പി വി അൻവറിന്റെ നിലപാടിനെതിരേ സഖാക്കളും പാർട്ടിയെ സ്നേഹിക്കുന്നവരും രം​ഗത്തുവരണമെന്ന് എം വി ​ഗോവിന്ദൻ

മുഖ്യമന്ത്രിയടക്കമുള്ളവർക്കെതിരേ ​ഗുരുതര ആരോപണങ്ങളുന്നയിച്ച ഇടത് സ്വതന്ത്ര എംഎൽഎ പി വി അൻവറിനെതിരേ സിപിഐഎം സംസ്ഥാന സെക്രട്ടറി എം വി ​ഗോവിന്ദൻ. അൻവറിന്റെ നിലപാടിനെതിരേ പാർട്ടിയെ സ്നേഹിക്കുന്ന ജനങ്ങളും സഖാക്കളും രംഗത്തിറങ്ങണണമെന്ന് എം വി ​ഗോവിന്ദൻ ആഹ്വാനം ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അൻവർ വലതുപക്ഷത്തിന്റെ കോടാലിയായി മാറി. അൻവറിന് പാർട്ടിയുമായുള്ള എല്ലാ ബന്ധവും അവസാനിച്ചതായും അദ്ദേഹം പറഞ്ഞു. കേരളത്തിലെ പാർട്ടിയെയും സർക്കാരിനെയും തകർക്കുന്നതിനായി കഴിഞ്ഞ കുറേക്കാലമായി വലതുപക്ഷ രാഷ്ട്രീയ ശക്തികളും അവർക്ക് അനുകൂലമായ വാർത്താമാധ്യമങ്ങളും പ്രചാരണം നടത്തിവരുകയാണ്. അവരുടെ വക്കാലത്ത് ഏറ്റുപിടിച്ച് പുറപ്പെട്ടിരിക്കുകയാണ് പി വി അൻവറും.

അച്ചടക്കമുള്ള സംഘാടക മേഖലയിൽ നിൽക്കുന്ന ആൾക്ക് ആലോചിക്കാൻ പോലും പറ്റാത്ത പ്രതികരണമാണ് അൻവറിന്റേത്. പരസ്യ പ്രതികരണം പാടില്ലെന്ന് പലതവണ പറഞ്ഞിട്ടും അത് ചെയ്തില്ല. കമ്മ്യൂണിസ്റ്റ് പാർട്ടിയെക്കുറിച്ച് അൻവറിന് ധാരണയില്ല‌. അൻവറിന് സിപിഎം രാഷ്ട്രീയവുമായി ബന്ധമില്ല. സംഘടനാരീതിയെക്കുറിച്ച് അറിയില്ല. അൻവറുമായി അടുത്തമാസം മൂന്നിന് കൂടിക്കാഴ്ച നിശ്ചയിച്ചിരുന്നു അതിനിടയിലാണ് അച്ചടക്കത്തിന്റെ എല്ലാ സീമകളും ലംഘിച്ചുള്ള വാർത്താസമ്മേളനം നടത്തിയതെന്നും ഗോവിന്ദൻ പറഞ്ഞു. ‌

അൻവറിന് നല്ല പരിഗണന നൽകിയിരുന്നു. അദ്ദേഹത്തിന്റെ പരാതികൾ പാർട്ടിയും സർക്കാരും കേട്ടിരുന്നു. അൻവറിന്റെ നിലപാട് നോക്കിയല്ല ഉയർന്നുവന്ന പ്രശ്നങ്ങൾ നോക്കിയാണ് കാര്യങ്ങൾ പരിശോധിച്ചത്. ഈ പരാതികളിൽ അന്വേഷണങ്ങൾ മുറയ്ക്ക് നടക്കുന്നു. മൂന്നു പി ബി അംഗങ്ങളുടെ ഉറപ്പ് വിശ്വസിക്കാതെ വീണ്ടും പത്രസമ്മേളനം നടത്തി അൻവർ പാർട്ടിയെ അപമാനിച്ചു.

ഡിവൈഎഫ്ഐയുടെ അഖിലേന്ത്യ പ്രസിഡന്റായിരിക്കുമ്പോഴാണ് റിയാസ് മത്സരിച്ചു മന്ത്രിയായത്. റിയാസിന്റെ ഭാര്യക്കെതിരെയും വിമർശനം ഉണ്ടാകുന്നു. മുൻപ് റിയാസിനെ അൻവർ പ്രശംസിച്ചിരുന്നു. ഇപ്പോൾ റിയാസിനെതിരെ ഉന്നയിച്ചിരിക്കുന്ന ആരോപണം അവസരവാദപരമാണെന്നും എം വി ഗോവിന്ദൻ പറഞ്ഞു.
ഇന്നലെ നിലമ്പൂരിൽ വാർത്താസമ്മേളനം വിളിച്ചായിരുന്നു പി വി അൻവർ മുഖ്യമന്ത്രി അടക്കമുള്ളവർക്കെതിരേ ​ഗുരുതര ആരോപണങ്ങൾ ഉയർത്തിയതും എൽഡിഎഫുമായുള്ള ബന്ധം ഉപേക്ഷിക്കുന്നതായി പ്രഖ്യാപിച്ചതും. സഭയിൽ ഇടതും വലതുമല്ലാതെ നടുപക്ഷത്ത് ഇരിക്കുമെന്നും അൻവർ വ്യക്തമാക്കിയിരുന്നു.

News Tag Live യുട്യൂബ് ചാനല്‍ Subscribe ചെയ്യുക