സുകുമാരക്കുറുപ്പ് ബ്രൂണൈയിലോ? വാര്‍ത്തയ്ക്ക് പിന്നാലെ അന്വേഷണത്തിന് ഉത്തരവിട്ട് ആഭ്യന്തരമന്ത്രി; ആശങ്കയും പ്രതീക്ഷയുമായി ചാക്കോയുടെ കുടുംബം

തിരുവനന്തപുരം: കേരള ചരിത്രത്തിലെ ഏറ്റവും വലിയ പിടികിട്ടാപ്പുള്ളി സുകുമാരക്കുറുപ്പിനെ ബ്രൂണൈയിൽ കണ്ടെത്തിയെന്ന  വാർത്തയ്ക്ക് പിന്നാലെ അടിയന്തര അന്വേഷണത്തിന് ഉത്തരവിട്ട് ആഭ്യന്തരമന്ത്രി രമേശ് ചെന്നിത്തല. ക്രൈംബ്രാഞ്ച് മേധാവി എച്ച്. വെങ്കിടേഷിനാണ് ഇത് സംബന്ധിച്ച് നിർദേശം നൽകിയത്. ബ്രൂണൈയിലെ വയോധികനെക്കുറിച്ച് വിശദമായി അന്വേഷിച്ച് ഉടൻ റിപ്പോർട്ട് സമർപ്പിക്കാനാണ് നിർദേശം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സൈബർ വിദഗ്ധന്റെ കണ്ടെത്തലും ശബ്ദരേഖയും

സുകുമാരക്കുറുപ്പിന്റെ ബന്ധുക്കളുടെ ഫോൺ കോളുകൾ കേന്ദ്രീകരിച്ച് ഒരു സൈബർ വിദഗ്ധൻ നടത്തിയ സ്വകാര്യ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. 78 വയസ് പ്രായമുള്ള, ബ്രൂണൈയിൽ ചൈനീസ് സ്വദേശിക്കൊപ്പം ബിസിനസ് നടത്തുന്ന വയോധികന് പാസ്‌പോർട്ടോ മറ്റ് യാത്രാ രേഖകളോ ഇല്ലെന്നതാണ് സംശയം ഇരട്ടിപ്പിക്കുന്നത്.

ഇയാൾ കുറുപ്പിന്റെ ഭാര്യയുമായും വിദേശത്തുള്ള ബന്ധുക്കളുമായും നിരന്തരം ഫോണിൽ ബന്ധപ്പെടുന്നുണ്ടെന്നും, “തന്നെ ആരും കണ്ടെത്തില്ല” എന്ന് സന്ദേശങ്ങളിൽ വ്യക്തമാക്കുന്നുണ്ടെന്നും റിപ്പോർട്ടുകൾ സൂചിപ്പിക്കുന്നു. ഇതിന്റെ ശബ്ദസംഭാഷണങ്ങൾ അടക്കമുള്ള തെളിവുകൾ ഉടൻ പുറത്തുവരുമെന്നാണ് വിവരം.

ALSO READ: മാടാക്കര മസ്ജിദിൽ ബൂട്ടിട്ട് കയറി ലാത്തിവീശി: എസ്.ഐ ഉൾപ്പെടെ 5 പോലീസുകാർക്ക് സ്ഥലംമാറ്റം

‘ഇത്തവണ പ്രതീക്ഷയുണ്ട്’ — കൊല്ലപ്പെട്ട ചാക്കോയുടെ മകൻ

വാർത്തകൾ പുറത്തുവന്നതിന് പിന്നാലെ കൊല്ലപ്പെട്ട ചാക്കോയുടെ മകൻ നിതിൻ പ്രതികരണവുമായി രംഗത്തെത്തി. “വർഷങ്ങളായി പല കഥകളും കേൾക്കുന്നുണ്ടെങ്കിലും ഇത്തവണത്തെ വിവരങ്ങൾ കൂടുതൽ വിശ്വാസയോഗ്യമായി തോന്നുന്നു. കുറുപ്പിനെ പിടികൂടാൻ കഴിയുമെന്ന പ്രതീക്ഷയുണ്ട്,” എന്ന് നിതിൻ വ്യക്തമാക്കി. അന്വേഷണ ഉദ്യോഗസ്ഥർ വിഷയം ഗൗരവമായിെടുക്കണമെന്നും അദ്ദേഹം അഭ്യർത്ഥിച്ചു.

42 വർഷത്തെ ദുരൂഹതയും ചാക്കോ വധക്കേസും

1984 ജനുവരി 21-നാണ് മാവേലിക്കരയിൽ കത്തിക്കരിഞ്ഞ അംബാസഡർ കാറിൽ നിന്ന് ചാക്കോയുടെ മൃതദേഹം കണ്ടെത്തുന്നത്. തന്റെ പേരിൽ വിദേശത്തുള്ള ഇൻഷുറൻസ് തുക തട്ടിയെടുക്കാൻ സുകുമാരക്കുറുപ്പ് നടത്തിയ ആസൂത്രിത കൊലപാതകമായിരുന്നു അത്.

തുടർന്ന് പതിറ്റാണ്ടുകളായി ഇന്റർപോളിന്റെ അടക്കം റെഡ് കോർണർ നോട്ടീസ് നിലനിൽക്കെ കുറുപ്പ് കാണാമറയത്ത് തുടർന്നു. അടുത്തിടെ, ഹൃദ്രോഗിയായിരുന്ന കുറുപ്പ് മരണപ്പെട്ടിട്ടുണ്ടാകാമെന്ന നിഗമനത്തിൽ കേസ് അവസാനിപ്പിക്കാൻ ക്രൈംബ്രാഞ്ച് നീക്കം നടത്തുന്നതിനിടെയാണ് ഇപ്പോൾ പുതിയ വെളിപ്പെടുത്തൽ പുറത്തുവന്നിരിക്കുന്നത്.

Tags: Sukumara Kurup news, Sukumara Kurup in Brunei, Ramesh Chennithala Sukumara Kurup, Chacko murder case updates, Crime Branch Sukumara Kurup

News Tag Live യുട്യൂബ് ചാനല്‍ Subscribe ചെയ്യുക