റെയില്‍വേ സ്റ്റേഷനില്‍ നിന്ന് ഇരുമ്പ് സാമഗ്രികള്‍ മോഷ്ടിച്ചുവിറ്റു; കടയുടമയായ സ്ത്രീയടക്കം മൂന്നുപേര്‍ പിടിയില്‍

കോഴിക്കോട് എലത്തൂര്‍ റെയില്‍വേ സ്റ്റേഷനില്‍ സൂക്ഷിച്ചിരുന്ന ഇരുമ്പ് സാമഗ്രികള്‍ മോഷ്ടിച്ചുവിറ്റ സംഭവത്തില്‍ ആക്രി കടയുടമയായ സ്ത്രീയടക്കം മൂന്നുപേര്‍ പിടിയില്‍. വെങ്ങളം സ്വദേശി ട്രിനിറ്റിയില്‍ സി അക്ഷയ് (അപ്പു-33), അത്തോളി റോഡ് കുനിയില്‍ കടവിന് സമീപം ആക്രിക്കട നടത്തുന്ന കോടശ്ശേരി നടുച്ചാല്‍ ലക്ഷംവീട് കോളനിയിലെ ആനന്ദജ്യോതി (32), വെങ്ങളം റെയില്‍വേ മേല്‍പാലത്തിന് സമീപം ആക്രി കച്ചവടം നടത്തുന്ന കല്‍പറ്റ മടക്കിമല സ്വദേശി പര്‍ലികുന്ന് വീട്ടില്‍ കെടി ശെല്‍വരാജ് (31) എന്നിവരാണ് പിടിയിലായത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

റെയില്‍വേ സംരക്ഷണ സേനയാണ് മൂവരെയും പിടികൂടിയത്. അക്ഷയില്‍ നിന്ന് പാലം നിര്‍മിക്കുന്നതിനുള്ള 23 ഇരുമ്പ് പ്ലേറ്റുകള്‍ പിടിച്ചെടുത്തു. ഇതിന് വിപണിയില്‍ 14,850 രൂപ വിലവരും. 77,625 രൂപയുടെ സാധന സാമഗ്രികള്‍ നഷ്ടമായിട്ടുണ്ടെന്നാണ് റെയില്‍വേ അധികൃതരുടെ വിലയിരുത്തല്‍.

സംശയത്തിലുള്ള ഒരു ആക്രിക്കട പോലീസിന്റെ നിരീക്ഷണത്തിലാണ്. റെയില്‍വേ സ്റ്റേഷന്‍ പരിസരത്ത് സൂക്ഷിച്ചിരുന്ന ഇരുമ്പ് ഉപകരണങ്ങള്‍ മോഷ്ടിച്ച അക്ഷയ് ഇവ ആക്രിക്കടകളില്‍ വില്‍ക്കുകയായിരുന്നു എന്നാണ് ലഭിക്കുന്ന വിവരം. മൂന്ന് പേരെയും കോടതിയില്‍ ഹാജരാക്കി റിമാന്റ് ചെയ്തു. മോഷണമുതലാണെന്ന് അറിഞ്ഞുകൊണ്ട് തന്നെ ഇവ കടയുടമകള്‍ വാങ്ങുകയായിരുന്നുവെന്നാണ് വിവരം.

News Tag Live യുട്യൂബ് ചാനല്‍ Subscribe ചെയ്യുക