ബംഗ്ലാദേശ് ഇന്ന് പോളിങ് ബൂത്തിലേക്ക്; പ്രധാന പോരാട്ടം ജമാഅത്തെ ഇസ്ലാമിയും ബിഎന്‍പിയും തമ്മില്‍

Bangladesh election 2026 ധാക്ക: ഹസീന സര്‍ക്കാരിനെ താഴെയിറക്കിയ ബഹുജന പ്രക്ഷോഭത്തിന് ശേഷമുള്ള ആദ്യ തെരഞ്ഞെടുപ്പില്‍ ബംഗ്ലാദേശ് ഇന്ന് പോളിങ് ബൂത്തിലേക്ക്. 2024 ആഗസ്റ്റിലെ വിദ്യാര്‍ഥികളുടെ നേതൃത്വത്തിലുള്ള പ്രക്ഷോഭത്തിന് പിന്നാലെ സാമ്പത്തിക ശാസ്ത്രജ്ഞനും, രാഷ്ട്രതന്ത്രജ്ഞനുമായ മുഹമ്മദ് യൂനുസ് മുഖ്യ ഉപദേഷ്ടാവായ ഇടക്കാല സര്‍ക്കാരാണ് ബംഗ്ലാദേശിനെ നയിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഹസീനയുടെ അവാമി ലീഗിന് തെരഞ്ഞെടുപ്പില്‍ മത്സരിക്കുന്നതില്‍ വിലക്കുള്ളതിനാല്‍ ജമാഅത്തെ ഇസ്ലാമിയുടെ നേതൃത്വത്തിലുള്ള 11 പാര്‍ട്ടികളുടെ സഖ്യവും ബംഗ്ലാദേശ് നാഷണലിസ്റ്റ് പാര്‍ട്ടിയും തമ്മിലാണ് മത്സരം. ബംഗ്ലാദേശ് പ്രക്ഷോഭ കാലത്ത് വിദ്യാര്‍ഥികളുടെ നേതൃത്വത്തില്‍ രൂപീകരിച്ച നാഷണല്‍ സിറ്റിസണ്‍ പാര്‍ട്ടി, ലിബറല്‍ ഡെമോക്രാറ്റിക് പാര്‍ട്ടി, ബംഗ്ലാദേശ് ലേബര്‍ പാര്‍ട്ടി എന്നിവരാണ് ജമാഅത്ത് സഖ്യത്തിലെ പ്രമുഖ കക്ഷികള്‍.

ALSO READ: കോഴിക്കോട് വൈദ്യുതി കമ്പിയില്‍ നിന്ന് ഷോക്കേറ്റ് 12കാരിക്ക് ദാരുണാന്ത്യം

13 കോടി ജനങ്ങളാണ് ബംഗ്ലാദേശില്‍ വോട്ട് ചെയ്യുക. ഇതില്‍ 51 പാര്‍ട്ടികളിലായി 249 സ്വതന്ത്രര്‍ ഉള്‍പ്പെടെ ആകെ 1,981 സ്ഥാനാര്‍ഥികളാണ് മത്സരിക്കുന്നത്. 173 ദശലക്ഷത്തിലധികം പൗരന്മാരുള്ള ബംഗ്ലാദേശ്, ലോകത്തിലെ ഏറ്റവും ജനസംഖ്യയുള്ള എട്ടാമത്തെ രാജ്യവും ലോകത്തിലെ ഏറ്റവും ജനസാന്ദ്രതയുള്ള രാജ്യങ്ങളിലൊന്നുമാണ്. ജനസാന്ദ്രതയില്‍ ഇന്ത്യയേക്കാള്‍ മൂന്നിരട്ടിയും പാകിസ്താനെക്കാള്‍ നാലിരട്ടിയുമാണ്. യുവാക്കളുടെ വലിയ പ്രാതിനിധ്യമുള്ള ബംഗ്ലാദേശില്‍ ഏകദേശം 5 ദശലക്ഷം പേര്‍ ഇത്തവണ കന്നിവോട്ട് രേഖപ്പെടുത്തും.

ഇന്ന് നടക്കുന്ന പൊതു തെരഞ്ഞെടുപ്പില്‍ ജൂലൈ നാഷണല്‍ ചാര്‍ട്ടറുമായി ബന്ധപ്പെട്ട വിധിയെഴുത്തും നടക്കും. ബംഗ്ലാദേശിന്റെ ജുഡീഷ്യറി, ഭരണ, തെരഞ്ഞെടുപ്പ് മേഖലയിലുള്ള ഭരണഘടനാ പരിഷ്‌കരണ രേഖയാണ് ജൂലൈ നാഷണല്‍ ചാപ്റ്റര്‍.

വോട്ടെടുപ്പ് സമയം
ബംഗ്ലാദേശില്‍ വോട്ടെടുപ്പ് ഫെബ്രുവരി 12-ന് രാവിലെ 7:30-ന് (ഇന്ത്യന്‍ സമയം രാവിലെ 7:00) ആരംഭിച്ച് വൈകുന്നേരം 4:30-ന് അവസാനിക്കും.

