ഡൽഹിയിൽ പ്രതിഷേധക്കാർക്കെതിരെ വൻ പൊലീസ് നടപടി; നാല് മുൻ മുഖ്യമന്ത്രിമാരടക്കം 4,000ലേറെ പേർ കസ്റ്റഡിയിൽ

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് കോക്ക്റോച്ച് ജനതാ പാർട്ടി (CJP) ആഹ്വാനം ചെയ്ത പ്രതിഷേധത്തിനിടെ ഡൽഹിയിൽ വൻ പൊലീസ് നടപടി. ജന്തർ മന്തറിലേക്ക് പ്രതിഷേധവുമായി നീങ്ങാൻ ശ്രമിച്ചവരടക്കം 4,000-ലധികം പേരെ ശനിയാഴ്ച കസ്റ്റഡിയിലെടുത്തു. മുൻ മുഖ്യമന്ത്രിമാരായ അരവിന്ദ് കെജ്രിവാൾ, മമത ബാനർജി, പിണറായി വിജയൻ, മണിക് സർക്കാർ എന്നിവരും കസ്റ്റഡിയിലായവരിൽ ഉൾപ്പെടുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സി.ജെ.പി സ്ഥാപകൻ അഭിജീത് ദിപ്‌കെ, നേതാക്കളായ ആശുതോഷ് റങ്ക, സൗരവ് ദാസ് എന്നിവരെ ഡൽഹി വിമാനത്താവളത്തിൽ വിമാനം ഇറങ്ങിയ ഉടൻ കസ്റ്റഡിയിലെടുത്തു. പ്രതിഷേധത്തിന് അനുമതി നിഷേധിച്ചതാണ് നടപടിക്ക് കാരണമായി പൊലീസ് ചൂണ്ടിക്കാട്ടിയത്.

പ്രതിഷേധം തടയുന്നതിനായി ഡൽഹിയിൽ കനത്ത സുരക്ഷാ ക്രമീകരണങ്ങളാണ് ഏർപ്പെടുത്തിയത്. ഡൽഹി മെട്രോയിലെ 45 സ്റ്റേഷനുകളുടെ ഗേറ്റുകൾ രാത്രി 10 മണിവരെ അടച്ചിട്ടു. 250-ലധികം ട്രെയിനുകൾ റദ്ദാക്കിയതായും ജന്തർ മന്തറിന് ചുറ്റുമുള്ള നാല് കിലോമീറ്റർ പരിധിയിൽ ഇന്റർനെറ്റ് സേവനം നിർത്തിവെച്ചതായും റിപ്പോർട്ടുണ്ട്. ഡൽഹി പൊലീസിന്റെയും കേന്ദ്ര അർധസൈനിക വിഭാഗങ്ങളുടെയും 25,000-ത്തോളം ഉദ്യോഗസ്ഥരെ വിന്യസിച്ചു.

രാഹുൽ ഗാന്ധിയുടെ പിന്തുണ

ചെന്നൈയിൽ വിദ്യാർഥികളുമായുള്ള പരിപാടിയിൽ പങ്കെടുക്കുന്ന ലോക്സഭാ പ്രതിപക്ഷ നേതാവ് രാഹുൽ ഗാന്ധി പ്രതിഷേധക്കാർക്ക് പിന്തുണയുമായി രംഗത്തെത്തി. എല്ലാ നേതാക്കളെയും യുവാക്കളെയും അറസ്റ്റ് ചെയ്താലും പ്രതിഷേധത്തിൽനിന്ന് പിന്നോട്ടില്ലെന്ന സന്ദേശമാണ് അദ്ദേഹം സമൂഹമാധ്യമമായ എക്സിലൂടെ നൽകിയത്. പ്രധാനമന്ത്രി നരേന്ദ്ര മോദി ജനാധിപത്യത്തെ തകർക്കുകയാണെന്നും രാഹുൽ ആരോപിച്ചു.

പ്രതിഷേധത്തിൽ പങ്കെടുക്കാൻ ശ്രമിച്ച എഎപി നേതാവ് അരവിന്ദ് കെജ്രിവാളിനെ വസതിക്ക് സമീപത്തുനിന്നാണ് കസ്റ്റഡിയിലെടുത്തത്. തൃണമൂൽ കോൺഗ്രസ് അധ്യക്ഷ മമത ബാനർജിയെയും സൗത്ത് അവന്യൂവിൽ പ്രതിഷേധത്തിനിടെ പൊലീസ് കസ്റ്റഡിയിലെടുത്തു. സിപിഎം നേതാക്കളായ എം.എ. ബേബി, വൃന്ദ കാരാട്ട്, സിപിഐ എംഎൽ നേതാവ് ദീപാങ്കർ ഭട്ടാചാര്യ എന്നിവരും കസ്റ്റഡിയിലായവരിൽ ഉൾപ്പെടുന്നു.

അതേസമയം, പ്രതിഷേധത്തിന് പിന്തുണയുമായി മുംബൈ, ചെന്നൈ, അഹമ്മദാബാദ് തുടങ്ങിയ നഗരങ്ങളിലും ആളുകൾ രംഗത്തെത്തി. മുംബൈയിൽ പ്രതിഷേധിച്ച 200-ഓളം പേരെ പൊലീസ് കസ്റ്റഡിയിലെടുത്തു. മഹാത്മാഗാന്ധിയുടെ പ്രപൗത്രൻ തുഷാർ ഗാന്ധിയും നടൻ ഇമ്രാൻ ഖാനും ഇവരിൽ ഉൾപ്പെടുന്നു.

വോട്ടർപട്ടികയിലെ പ്രത്യേക തീവ്രപരിഷ്കരണ നടപടിയായ എസ്‌ഐആർ നിർത്തിവെക്കുക, വോട്ടർപട്ടികയിൽനിന്ന് നീക്കം ചെയ്ത 13.3 കോടി വോട്ടർമാരെ പുനഃസ്ഥാപിക്കുക, മുഖ്യ തിരഞ്ഞെടുപ്പ് കമ്മീഷണറുടെ രാജി തുടങ്ങിയ ആവശ്യങ്ങളാണ് പ്രതിഷേധക്കാർ ഉന്നയിക്കുന്നത്. തിങ്കളാഴ്ച സുപ്രീംകോടതി ചീഫ് ജസ്റ്റിസ് സൂര്യകാന്തിനെ കണ്ട് നിവേദനം നൽകുമെന്നും ഇന്ത്യാ സഖ്യ നേതാക്കൾ അറിയിച്ചിട്ടുണ്ട്.

ALSO READ:ഡൽഹിയിൽ പ്രതിഷേധം കനക്കുമ്പോൾ ചെന്നൈയിൽ രാഹുൽ–വിജയ് കൂടിക്കാഴ്ച; കാപ്പിയും ടിറാമിസുവും പങ്കിട്ട് നേതാക്കൾ

News Tag Live യുട്യൂബ് ചാനല്‍ Subscribe ചെയ്യുക