അബൂബക്കര്‍ സിദ്ദീഖ് കൊലക്കേസ്: ഒളിവിലുള്ള ക്വട്ടേഷന്‍ പ്രതിക്കൊപ്പം ഗള്‍ഫില്‍ സന്ദീപ് വാര്യരും എകെഎം അഷ്‌റഫും!

കാസര്‍കോട്: സംസ്ഥാന ക്രൈംബ്രാഞ്ച് അന്വേഷിക്കുന്ന കാസര്‍കോട് കുമ്പള മുഗു സ്വദേശിയും പ്രവാസിയുമായ അബൂബക്കര്‍ സിദ്ദീഖ് കൊലപാതക കേസിലെ പിടികിട്ടാപ്പുള്ളിക്കൊപ്പം യുഡിഎഫ് നേതാക്കള്‍ യുഎഇയില്‍ വേദി പങ്കിടുന്ന ചിത്രങ്ങള്‍ പുറത്തുവന്നതോടെ വന്‍ രാഷ്ട്രീയ വിവാദം. കേസിലെ 13-ാം പ്രതിയായ പൈവളിഗെ അമ്പിക്കാന സ്വദേശി അഹമ്മദ് റയീസിനൊപ്പമാണ് കോണ്‍ഗ്രസ് നേതാവ് സന്ദീപ് വാര്യര്‍ എംഎല്‍എ, മഞ്ചേശ്വരം എംഎല്‍എ എ.കെ.എം. അഷ്‌റഫ്, മുസ്ലിം ലീഗ് കാസര്‍കോട് ജില്ലാ പ്രസിഡന്റ് എന്‍.എ. നെല്ലിക്കുന്ന് എന്നിവര്‍ സൗഹൃദം പങ്കിടുന്ന ചിത്രങ്ങള്‍ സോഷ്യല്‍ മീഡിയയില്‍ പ്രചരിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

യുഎഇയില്‍ നടന്ന ഒരു ജ്വല്ലറി ഉദ്ഘാടന ചടങ്ങിനിടെയാണ് ഇവര്‍ ഒന്നിച്ചുള്ള ദൃശ്യങ്ങള്‍ പകര്‍ത്തിയത്.

മൃതദേഹം ആശുപത്രിയില്‍ തള്ളി രക്ഷപ്പെട്ട ക്രൂര കൊലപാതകം

2022 ജൂണ്‍ 26-നാണ് പ്രവാസിയായ അബൂബക്കര്‍ സിദ്ദീഖിനെ (32) ഗള്‍ഫില്‍ നിന്ന് വിളിച്ചുവരുത്തി ക്വട്ടേഷന്‍ സംഘം തട്ടിക്കൊണ്ടുപോയി ക്രൂരമായി കൊലപ്പെടുത്തിയത്. വിദേശ കറന്‍സി ഇടപാടുമായി ബന്ധപ്പെട്ട് ഉപ്പള സ്വദേശിക്കു വേണ്ടിയാണ് പൈവളിഗെ കേന്ദ്രീകരിച്ചുള്ള അധോലോക സംഘം ക്വട്ടേഷന്‍ ഏറ്റെടുത്തത്. മംഗളൂരു വിമാനത്താവളത്തില്‍ ഇറങ്ങിയ സിദ്ദീഖിനെയും സഹോദരന്‍ അന്‍വര്‍, ബന്ധു അന്‍സാരി എന്നിവരെയും സംഘം തട്ടിക്കൊണ്ടുപോയി.

പൈവളിഗെ നൂച്ചിയിലെ ഇരുനില വീട്ടിലെത്തിച്ച് രണ്ടുപേരെയും തലകീഴായി കെട്ടിത്തൂക്കി മുളവടിയും ചുറ്റികപ്പിടിയും ഉപയോഗിച്ച് ദിവസങ്ങളോളം മൃഗീയമായി പീഡിപ്പിക്കുകയായിരുന്നു. ശരീരമാസകലം മര്‍ദ്ദനമേറ്റ് അബൂബക്കര്‍ സിദ്ദീഖ് കൊല്ലപ്പെട്ടതോടെ മൃതദേഹം ബന്തിയോട്ടെ സ്വകാര്യ ആശുപത്രിയില്‍ തള്ളി പ്രതികള്‍ കാറില്‍ രക്ഷപ്പെടുകയായിരുന്നു.

മഞ്ചേശ്വരം പോലീസ് ആദ്യം അന്വേഷിച്ച ഈ കേസ് പിന്നീട് അന്വേഷണത്തില്‍ പുരോഗതിയില്ലാത്തതിനെ തുടര്‍ന്ന് സംസ്ഥാന ക്രൈംബ്രാഞ്ചിന് കൈമാറുകയായിരുന്നു.

