രാജസ്ഥാനില്‍ പട്ടാപ്പകല്‍ പോലീസ് സ്റ്റേഷന് മുന്നില്‍ വെച്ച് യുവാവിനെ തല്ലിക്കൊന്നു; വ്യാപക പ്രതിഷേധം

ജയ്പൂര്‍/ന്യൂഡല്‍ഹി: രാജസ്ഥാനിലെ അല്‍വാര്‍ ജില്ലയില്‍ പോലീസ് സ്റ്റേഷന് തൊട്ടുമുന്നില്‍ വെച്ച് 40-കാരനെ പട്ടാപ്പകല്‍ കല്ലുകൊണ്ട് തലയ്ക്കടിച്ച് കൊലപ്പെടുത്തി. ക്രമസമാധാന നില പൂര്‍ണ്ണമായി തകര്‍ന്നുവെന്ന ആരോപണവുമായി പ്രതിപക്ഷവും പ്രദേശ വാസികളും രംഗത്തെത്തിയതോടെ സംഭവം വലിയ വിവാദങ്ങള്‍ക്ക് വഴിവെച്ചിരിക്കുകയാണ്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സെപ്റ്റംബര്‍ 24-നായിരുന്നു കേസിനാസ്പദമായ സംഭവം. ബഡാ വാസ് സ്വദേശിയായ സൈക്കൂന്‍ ഖാന്‍ തന്റെ ബൈക്കിന് ടയര്‍ വാങ്ങാനായി അടുത്തുള്ള മാര്‍ക്കറ്റിലേക്ക് പോയതായിരുന്നു. കൂടെയുണ്ടായിരുന്ന ഗ്രാമവാസി നൂറു മുഹമ്മദിനെ ബാങ്കിന് സമീപം ഇറക്കിയ ശേഷം ബറോഡ മേവ് പോലീസ് സ്റ്റേഷന് മുന്നിലൂടെ യാത്ര ചെയ്യവെയാണ് ആക്രമണം ഉണ്ടായത്. പ്രതിയായ ഹര്‍ഷ് മൂര്‍ത്തികാര്‍ എന്നയാള്‍ സൈക്കൂനെ ബൈക്കില്‍ നിന്ന് വലിച്ച് താഴെയിടുകയും വഴിയില്‍ കിടന്ന വലിയ കല്ലെടുത്ത് തലയ്ക്കടിച്ച് പരിക്കേല്‍പ്പിക്കുകയുമായിരുന്നു.

പോലീസിന്റെ വിശദീകരണം:

‘രണ്ടുപേരും തമ്മില്‍ മുന്‍വൈരാഗ്യമോ പരിചയമോ ഉണ്ടായിരുന്നില്ല. പ്രതിക്ക് മാനസികാസ്വാസ്ഥ്യമുള്ളതായാണ് പ്രാഥമിക വിവരങ്ങള്‍ നല്‍കുന്ന സൂചന. പോലീസ് സ്റ്റേഷന് സമീപത്തുണ്ടായ സംഭവമറിഞ്ഞ ഉടന്‍ തന്നെ പോലീസ് സ്ഥലത്തെത്തി പ്രതിയെ കസ്റ്റഡിയിലെടുത്തു. പ്രതിയെ മജിസ്ട്രേറ്റിന് മുന്നില്‍ ഹാജരാക്കിയിട്ടുണ്ട്. ഇയാളെ മാനസിക പരിശോധനയ്ക്ക് വിധേയനാക്കും.’
രാജ്കുമാര്‍ (പോലീസ് ഇന്‍സ്‌പെക്ടര്‍)

സംഭവത്തിന് വര്‍ഗീയ പശ്ചാത്തലമില്ലെന്നും പോലീസ് വ്യക്തമാക്കി. പരിക്കേറ്റ സൈക്കൂന്‍ ഖാനെ ഉടന്‍ തന്നെ കമ്മ്യൂണിറ്റി ഹെല്‍ത്ത് സെന്ററിലും തുടര്‍ന്ന് അല്‍വാറിലെ ജില്ലാ ആശുപത്രിയിലേക്കും മാറ്റിയെങ്കിലും വഴിമധ്യേ മരണപ്പെടുകയായിരുന്നു.

