സഞ്ജു സാംസണ്‍ കേരള സവാരിയുടെ ഗുഡ് വില്‍ അംബാസഡര്‍

ഇന്ത്യന്‍ ക്രിക്കറ്റര്‍ സഞ്ജു സാംസണ്‍ കേരള സര്‍ക്കാരിന്റെ ഓണ്‍ലൈന്‍ ടാക്‌സി സര്‍വീസായ കേരള സവാരിയുടെ ഗുഡ് വില്‍ അംബാസഡര്‍.ലാഭത്തേക്കാള്‍ പൊതുനന്മ മുന്‍നിര്‍ത്തി, തൊഴില്‍ സൃഷ്ടിയും സാമൂഹിക ഉത്തരവാദിത്തവും ഒരുപോലെ പ്രാധാന്യം നല്‍കുന്ന മാതൃകാ സംരംഭമാണ് കേരള സവാരി. യാത്രക്കാര്‍ക്ക് സുരക്ഷിതവും സുതാര്യവുമായ സേവനം ഉറപ്പാക്കുന്നതിനൊപ്പം ഡ്രൈവര്‍മാരുടെ അവകാശങ്ങളും ക്ഷേമവും സംരക്ഷിക്കുന്നതില്‍ ഈ പ്ലാറ്റ്‌ഫോം പ്രത്യേക ശ്രദ്ധ ചെലുത്തുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സഞ്ജു സാംസണ്‍ ഗുഡ്‌വില്‍ അംബാസഡറായി ചേരുന്നതോടെ കേരള സവാരിയുടെ സന്ദേശം ഇളംതലമുറയിലേക്കും സമൂഹത്തിന്റെ എല്ലാ വിഭാഗങ്ങളിലേക്കും ശക്തമായി എത്തിച്ചേരുമെന്ന് ബന്ധപ്പെട്ടവര്‍ അറിയിച്ചു. യാത്രക്കാര്‍ക്കും ഡ്രൈവര്‍മാര്‍ക്കും ഒരുപോലെ നീതി ഉറപ്പാക്കുന്ന കേരള സവാരിസര്‍ക്കാര്‍ അംഗീകൃത നിരക്കുകളില്‍ സുതാര്യമായാണ് പ്രവര്‍ത്തിക്കുന്നത്. അധിക ചാര്‍ജുകളോ സര്‍ജ് പ്രൈസിംഗോ ഇല്ല. കമ്മീഷന്‍ ഇല്ലാത്ത പ്രവര്‍ത്തന മാതൃകയിലൂടെ ഡ്രൈവര്‍മാരുടെ വരുമാനം പൂര്‍ണമായി സംരക്ഷിക്കുന്ന ഈ സേവനമാണ് സ്വകാര്യ ആപ്പുകളില്‍ നിന്ന് കേരള സവാരിയെ വേറിട്ടു നിര്‍ത്തുന്നത്.

തിരുവനന്തപുരം, എറണാകുളം, തൃശൂര്‍ ജില്ലകളില്‍ വിജയകരമായി പ്രവര്‍ത്തിക്കുന്ന കേരള സവാരി 11.36 ലക്ഷം യാത്രകള്‍ പൂര്‍ത്തിയാക്കിയതോടൊപ്പം ഡ്രൈവര്‍മാര്‍ക്ക് 27.58 കോടി രൂപയുടെ വരുമാനവും സൃഷ്ടിച്ചു നല്‍കിയിട്ടുണ്ട്. സംസ്ഥാനത്തെ മറ്റ് നഗരങ്ങളിലേക്കും സേവനം വ്യാപിപ്പിക്കാനുള്ള നീക്കം നടന്നുവരികയാണ്.

ALSO READ: മയക്കുമരുന്ന് വിൽപ്പനയ്ക്ക് മകനൊപ്പം പിടിയിലായ അഭിഭാഷക ജാമ്യത്തിലിറങ്ങിയ ശേഷം ജീവനൊടുക്കി