4 വര്‍ഷമായി ഒളിവിലായിരുന്ന ‘രാജ്യാന്തര കുറ്റവാളി’

കേസില്‍ ക്രൈംബ്രാഞ്ച് അന്വേഷണം ഊര്‍ജ്ജിതമാക്കിയതോടെയാണ് അഹമ്മദ് റയീസിനെ പ്രതിപ്പട്ടികയില്‍ ഉള്‍പ്പെടുത്തിയത്. ഇതോടെ ഇയാള്‍ വിമാനമാര്‍ഗ്ഗം വിദേശത്തേക്ക് കടന്നു. രാജ്യാന്തര കുറ്റവാളി സംഘങ്ങളുമായി ബന്ധമുള്ള ആളാണ് റയീസെന്ന് അന്വേഷണ സംഘം മുന്‍പ് വ്യക്തമാക്കിയതാണ്. കഴിഞ്ഞ 4 വര്‍ഷമായി ഇയാള്‍ ഒളിവിലാണെന്നും വിവരമില്ലെന്നുമാണ് അന്വേഷണ സംഘം പോലീസിനെയും കോടതിയെയും അറിയിച്ചിരുന്നത്.

ഇതിനിടയിലാണ് യുഡിഎഫിലെ ജനപ്രതിനിധികള്‍ക്കും മുതിര്‍ന്ന നേതാക്കള്‍ക്കുമൊപ്പം വിദേശത്ത് വച്ച് ഇയാള്‍ നില്‍ക്കുന്ന വ്യക്തമായ ചിത്രങ്ങള്‍ പുറത്തുവന്നിരിക്കുന്നത്.

ആരോപണം തള്ളി നേതാക്കള്‍; ഇന്റര്‍പോള്‍ സഹായം തേടാന്‍ ക്രൈംബ്രാഞ്ച്

ചിത്രങ്ങള്‍ പ്രചരിച്ച് വിവാദമായതോടെ വിശദീകരണവുമായി നേതാക്കള്‍ രംഗത്തെത്തി:
‘ജ്വല്ലറി ഉദ്ഘാടനത്തിന് ക്ഷണിച്ചത് അനുസരിച്ചാണ് ചടങ്ങില്‍ പങ്കെടുത്തത്. കെഎംസിസി പരിപാടികള്‍ക്കായി യുഎഇയില്‍ എത്തിയതായിരുന്നു. അവിടെവച്ച് ഒട്ടേറെ ആളുകള്‍ ഞങ്ങള്‍ക്കൊപ്പം നിന്ന് ഫോട്ടോ എടുത്തിട്ടുണ്ട്. ഒപ്പമുള്ളയാള്‍ കൊലക്കേസ് പ്രതിയാണെന്ന് അറിഞ്ഞിരുന്നില്ല. അതില്‍ ഞങ്ങള്‍ എങ്ങനെ കുറ്റക്കാരാകും?’ – എന്ന് എംഎല്‍എമാരും നേതാക്കളും പ്രതികരിച്ചു.

അതേസമയം, പ്രതി വിദേശത്ത് പരസ്യമായി വിഹരിക്കുകയും പ്രമുഖര്‍ക്കൊപ്പം പരിപാടികളില്‍ പങ്കെടുക്കുകയും ചെയ്യുന്നതിന്റെ തെളിവ് ലഭിച്ചതോടെ ക്രൈംബ്രാഞ്ച് നീക്കം ശക്തമാക്കും. ഇന്റര്‍പോളിന്റെ സഹായത്തോടെ ബ്ലൂ കോര്‍ണര്‍ / റെഡ് കോര്‍ണര്‍ നോട്ടീസ് പുറപ്പെടുവിച്ച് റയീസിനെ ഗള്‍ഫില്‍ നിന്നും അറസ്റ്റ് ചെയ്ത് നാട്ടിലെത്തിക്കാനുള്ള വഴിത്തിരിവായി ഈ ചിത്രങ്ങളെ കാണാമെന്ന് അന്വേഷണ സംഘം വ്യക്തമാക്കി.

Tags: Abubacker Siddique Murder Case, Ahmed Rayees, Sandeep Varier, AKM Ashraf, NA Nellikkunnu, Crime Branch Kerala, UDF Controversy, Kasaragod News, News Malayalam

News Tag Live യുട്യൂബ് ചാനല്‍ Subscribe ചെയ്യുക