മാര്‍ക്ക് കുറഞ്ഞതിന് ശകാരിച്ചു; അധ്യാപികയുടെ കസേരക്കടിയില്‍ ബോംബ് പൊട്ടിച്ച് വിദ്യാര്‍ഥികള്‍

ചണ്ഡീഗഡ്: ഹരിയാനയില്‍ അധ്യാപികയോടുള്ള അരിശം തീര്‍ക്കാന്‍ കസേരക്കടിയില്‍ ബോംബ് പൊട്ടിച്ച് വിദ്യാര്‍ത്ഥികള്‍. (Students detonate bomb under teacher’s chair after being scolded for low marks) പടക്കങ്ങള്‍ ഉപയോഗിച്ച നിര്‍മിച്ച ബോംബ് അധ്യാപിക കസേരയിലിരുന്നതിന് പിന്നാലെ വിദ്യാര്‍ത്ഥികള്‍ റിമോട്ട് ഉപയോഗിച്ച് പൊട്ടിക്കുകയായിരുന്നു. ഭിവാനി ജില്ലയിലെ സ്‌കൂളിലാണ് സംഭവം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സ്‌കൂളിലെ പ്ലസ് ടു വിദ്യാര്‍ത്ഥികളാണ് അധ്യാപികയുടെ കസേരയില്‍ പടക്ക ബോംബ് വെച്ചത്. പടക്കം പൊട്ടിയതിനെ തുടര്‍ന്ന് നിലത്ത് വീണ അധ്യാപികയ്ക്ക് പരിക്കേറ്റു. സ്‌കൂളിലെ സയന്‍സ് അധ്യാപികയ്ക്കാണ് പരിക്കേറ്റത്. സംഭവത്തില്‍ 13 പ്ലസ് ടു വിദ്യാര്‍ത്ഥികളെ സ്‌കൂളില്‍ നിന്ന് സസ്പെന്‍ഡ് ചെയ്തിട്ടുണ്ട്.

ALSO READ: മലപ്പുറത്തിന്റെ മഹിത പാരമ്പര്യത്തിന് പിന്നില്‍ പാണക്കാട് കുടുംബമെന്ന് സന്ദീപ് വാര്യര്‍; തനിക്കെതിരേ ഒരു ബിജെപി-സിപിഎം സംയുക്ത ഇന്നോവ വരുമെന്ന് ഭയക്കുന്നു

പരീക്ഷയില്‍ മാര്‍ക്ക് കുറഞ്ഞതിനെ തുടര്‍ന്ന് കഴിഞ്ഞ ആഴ്ച അധ്യാപിക വിദ്യാര്‍ത്ഥികളെ ശകാരിച്ചിരുന്നു. ഇതില്‍ പ്രതിഷേധിച്ചാണ് വിദ്യാര്‍ത്ഥികള്‍ ബോംബ് സ്ഥാപിച്ചത്. ഈ ക്ലാസില്‍ ആകെ 15 വിദ്യാര്‍ത്ഥികളാണ് ഉള്ളത്. ഇതില്‍ 13 പേരെയും ഒരാഴ്ചത്തേക്ക് സസ്‌പെന്‍ഡ് ചെയ്തു.

സംഭവം വിവാദമായതോടെ സ്‌കൂള്‍ അധികൃതര്‍ പഞ്ചായത്ത് മീറ്റിങ് വിളിച്ചുകൂട്ടിയിരുന്നു. തുടര്‍ന്ന് വിദ്യാര്‍ത്ഥികളുടെയും രക്ഷിതാക്കളുടെയും പക്കല്‍ നിന്ന് അധ്യാപികയ്ക്ക് പരിക്കേറ്റ സംഭവത്തില്‍ ക്ഷമാപണം എഴുതി വാങ്ങുകയും ചെയ്തിരുന്നു.

യൂട്യൂബില്‍ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് വിദ്യാര്‍ത്ഥികള്‍ പടക്ക ബോംബ് ഉണ്ടാക്കിയത്. സംഭവത്തെ തുടര്‍ന്ന് സ്‌കൂളിലെത്തിയ വിദ്യാഭ്യാസ വകുപ്പ് ഉദ്യോഗസ്ഥര്‍ നടത്തിയ അന്വേഷണത്തിലാണ് കൂടുതല്‍ വിവരങ്ങള്‍ കണ്ടെത്തിയത്.

പരിക്കേല്‍ക്കുമെന്ന് കരുതിയല്ല പടക്കം വെച്ചതെന്നും പേടിപ്പിക്കുക മാത്രമായിരുന്നു ലക്ഷ്യമെന്നും വിദ്യാര്‍ത്ഥികള്‍ പറഞ്ഞതായി ജില്ലാ വിദ്യാഭ്യാസ ഓഫീസര്‍ നരേഷ് മേത്ത അറിയിച്ചു.