17കാരനോടിച്ച ബെൻസ് കാർ അപകടക്കേസിൽ കൊച്ചി സിറ്റി പൊലീസ് കമ്മിഷണറെ നീക്കി

ജഡ്ജിയുടെ 17കാരനായ മകൻ ഓടിച്ച മെഴ്‌സിഡസ് ബെൻസ്കാർ ഇടിച്ച് 55കാരനായ തട്ടുകട കച്ചവടക്കാരൻ മരിച്ച സംഭവത്തിൽ പൊലീസ് വീഴ്ച ആരോപണം ശക്തമായതോടെ കൊച്ചി സിറ്റി പൊലീസ് കമ്മിഷണർ കലിരാജ് മഹേഷിനെ സ്ഥാനത്തുനിന്ന് നീക്കി. പകരം ആർ. നിഷാന്തിനിയെ നിയമിച്ചു. കേസിൽ വീഴ്ച വരുത്തിയെന്ന ആരോപണത്തെത്തുടർന്ന് നാല് പൊലീസുകാരെ നേരത്തെ സസ്പെൻഡ് ചെയ്തിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അഡീഷണൽ ജില്ലാ ജഡ്ജിയുടെ മകനാണ് അപകടസമയത്ത് കാർ ഓടിച്ചിരുന്നത്. ജയബാലകൃഷ്ണൻ എന്ന 55കാരനാണ് അപകടത്തിൽ മരിച്ചത്. കേസന്വേഷണം അട്ടിമറിക്കാൻ സ്വാധീനമുള്ളവർ ശ്രമിച്ചെന്ന ആരോപണവുമായി മരിച്ചയാളുടെ കുടുംബം രംഗത്തെത്തിയിരുന്നു. ഇതോടെ സംഭവത്തിൽ ഉത്തരവാദിത്തം ഉറപ്പാക്കണമെന്ന ആവശ്യം ശക്തമായി.

അപകടത്തിന് മുമ്പ് അതിവേഗത്തിൽ വാഹനമോടിക്കുന്ന ദൃശ്യങ്ങൾ

സോഷ്യൽ മീഡിയ റീലിനായി അതിവേഗത്തിൽ കാർ ഓടിക്കുന്ന ദൃശ്യങ്ങൾ ചിത്രീകരിക്കാൻ കൗമാരക്കാരൻ രാത്രിയിൽ വാഹനം പുറത്തെടുത്തതായാണ് പൊലീസ് പറയുന്നത്. മകന്റെ ഫോണിലുണ്ടായിരുന്ന ദൃശ്യങ്ങൾ ജഡ്ജി നീക്കം ചെയ്തതായി ആരോപണമുണ്ട്. എന്നാൽ അപകടത്തിന് തൊട്ടുമുമ്പ് കാർ അതിവേഗത്തിൽ സഞ്ചരിക്കുന്നതിന്റെ ദൃശ്യങ്ങൾ അന്വേഷണസംഘം ഫോണിൽനിന്ന് വീണ്ടെടുത്തതായും റിപ്പോർട്ടുണ്ട്.

അപകടത്തിൽ തകർന്ന മെഴ്‌സിഡസ് കാറും പൂർണമായി തകർന്ന സ്കൂട്ടറും ഇടിയുടെ ആഘാതം വ്യക്തമാക്കുന്നതാണ്. ആദ്യം അശ്രദ്ധമായി വാഹനമോടിച്ചതിനും മരണത്തിന് കാരണമായതിനുമുള്ള വകുപ്പുകൾ പ്രകാരം കേസെടുത്ത കൗമാരക്കാരനെ പിന്നീട് സ്റ്റേഷൻ ജാമ്യത്തിൽ വിട്ടയച്ചതും വിവാദമായിരുന്നു.

കേസ് ക്രൈംബ്രാഞ്ചിന്

കേസിൽ കൂടുതൽ ശക്തമായ വകുപ്പുകൾ ഉൾപ്പെടുത്തിയതിനു പിന്നാലെ കാർ ഉടമയായ കൗമാരക്കാരന്റെ പിതാവിനെയും പ്രതിചേർത്തു. ജഡ്ജിയുടെ ഫ്ലാറ്റിൽ പൊലീസ് സംഘം പരിശോധന നടത്തിയതായും റിപ്പോർട്ടുണ്ട്. സംഭവത്തിൽ അന്വേഷണം ക്രൈംബ്രാഞ്ചിന് കൈമാറി. ഇരയുടെ കുടുംബം ഹൈക്കോടതിയെയും സമീപിച്ചിട്ടുണ്ട്.

2024 മേയിൽ പൂനെയിൽ അമിതവേഗത്തിൽ ഓടിച്ച പോർഷെ കാർ ഇടിച്ച് രണ്ടുപേർ മരിച്ച സംഭവത്തോടും കൊച്ചിയിലെ അപകടത്തിന് സമാനതകളുണ്ടെന്നാണ് റിപ്പോർട്ട്. അന്നും പ്രായപൂർത്തിയാകാത്ത പ്രതിക്ക് ലഭിച്ച ജാമ്യം വലിയ വിവാദമായിരുന്നു.

ALSO READ:നെടുമ്പാശ്ശേരി വാഹനാപകടക്കേസ്: സുഹൈൽ ഉൾപ്പെടെ നാല് പ്രതികൾക്കും ജാമ്യമില്ല

News Tag Live യുട്യൂബ് ചാനല്‍ Subscribe ചെയ്യുക