എസി കോച്ചില്‍ ടിക്കറ്റില്ലാതെ ഒരു മണിക്കൂര്‍ ചെലഴിച്ചു: ഒരു കോടിയുടെ പണവും സ്വര്‍ണവും കവര്‍ന്നു; നാലുപേര്‍ അറസ്റ്റില്‍; ട്രെയിന്‍ സുരക്ഷയെ കുറിച്ച് ആശങ്ക

ജയ്പൂര്‍: മധുര-ബിക്കാനീര്‍ അനുവ്രത് സൂപ്പര്‍ഫാസ്റ്റ് എക്‌സ്പ്രസ്സിലെ എസി കോച്ചില്‍ നിന്ന് ഒരു കോടി രൂപയോളം വിലമതിക്കുന്ന പണവും സ്വര്‍ണാഭരണങ്ങളും കവര്‍ന്ന സംഭവത്തില്‍ അന്തര്‍സംസ്ഥാന മോഷണ സംഘത്തിലെ നാല് പേര്‍ അറസ്റ്റിലായതോടെ, ട്രെയിനുകളിലെ എസി റിസര്‍വ്ഡ് കോച്ചുകളിലെ സുരക്ഷാ ക്രമീകരണങ്ങള്‍ ചോദ്യം ചെയ്യപ്പെടുന്നു. ദീര്‍ഘദൂര ട്രെയിനുകളില്‍ യാത്രികരുടെ വിവരങ്ങള്‍ പരിശോധിക്കുന്നതിലും സുരക്ഷ ഉറപ്പാക്കുന്നതിലുമുണ്ടായ വീഴ്ചയാണ് ഈ സംഭവം ചൂണ്ടിക്കാണിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പിടിയിലായ പ്രതികള്‍ പരിശോധനകളൊന്നുമില്ലാതെ ഒരു മണിക്കൂറിലധികം എസി കോച്ചിനുള്ളില്‍ തുടര്‍ന്നുവെന്ന് അന്വേഷണ ഉദ്യോഗസ്ഥര്‍ വ്യക്തമാക്കി. ഈ സമയത്തിനിടയിലാണ് ഇവര്‍ യാത്രക്കാരെ നിരീക്ഷിച്ച് വിലപിടിപ്പുള്ള വസ്തുക്കളുള്ളവരെ ലക്ഷ്യമിട്ടത്. പണവും സ്വര്‍ണാഭരണങ്ങളും കൊണ്ടുപോകുന്ന യാത്രക്കാരെയാണ് പ്രതികള്‍ പ്രധാനമായും ലക്ഷ്യമിട്ടതെന്ന് അന്വേഷണത്തില്‍ തെളിഞ്ഞതായി ജിആര്‍പി ബിക്കാനീര്‍ സര്‍ക്കിള്‍ ഇന്‍സ്‌പെക്ടര്‍ നേഹ രാജ്പുരോഹിത് മാധ്യമങ്ങളോട് പറഞ്ഞു.

എസി കോച്ചിനുള്ളില്‍ കടന്നുകൂടിയ സംഘം യാത്രക്കാരുടെ ലഗേജുകളില്‍ നിന്ന് വിലപിടിപ്പുള്ള വസ്തുക്കള്‍ കവരുകയായിരുന്നുവെന്ന് അവര്‍ സ്ഥിരീകരിച്ചു. ചോദ്യം ചെയ്യലില്‍, ട്രെയിനിനുള്ളില്‍ ഒരു മണിക്കൂറിലധികം ഉണ്ടായിരുന്നിട്ടും ടിക്കറ്റ് പരിശോധനയോ സുരക്ഷാ പരിശോധനയോ ഉണ്ടായില്ലെന്ന് പ്രതികള്‍ സമ്മതിച്ചിട്ടുണ്ട്. ട്രെയിനുകളില്‍ സ്ഥിരമായി ലഗേജ് മോഷണം നടത്തുന്ന സംഘമാണിതെന്നും പോലീസ് വ്യക്തമാക്കി.

ട്രെയിനുകളില്‍ യാത്രക്കാരുടെ പരിശോധന കൃത്യമായി നടത്തിയാല്‍ സുരക്ഷ വര്‍ദ്ധിപ്പിക്കാന്‍ കഴിയുമെന്ന് യാത്രക്കാരനായ ഡാനിഷ് അലി അഭിപ്രായപ്പെട്ടു. ടിക്കറ്റ് പരിശോധന യാത്രയുടെ നിയമസാധുത ഉറപ്പാക്കാന്‍ മാത്രമല്ല, അനധികൃതമായി കയറുന്നവരെ കണ്ടെത്താനും സംശയാസ്പദമായ നീക്കങ്ങള്‍ സുരക്ഷാ ജീവനക്കാരുടെ ശ്രദ്ധയില്‍പ്പെടുത്താനും സഹായിക്കുമെന്ന് അദ്ദേഹം കൂട്ടിച്ചേര്‍ത്തു.

ഐഡി കാര്‍ഡോ ബാഡ്‌ജോ ഇല്ലാത്ത വ്യാപാരികള്‍ റിസര്‍വ്ഡ് കോച്ചുകളില്‍ യഥേഷ്ടം കയറിയിറങ്ങുന്നത് തടയണമെന്ന് മറ്റൊരു സ്ഥിരം യാത്രക്കാരനായ പങ്കജ് ഭട്ടും ആവശ്യപ്പെട്ടു. സംഭവത്തോട് പ്രതികരിച്ച നോര്‍ത്ത് വെസ്റ്റേണ്‍ റെയില്‍വേ ചീഫ് പബ്ലിക് റിലേഷന്‍സ് ഓഫീസര്‍ (CPRO) അമിത് സുദര്‍ശന്‍, ദീര്‍ഘദൂര ട്രെയിനുകളില്‍ ആര്‍.പി.എഫ് (RPF) സേനയെ കൂടുതല്‍ വിന്യസിച്ചിട്ടുണ്ടെന്ന് അറിയിച്ചു. എസി, നോണ്‍-എസി റിസര്‍വ്ഡ് കോച്ചുകളില്‍ കൃത്യമായ പരിശോധനയും യാത്രികരുടെ വിവര ശേഖരണവും ഉറപ്പാക്കാന്‍ ടി.ടി.ഇ (TTE) മാര്‍ക്കും കണ്ടക്ടര്‍മാര്‍ക്കും കര്‍ശന നിര്‍ദ്ദേശം നല്‍കിയിട്ടുണ്ടെന്നും അദ്ദേഹം വ്യക്തമാക്കി.

Tags Train Robbery, Anuvrat Express Scam, AC Coach Security, Indian Railways, GRP Bikaner, RPF Safety, Crime News Malayalam, Railway Police

News Tag Live യുട്യൂബ് ചാനല്‍ Subscribe ചെയ്യുക