30
Sep 2026
Wed
റിയാദ്/തെല് അവീവ്:ദുബായില് നിന്ന് ഇസ്രായേലിലെ തെല് അവീവിലേക്ക് 180-ഓളം യാത്രക്കാരുമായി പറന്ന ഫ്ളൈ ദുബായ് (FZ1073) വിമാനത്തില് കോക്ക്പിറ്റില് പൈലറ്റുമാര് തമ്മിലുണ്ടായ കടുത്ത തര്ക്കവും കൈയേറ്റവും മൂലം വിമാനം സൗദി അറേബ്യയില് അടിയന്തരമായി ലാന്ഡ് ചെയ്തു. വിമാനം തട്ടിക്കൊണ്ടുപോയതാണെന്ന (Hijack) പ്രാരംഭ സന്ദേശങ്ങള് പ്രചരിച്ചതിനെ തുടര്ന്ന് ഇസ്രായേല് വ്യോമസേന യുദ്ധവിമാനങ്ങള് അടിയന്തരമായി പറുന്നുയര്ന്നെങ്കിലും പിന്നീട് കാര്യങ്ങള് വ്യക്തമാവുകയായിരുന്നു.
 |
|
പ്രധാന വിവരങ്ങൾ (Key Highlights)
- കോക്ക്പിറ്റിൽ കയ്യാങ്കളി: ദുബായ് – തെൽ അവീവ് ഫ്ലൈദുബായ് വിമാനത്തിലെ പൈലറ്റുമാർ തമ്മിലുണ്ടായ കടുത്ത തർക്കത്തെ തുടർന്ന് വിമാനം സൗദിയിലെ തബൂക്കിൽ അടിയന്തരമായി ലാൻഡ് ചെയ്തു.
- ഹൈജാക്ക് സംശയം: തർക്കത്തിനിടെ ഹൈജാക്കിംഗ് കോഡ് (7500) പ്രക്ഷേപണം ചെയ്യപ്പെട്ടതോടെ ഇസ്രായേൽ വ്യോമസേനയുടെ യുദ്ധവിമാനങ്ങൾ അടിയന്തരമായി പറന്നുയർന്നു.
- യാത്രക്കാർ സുരക്ഷിതർ: വിമാനത്തിലുണ്ടായിരുന്ന 180-ഓളം യാത്രക്കാരെ തെൽ അവീവിലേക്ക് എത്തിക്കാൻ ഫ്ലൈദുബായ് മറ്റൊരു പ്രത്യേക വിമാനം അയച്ചു.
സൗദി അറേബ്യയിലെ തബൂക്ക് (Tabuk) എയര്പോര്ട്ടിലാണ് വിമാനം സുരക്ഷിതമായി ലാന്ഡ് ചെയ്തത്. വിമാനത്തിലുണ്ടായിരുന്ന എല്ലാ യാത്രക്കാരും സുരക്ഷിതരാണെന്ന് അധികൃതര് അറിയിച്ചു.
ആകാശത്ത് സംഭവിച്ചത് ഭീതിജനകമായ രംഗങ്ങള്
ജോര്ദാന് വ്യോമാതിര്ത്തിക്ക് സമീപമെത്തിയപ്പോള് ബോയിംഗ് 737 മാക്സ് 8 വിമാനം ആദ്യം പൊതുവായ അടിയന്തരാവസ്ഥ സൂചിപ്പിക്കുന്ന ‘എമര്ജന്സി കോഡ് 7700’ പ്രക്ഷേപണം ചെയ്തു. എന്നാല് തൊട്ടുപിന്നാലെ, വിമാനം തട്ടിക്കൊണ്ടുപോകല് അല്ലെങ്കില് നിയമവിരുദ്ധമായ ഇടപെടലുകളെ സൂചിപ്പിക്കുന്ന ‘കോഡ് 7500’ ട്രാക്കിംഗ് സിസ്റ്റത്തില് പ്രക്ഷേപണം ചെയ്യപ്പെട്ടു.
