അറബ് ലോകത്ത് വന്‍ പടയൊരുക്കം; കുവൈത്തില്‍ പുതിയ സൈനിക കമാന്‍ഡ് ആസ്ഥാനം വരുന്നു

മനാമ/കുവൈത്ത് സിറ്റി: ഗള്‍ഫ് മേഖലയിലെ സുരക്ഷയും പ്രതിരോധ സംവിധാനങ്ങളും കൂടുതല്‍ ശക്തിപ്പെടുത്തുന്നതിന്റെ ഭാഗമായി ജി.സി.സിയുടെ സംയുക്ത സൈനിക കമാന്‍ഡിന് (GCC Unified Military Command) കുവൈത്തില്‍ പുതിയ ആസ്ഥാനം സ്ഥാപിക്കാന്‍ അംഗരാജ്യങ്ങളുടെ ഔദ്യോഗിക അംഗീകാരം. ബഹ്റൈന്‍ തലസ്ഥാനമായ മനാമയില്‍ ചേര്‍ന്ന ജി.സി.സി ജോയിന്റ് ഡിഫന്‍സ് കൗണ്‍സിലിന്റെ 23-ാമത് യോഗത്തിലാണ് ഈ നിര്‍ണ്ണായക തീരുമാനം കൈക്കൊണ്ടത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ജി.സി.സി സെക്രട്ടറി ജനറല്‍ ജാസിം മുഹമ്മദ് അല്‍ ബുദൈവിയാണ് ഇക്കാര്യം ഔദ്യോഗികമായി അറിയിച്ചത്.

ജി.സി.സി അംഗരാജ്യങ്ങളുടെ പ്രതിരോധ മന്ത്രിമാര്‍ പങ്കെടുത്ത യോഗത്തിലാണ് കുവൈത്തില്‍ സംയുക്ത സൈനിക കമാന്‍ഡിന്റെ പുതിയ ഫോര്‍വേഡ്/അഡ്വാന്‍സ്ഡ് ആസ്ഥാനം സ്ഥാപിക്കാന്‍ അനുമതി നല്‍കിയത്. പുതിയ ആസ്ഥാനത്തിന്റെ പ്രവര്‍ത്തനങ്ങള്‍ക്കായി പ്രത്യേക സൈനിക വിഭാഗങ്ങളെയും ഉദ്യോഗസ്ഥരെയും ഇവിടെ വിന്യസിക്കും.

സൗദി അറേബ്യയിലെ റിയാദ് കേന്ദ്രീകരിച്ചാണ് നിലവില്‍ സംയുക്ത സൈനിക കമാന്‍ഡ് പ്രവര്‍ത്തിക്കുന്നത്. ഇതിനുപുറമെയാണ് ഗള്‍ഫിന്റെ വടക്കേ അറ്റത്തുള്ള കുവൈത്തിലും പുതിയ ആസ്ഥാനം വരുന്നത്.

അംഗരാജ്യങ്ങളുടെ സൈനിക ശേഷി പരസ്പരം ഏകോപിപ്പിക്കുക, സംയുക്ത നീക്കങ്ങള്‍ വേഗത്തിലാക്കുക, കര, വ്യോമ, നാവിക പ്രതിരോധം ശക്തമാക്കുക എന്നിവയാണ് ഇതിലൂടെ ലക്ഷ്യമിടുന്നത്.

പശ്ചാത്തലവും പ്രാദേശിക സുരക്ഷയും

പശ്ചിമേഷ്യയില്‍ വര്‍ദ്ധിച്ചുവരുന്ന സുരക്ഷാ വെല്ലുവിളികളുടെയും സംഘര്‍ഷസാധ്യതകളുടെയും പശ്ചാത്തലത്തിലാണ് ഈ സുപ്രധാന നീക്കം. കഴിഞ്ഞ ഏപ്രിലില്‍ ജിദ്ദയില്‍ നടന്ന ഉച്ചകോടിയില്‍ ഗള്‍ഫ് നേതാക്കള്‍ നല്‍കിയ നിര്‍ദ്ദേശങ്ങളുടെ അടിസ്ഥാനത്തിലാണ് പുതിയ സൈനിക കമാന്‍ഡ് യാഥാര്‍ത്ഥ്യമാകുന്നത്. അംഗരാജ്യങ്ങളുടെ സുരക്ഷ പരസ്പരമുള്ള ഉത്തരവാദിത്തമാണെന്നും, ഏതെങ്കിലും ഒരു രാജ്യത്തിനെതിരെയുള്ള ആക്രമണം മുഴുവന്‍ ജി.സി.സി രാജ്യങ്ങള്‍ക്കുമെതിരായ വെല്ലുവിളിയായി കാണുമെന്നും സെക്രട്ടറി ജനറല്‍ ജാസിം മുഹമ്മദ് അല്‍ ബുദൈവി വ്യക്തമാക്കി.

യു.എഇ, സൗദി അറേബ്യ, കുവൈത്ത്, ബഹ്റൈന്‍, ഖത്തര്‍, ഒമാന്‍ എന്നീ ആറു രാജ്യങ്ങളിലെയും പ്രതിരോധ മന്ത്രിമാര്‍ യോഗത്തില്‍ സംബന്ധിച്ചു. ആസ്ഥാനത്തിന്റെ പ്രവര്‍ത്തന രീതിയും വിന്യസിക്കുന്ന സേനയുടെ കൃത്യമായ വിവരങ്ങളും വരും ദിവസങ്ങളില്‍ ഔദ്യോഗികമായി പുറത്തുവിടും.

Tags: GCC News, Kuwait News, GCC Unified Military Command, Jasem Mohamed AlBudaiwi, Bahrain GCC Defence Council, Gulf News Malayalam, Middle East Defence News, News Malayalam

News Tag Live യുട്യൂബ് ചാനല്‍ Subscribe ചെയ്യുക