ങുന്നതിന് മുന്പ് തന്നെ സ്പോണ്സര് അര്ജന്റീന ഫുട്ബോള് അസോസിയേഷനുമായി കരാറിലേര്പ്പെട്ടിരുന്നു.
പദ്ധതിയുടെ ചുമതല ‘സ്പോര്ട്സ് കേരള ഫൗണ്ടേഷന്’ നല്കിക്കൊണ്ടുള്ള ആദ്യ ഉത്തരവ് പിന്നീട് ഭേദഗതി ചെയ്യുകയും പുതുക്കിയ ഉത്തരവ് സര്ക്കാര് ഫയലുകളില് നിന്ന് പൂഴ്ത്തിവെക്കുകയും ചെയ്തു. അര്ജന്റീനയില് നിന്ന് ഔദ്യോഗിക അറിയിപ്പ് ലഭിക്കും മുന്പേ ടീമിന്റെ വരവ് മന്ത്രി പ്രഖ്യാപിച്ചതായും കണ്ടെത്തിയിട്ടുണ്ട്.
കലൂര് സ്റ്റേഡിയം കൈമാറ്റത്തിലെ 5 കോടിയുടെ നഷ്ടം
കരാറുകള് പോലുമില്ലാതെ 5 കോടി രൂപയുടെ സാമ്പത്തിക ഇളവ് നിയമവിരുദ്ധമായി നല്കി കൊച്ചി കലൂര് ജവഹര്ലാല് നെഹ്റു അന്താരാഷ്ട്ര സ്റ്റേഡിയം സ്പോണ്സര്ക്ക് കൈമാറിയതിലൂടെ സര്ക്കാരിന് വന് സാമ്പത്തിക നഷ്ടമുണ്ടായി.
അര്ജന്റീനയുമായി സ്പോണ്സര് ഒപ്പിട്ട കരാറില് സര്ക്കാര് പ്രതിനിധിയെന്ന നിലയില് സ്പോര്ട്സ് കൗണ്സില് പ്രസിഡന്റായിരുന്ന യു. ഷറഫലി സാക്ഷിയായി ഒപ്പിട്ടു. കായികവകുപ്പിലെ ഉന്നത ഉദ്യോഗസ്ഥരെ മറികടന്ന് ഫയല് നീക്കങ്ങള് നടത്താനും സ്പോണ്സര്ക്ക് സാമ്പത്തിക നേട്ടത്തിന് അവസരമൊരുക്കാനും പ്രൈവറ്റ് സെക്രട്ടറി സി. സത്യപാലന് നേരിട്ട് നിര്ദ്ദേശങ്ങള് നല്കിയെന്നും എസ്ഐടി കണ്ടെത്തി.
10 വര്ഷം വരെ തടവുശിക്ഷ; കോടതിയുടെ കാര്യത്തില് എസ്ഐടി യോഗം
അഴിമതി നിരോധന നിയമത്തിലെ വിവിധ വകുപ്പുകള് ഉള്പ്പെടെ 10 വര്ഷം വരെ തടവുശിക്ഷ ലഭിക്കാവുന്ന കുറ്റങ്ങളാണ് പ്രതികള്ക്കെതിരെ ചുമത്തിയിരിക്കുന്നത്. ഇടപാടുകളുടെ കൂടുതല് വിവരങ്ങള് ശേഖരിക്കുന്നതിനായി അര്ജന്റീന ഫുട്ബോള് അസോസിയേഷനില് നിന്ന് നേരിട്ട് വിവരങ്ങള് തേടാനും, പണം മുടക്കിയ ധനകാര്യ സ്ഥാപനങ്ങളിലേക്ക് അന്വേഷണം വ്യാപിപ്പിക്കാനും എസ്ഐടി തീരുമാനിച്ചിട്ടുണ്ട്.
സാധാരണയായി അഴിമതി നിരോധന നിയമപ്രകാരമുള്ള കേസുകള് അന്വേഷിക്കുന്നത് വിജിലന്സും റിപ്പോര്ട്ട് സമര്പ്പിക്കുന്നത് വിജിലന്സ് കോടതിയിലുമാണ്. എന്നാല് ഈ കേസില് നിലവിലെ കായികമന്ത്രി ഒ.ജെ. ജനീഷിന്റെ റിപ്പോര്ട്ടിന്റെ അടിസ്ഥാനത്തില് മുഖ്യമന്ത്രി വി.ഡി. സതീശന് നിയോഗിച്ച പ്രത്യേക അന്വേഷണ സംഘമാണ് അന്വേഷണം നടത്തുന്നത്.
കളമശ്ശേരി പൊലീസ് സ്റ്റേഷനിലാണ് എഫ്ഐആര് രജിസ്റ്റര് ചെയ്തിരിക്കുന്നത്. അതിനാല്, ബന്ധപ്പെട്ട അധികാരപരിധിയിലുള്ള മജിസ്ട്രേറ്റ് കോടതിയിലാണോ അതോ വിജിലന്സ് കോടതിയിലാണോ പ്രതിചേര്ത്തുകൊണ്ടുള്ള റിപ്പോര്ട്ട് സമര്പ്പിക്കേണ്ടതെന്ന കാര്യത്തില് നിയമപരമായ വ്യക്തത വരുത്താന് എസ്ഐടി യോഗം ചേരുന്നുണ്ട്. ഇതിന് ശേഷം പ്രതികളെ ചോദ്യം ചെയ്യുന്നതടക്കമുള്ള നടപടികളിലേക്ക് അന്വേഷണ സംഘം കടക്കും.
Tags: V Abdurahman Messi Scam Case, Lionel Messi Kerala Visit Fraud, U Sharafali, C Sathyapalan, Reporter Broadcasting Company Messi Case, SIT Probe Kerala, Kalamassery Police FIR, Kerala Politics News Malayalam, Malayalam News
News Tag Live യുട്യൂബ് ചാനല് Subscribe ചെയ്യുക