തിരഞ്ഞെടുപ്പ് രീതി
വോട്ടര്‍മാര്‍: 12.7 കോടിയിലധികം രജിസ്റ്റര്‍ ചെയ്ത വോട്ടര്‍മാരുണ്ട്. ഇതില്‍ ഏകദേശം 1.5 കോടി പ്രവാസി തൊഴിലാളികള്‍ക്കായി ഇതാദ്യമായി പോസ്റ്റല്‍ ബാലറ്റ് സൗകര്യം ഏര്‍പ്പെടുത്തിയിട്ടുണ്ട്.

സീറ്റുകള്‍: ആകെ 350 സീറ്റുകളാണ് ജാതിയോ ശങ്സദില്‍ (പാര്‍ലമെന്റ്) ഉള്ളത്. ഇതില്‍ 300 സീറ്റുകളിലേക്ക് നേരിട്ടുള്ള വോട്ടെടുപ്പിലൂടെ പ്രതിനിധികളെ തിരഞ്ഞെടുക്കുന്നു (First-Past-The-Post രീതി).

സംവരണ സീറ്റുകള്‍: ബാക്കിയുള്ള 50 സീറ്റുകള്‍ സ്ത്രീകള്‍ക്കായി സംവരണം ചെയ്തവയാണ്. തിരഞ്ഞെടുപ്പ് ഫലത്തിന് ആനുപാതികമായി രാഷ്ട്രീയ പാര്‍ട്ടികള്‍ക്കാണ് ഈ സീറ്റുകള്‍ അനുവദിക്കുന്നത്.

ഭരണരൂപീകരണം: 151 സീറ്റുകള്‍ നേടുന്ന പാര്‍ട്ടിക്ക് സര്‍ക്കാര്‍ രൂപീകരിക്കാം.

പ്രധാന രാഷ്ട്രീയ പാര്‍ട്ടികളും മുന്നണികളും

ഷെയ്ഖ് ഹസീനയുടെ അവാമി ലീഗിനെ തിരഞ്ഞെടുപ്പില്‍ മത്സരിക്കുന്നതില്‍ നിന്ന് വിലക്കിയിട്ടുള്ളതിനാല്‍ പ്രധാനമായും രണ്ട് മുന്നണികള്‍ തമ്മിലാണ് മത്സരം:

ബംഗ്ലാദേശ് നാഷണലിസ്റ്റ് പാര്‍ട്ടി (BNP):

നേതൃത്വം: താരിഖ് റഹ്‌മാന്‍ (മുന്‍ പ്രധാനമന്ത്രി ഖാലിദ സിയയുടെ മകന്‍).

10 പാര്‍ട്ടികളുടെ സഖ്യത്തിന് നേതൃത്വം നല്‍കുന്നു.

തീവ്ര വലതുപക്ഷ നിലപാടുകളില്‍ നിന്ന് മാറി എല്ലാവരെയും ഉള്‍ക്കൊള്ളുന്ന ദേശീയതയാണ് പാര്‍ട്ടി മുന്നോട്ട് വെക്കുന്നത്.

ജമാഅത്തെ ഇസ്ലാമി (JIB) സഖ്യം:

നേതൃത്വം: ഷഫീഖുര്‍ റഹ്‌മാന്‍.

11 പാര്‍ട്ടികളുടെ സഖ്യമാണിത്. 2024-ലെ വിദ്യാര്‍ത്ഥി പ്രക്ഷോഭത്തിന് നേതൃത്വം നല്‍കിയവര്‍ രൂപീകരിച്ച നാഷണല്‍ സിറ്റിസണ്‍ പാര്‍ട്ടി (NCP) ഈ സഖ്യത്തിന്റെ ഭാഗമാണ്.

ചരിത്രത്തിലാദ്യമായി ജമാഅത്തെ ഇസ്ലാമി ഒരു ഹിന്ദു സ്ഥാനാര്‍ത്ഥിയെ (കൃഷ്ണ നന്ദി) മത്സരരംഗത്തിറക്കിയിട്ടുണ്ട്.

എന്തുകൊണ്ട് ഈ തിരഞ്ഞെടുപ്പ് പ്രധാനം?

15 വര്‍ഷത്തെ ഷെയ്ഖ് ഹസീനയുടെ ഭരണത്തിന് ശേഷം നടക്കുന്ന ആദ്യ തിരഞ്ഞെടുപ്പാണിത്.

നോബല്‍ സമ്മാന ജേതാവ് മുഹമ്മദ് യൂനസിന്റെ നേതൃത്വത്തിലുള്ള ഇടക്കാല സര്‍ക്കാരിന് കീഴിലാണ് വോട്ടെടുപ്പ് നടക്കുന്നത്.

യുവ വോട്ടര്‍മാരുടെ (Gen-Z) വലിയ സാന്നിധ്യം ഈ തിരഞ്ഞെടുപ്പിന്റെ പ്രത്യേകതയാണ്.

അവാമി ലീഗിന്റെ അഭാവത്തില്‍ ബിഎന്‍പിയും ജമാഅത്തെ ഇസ്ലാമിയും തമ്മിലുള്ള നേരിട്ടുള്ള പോരാട്ടമായി ഇത് മാറിയിരിക്കുന്നു.

തിരഞ്ഞെടുപ്പ് ഫലങ്ങള്‍ ഫെബ്രുവരി 13-ന് പുലര്‍ച്ചെയോടെ പുറത്തുവരുമെന്നാണ് പ്രതീക്ഷിക്കുന്നത്.