ഇതോടെ വിമാനം നിയന്ത്രണം വിട്ട് പെട്ടെന്ന് താഴ്ന്നു പറക്കാന് (Dive) തുടങ്ങുകയും യാത്രക്കാര്ക്കിടയില് വന് പരിഭ്രാന്തി പടരുകയും ചെയ്തു. കോക്ക്പിറ്റില് നിന്ന് വലിയ നിലവിളികളും അലര്ച്ചകളും കേട്ടതായി യാത്രക്കാര് സാക്ഷ്യപ്പെടുത്തി. പൈലറ്റുമാര് തമ്മിലുണ്ടായ രൂക്ഷമായ തര്ക്കത്തിനിടയില് ഒരു പൈലറ്റ് വിമാനം അപകടപ്പെടുത്താന് ശ്രമിച്ചതായും, തുടര്ന്ന് രണ്ടാമത്തെ പൈലറ്റും വിമാനത്തിലുണ്ടായിരുന്ന ചില യാത്രക്കാരും ചേര്ന്ന് ഇയാളെ ബലമായി കീഴടക്കുകയായിരുന്നുവെന്നും ഹീബ്രു മാധ്യമങ്ങള് റിപ്പോര്ട്ട് ചെയ്യുന്നു.
സംഘര്ഷത്തില് ഒരു പൈലറ്റിന് പരിക്കേല്ക്കുകയും കോക്ക്പിറ്റില് രക്തക്കറ പാടുകള് വീഴുകയും ചെയ്തതായാണ് വിവരം.
ഇസ്രായേലില് അടിയന്തര യോഗം; യുദ്ധവിമാനങ്ങള് പറന്നുയര്ന്നു
‘കോഡ് 7500’ സന്ദേശം ലഭിച്ചയുടന് വിമാനം ഹൈജാക്ക് ചെയ്തതാണെന്ന നിഗമനത്തില് ഇസ്രായേല് വ്യോമസേന അടിയന്തരമായി യുദ്ധവിമാനങ്ങള് അയച്ചു. ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവും പ്രതിരോധ മന്ത്രി ഇസ്രായേല് കാറ്റ്സും അടിയന്തര സുരക്ഷാ യോഗം വിളിച്ചുചേര്ത്തു.
എന്നാല് ഹൈജാക്കിംഗ് അല്ലെന്നും പൈലറ്റുമാര് തമ്മിലുള്ള കയ്യാങ്കളിയാണ് സംഭവത്തിന് കാരണമെന്നും വ്യക്തമായതോടെ സൈനിക നടപടി ഒഴിവാക്കുകയായിരുന്നു.
യാത്രക്കാരെ തിരിച്ചെത്തിക്കാന് രണ്ടാം വിമാനം
വിമാനത്തില് 150-ലേറെ ഇസ്രായേലി പൗരന്മാര് ഉള്പ്പെടെ 180 യാത്രക്കാരാണ് ഉണ്ടായിരുന്നത്. സൗദിയിലെ തബൂക്കില് കുടുങ്ങിക്കിടക്കുന്ന യാത്രക്കാരെ തെല് അവീവിലേക്ക് എത്തിക്കുന്നതിനായി ഫ്ളൈദുബായ് മറ്റൊരു പ്രത്യേക വിമാനം സൗദിയിലേക്ക് അയച്ചിട്ടുണ്ട്. സംഭവത്തില് സമഗ്രമായ അന്വേഷണം ആരംഭിച്ചതായി ഫ്ളൈദുബായിയും സുരക്ഷാ ഏജന്സികളും അറിയിച്ചു.
Tags: Flydubai Emergency Landing, Flydubai Flight News, Saudi Arabia Flight Emergency, Israel News Malayalam, Flydubai Dubai Tel Aviv, International News Malayalam, Aviation Crime News
News Tag Live യുട്യൂബ് ചാനല് Subscribe ചെയ്യുക
Latest News
Trending
More Stories
All Rights Reserved © 2026