ഹാഥ്രസിലെ കൂട്ടമരണത്തിന് കാരണക്കാരനായ ആൾദൈവം ഭോലേ ബാബ ലൈം​ഗികാതിക്രമക്കേസുകളിലും പ്രതി

ഹാഥ്രസിൽ 121 പേർ തിക്കിലും തിരക്കിലും പെട്ട് മരിക്കാനിടയായ ദുരന്തത്തിന് കാരണക്കാരനായ ആൾദൈവം ഭോലേ ബാബ എന്നറിയപ്പെടുന്ന സൂരജ് പാൽ നിരവധി ലൈം​ഗികാതിക്രമകേസുകളിലും പ്രതിയാണെന്ന് വിവരം. ആ​ഗ്ര, ഇറ്റാവ, കാസ്​ഗഞ്ച്, ഫറൂഖാബാദ്, രാജസ്ഥാൻ തുടങ്ങി വിവിധ ഇടങ്ങളിലും ഇയാൾക്കെതിരേ ലൈം​ഗികാതിക്രമക്കേസുകളടക്കം നൽകിയിട്ടും നടപടി എടുക്കുകയുണ്ടായില്ല എന്ന വിവരവും പുറത്തുവന്നിട്ടുണ്ട്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പ്രമുഖ രാഷ്ട്രീയ നേതാക്കളും ഉന്നത ഉദ്യോ​ഗസ്ഥരുമടക്കം അനുയായികളായുള്ളതിനാലാണ് ഇയാൾ ഇത്തരം പരാതികളിൻമേലുള്ള നടപടികളെ ഇല്ലാതാക്കിയതെന്നു വ്യക്തമായി. ചൊവ്വാഴ്ച ഇയാൾ സംഘടിപ്പിച്ച സദ്സം​ഗിൽ രണ്ടര ലക്ഷത്തോളം പേർ പങ്കെടുത്തിരുന്നുവെന്നാണ് റിപോർട്ടുകൾ.

ഇയാളുടെ വാഹനം കടന്നുപോവുന്നതിനു വേണ്ടി ചടങ്ങിനെത്തിയവരെ തടഞ്ഞുവച്ചിരുന്നു. വാഹനം പുറപ്പെട്ടതോടെ ഭോലേ ബാബയുടെ കാലടികൾ പതിഞ്ഞ മണൽതരികൾ വാരിയെടുക്കാൻ നൂറുകണക്കിനു പേർ കുതിച്ചെത്തി. ഈ സമയം വൻതിരക്കുണ്ടാവുകയും തള്ളലിൽ നൂറുണക്കിന് പേർ വീണുപോവുകയും ചവിട്ടേറ്റ് 121 പേർ മരിക്കുകയും നിരവധി പേർക്ക് പരിക്കേൽക്കുകയുമായിരുന്നു.

വൻ ദുരന്തം ഉണ്ടായിട്ടും വീഴ്ച മറച്ചുവയ്ക്കാൻ അധികൃതർ ശ്രമിച്ചിരുന്നു. എന്നാൽ കൂട്ടിയിട്ട മൃതദേഹങ്ങളുടെ ദൃശ്യങ്ങളടക്കം അതിവേ​ഗം പ്രചരിക്കുകയും മുഖ്യമന്ത്രി യോ​ഗി ആദിത്യനാഥ് അന്വേഷണത്തിനുത്തരവിടുകയും ചെയ്തു. മരിച്ചവരുടെ കുടുംബങ്ങൾക്ക് രണ്ടുലക്ഷം രൂപ വീതവും പരിക്കേറ്റവർക്ക് അമ്പതിനായിരം രൂപയും സംസ്ഥാന സർക്കാർ ധനസഹായം പ്രഖ്യാപിച്ചിട്ടുണ്ട്.

കാസ​ഗഞ്ചിലെ ബഹാദുർന​ഗറിൽ ജനിച്ച സൂരജ് പാൽ 1997ൽ ലൈം​ഗികാതിക്രമകേസിൽ ജയിലിലായിരുന്നു. ജയിൽമോചിതനായ ശേഷം ഇയാൾ സാ​ഗർ വിശ്വ ഹരിബാബ എന്ന് പേര് മാറ്റുകയും ​ഗ്രാമത്തിൽ ആശ്രമം സ്ഥാപിക്കുകയും അനുയായികളെ ഉണ്ടാക്കിയെടുക്കുകയും ചെയ്തു.

News Tag Live യുട്യൂബ് ചാനല്‍ Subscribe ചെയ്യുക