ലോകകപ്പ് ക്രിക്കറ്റ്; അറിയാം വിജയികളുടെ സമ്മാന തുകകള്‍

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മുംബൈ: ഇന്ത്യ വേദിയാകുന്ന ഏകദിന ലോകകപ്പിന്റെ സമ്മാനത്തുക അന്താരാഷ്ട്ര ക്രിക്കറ്റ് കൗണ്‍സില്‍ (ഐ.സി.സി) വെള്ളിയാഴ്ച പ്രഖ്യാപിച്ചു. മൊത്തം 82.93 കോടി രൂപയുടെ സമ്മാനത്തുകയാണ് ഐ.സി.സി നല്‍കുക. ഇതില്‍ ചാമ്പ്യന്മാര്‍ക്ക് മാത്രം 33.16 കോടി രൂപ ലഭിക്കും. 16.58 കോടി രൂപയാണ് റണ്ണേഴ്‌സ് അപ്പിനുള്ള സമ്മാനത്തുക. പത്ത് ടീമുകളാണ് പങ്കെടുക്കുന്നത്. ഗ്രൂപ്പ് മത്സരങ്ങളിലെ ജയത്തിനുപോലും ഓരോ ടീമിനും പ്രത്യേകം സമ്മാനത്തുകയുണ്ട്.

ഗ്രൂപ്പ് സ്റ്റേജിലെ ഓരോ വിജയത്തിനും 33.17 ലക്ഷം രൂപ വീതം ടീമുകള്‍ക്ക് ലഭിക്കുമെന്ന് ഐ.സി.സി പത്രക്കുറിപ്പില്‍ അറിയിച്ചു. നോക്കൗട്ട് റൗണ്ട് യോഗ്യത നേടാതെ പുറത്താകുന്ന ടീമുകള്‍ക്ക് 82.93 രൂപ വീതം ലഭിക്കും. ഇതിനു പുറമെ വ്യക്തിഗത പുരസ്‌കാരങ്ങളും അവര്‍ക്കുള്ള സമ്മാനത്തുകയും വേറെയും നല്‍കുന്നുണ്ട്.

അഹ്‌മദാബാദിലെ നരേന്ദ്ര മോദി സ്റ്റേഡിയത്തില്‍ ഒക്ടോബര്‍ അഞ്ചിന് നിലവിലെ ചാമ്പ്യന്മാരായ ഇംഗ്ലണ്ടും ന്യൂസിലാന്‍ഡും തമ്മിലുള്ള മത്സരത്തോടെയാണ് ലോകകപ്പിന് തുടക്കമാകുക. നവംബര്‍ 19ന് ഇതേ സ്റ്റേഡിയത്തില്‍ തന്നെയാണ് ഫൈനലും. നാട്ടില്‍ നടക്കുന്ന ഇത്തവണത്തെ ലോകകപ്പില്‍ കിരീടത്തില്‍ കുറഞ്ഞതൊന്നും ഇന്ത്യ ആഗ്രഹിക്കുന്നില്ല.

രോഹിത്ത് ശര്‍മയും സംഘവും മൂന്നാം ലോക കിരീടം ഉയര്‍ത്തുമെന്ന പ്രതീക്ഷയില്‍ തന്നെയാണ് ഇന്ത്യന്‍ ആരാധകര്‍. ചെന്നൈയിലെ എം.എ ചിദംബരം സ്റ്റേഡിയത്തില്‍ ആസ്‌ട്രേലിയക്കെതിരെയാണ് ഇന്ത്യയുടെ ആദ്യ മത്സരം.