ശക്തമായ പ്രതിഷേധം:

കൊലപാതകത്തില്‍ പ്രതിഷേധിച്ച് പ്രാദേശ വാസികളും ബന്ധുക്കളും ബറോഡ മേവ് പോലീസ് സ്റ്റേഷനും അല്‍വാര്‍ ജില്ലാ ആശുപത്രിയ്ക്കും മുന്നില്‍ ധര്‍ണ്ണ നടത്തി. പോലീസ് ഉദ്യോഗസ്ഥര്‍ക്കെതിരെ നടപടി വേണമെന്നും, കുടുംബത്തിന് നഷ്ടപരിഹാരം നല്‍കണമെന്നും ആവശ്യപ്പെട്ട് അല്‍വാര്‍-ഭരത്പൂര്‍ പാത ഉപരോധിച്ചതോടെ ഗതാഗതം മണിക്കൂറുകളോളം തടസ്സപ്പെട്ടു. തുടര്‍ന്ന് കൂടുതല്‍ പോലീസിനെ പ്രദേശത്ത് വിന്യസിച്ചു.

രാഷ്ട്രീയ പ്രതികരണങ്ങള്‍

സംഭവം രാജസ്ഥാന്റെ ക്രമസമാധാന നിലയ്ക്ക് മേലേറ്റ കറുത്ത പാടാണെന്ന് കോണ്‍ഗ്രസ് എം.എല്‍.എയും പ്രതിപക്ഷ നേതാവുമായ ടീക്കാറാം ജൂലി വിമര്‍ശിച്ചു. ‘സംസ്ഥാനത്ത് കുറ്റവാളികളുടെ മനോവീര്യം വര്‍ദ്ധിച്ചിരിക്കുകയാണ്. പോലീസ് സ്റ്റേഷന് മുന്നില്‍ വെച്ചുപോലും കുറ്റകൃത്യങ്ങള്‍ ചെയ്യാന്‍ അവര്‍ക്ക് ഭയമില്ല. പോലീസ് സ്റ്റേഷനുകള്‍ പോലും സുരക്ഷിതമല്ലെങ്കില്‍ സാധാരണക്കാരന്‍ നീതിക്കായി എവിടെ പോകും?’ എന്ന് അദ്ദേഹം ചോദിച്ചു.

ഓള്‍ ജമ്മു ആന്‍ഡ് കശ്മീര്‍ അവാമി ആക്ഷന്‍ കമ്മിറ്റി ചെയര്‍മാനും ചീഫ് ക്ലറിക്കുമായ മിര്‍വായിസ് ഉമര്‍ ഫാറൂഖ് സംഭവത്തില്‍ ഞെട്ടല്‍ രേഖപ്പെടുത്തി. താടിയും തൊപ്പിയും കണ്ട് മുസ്ലീമാണെന്ന് തിരിച്ചറിഞ്ഞാണ് സൈക്കൂന്‍ ഖാനെ ലക്ഷ്യമിട്ടതെന്ന് കുടുംബം ആരോപിക്കുന്നുണ്ടെന്നും ഇത് കൃത്യമായി അന്വേഷിക്കണമെന്നും അദ്ദേഹം ആവശ്യപ്പെട്ടു. വിദ്വേഷ പ്രസംഗങ്ങളും വംശീയ പരാമര്‍ശങ്ങളും തെരുവുകളില്‍ ഇത്തരത്തിലുള്ള അക്രമങ്ങളായി മാറുന്നുവെന്നും ഇത് അവസാനിപ്പിക്കണമെന്നും അദ്ദേഹം എക്‌സില്‍ (X) കുറിച്ചു.

Tags: Rajasthan News, Alwar Crime News, Baroda Meo Police Station, Saikun Khan Murder, Rajasthan Law and Order, Tikaram Jully, Crime News Malayalam

News Tag Live യുട്യൂബ് ചാനല്‍ Subscribe ചെയ്യുക