യു.പി.ഐ ഇടപാടില്‍ തട്ടിക്കൊണ്ടുപോകല്‍ പൊളിഞ്ഞു; 13-കാരനെ 3 മണിക്കൂറിനുള്ളില്‍ രക്ഷപ്പെടുത്തി ഡല്‍ഹി പോലീസ്!

ന്യൂഡല്‍ഹി: സാങ്കേതികവിദ്യയും സ്മാര്‍ട്ട് തിങ്കിംഗും കോര്‍ത്തിണക്കി ഡല്‍ഹി പോലീസ് നടത്തിയ മിന്നല്‍ നീക്കത്തില്‍, തട്ടിക്കൊണ്ടുപോയ 13 വയസ്സുകാരനെ മൂന്ന് മണിക്കൂറിനുള്ളില്‍ സുരക്ഷിതമായി വീണ്ടെടുത്തു. ഡിജിറ്റല്‍ യു.പി.ഐ (UPI) പണമിടപാട് കെണിയായി ഉപയോഗിച്ച് കരാവല്‍ നഗറിലെ സൈബര്‍ കഫേ കേന്ദ്രീകരിച്ച് നടത്തിയ തന്ത്രപരമായ നീക്കത്തിലാണ് ഉത്തര്‍പ്രദേശ് ലോണി സ്വദേശിയായ ആകാശ് (22) എന്ന പ്രതിയെ പോലീസ് വലയിലാക്കിയത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മോചനദ്രവ്യമായി ആവശ്യപ്പെട്ടത് 40,000 രൂപ

ഒക്ടോബര്‍ 30-നാണ് കേസിനാസ്പദമായ സംഭവം ഉണ്ടാകുന്നത്. സാധനങ്ങള്‍ വാങ്ങാന്‍ പുറത്തേക്ക് പോയ 13 വയസ്സുകാരന്‍ മടങ്ങിയെത്തിയില്ലെന്ന് കാണിച്ച് അമ്മ ഷാഹ്ദരയിലെ ജ്യോതി നഗര്‍ പോലീസ് സ്റ്റേഷനില്‍ പരാതി നല്‍കി. ഇതിനുപിന്നാലെ, കുട്ടിയെ വിട്ടുനല്‍കണമെങ്കില്‍ 40,000 രൂപ മോചനദ്രവ്യം നല്‍കണമെന്ന് ആവശ്യപ്പെട്ട് അപരിചിതനായ ഒരാളില്‍ നിന്ന് അമ്മയുടെ ഫോണിലേക്ക് കോള്‍ എത്തി.

കേസ് രജിസ്റ്റര്‍ ചെയ്ത ഷാഹ്ദര പോലീസ് കുട്ടി അന്വേഷണത്തിനായി പ്രത്യേക സംഘത്തിന് രൂപം നല്‍കി.

ഡിജിറ്റല്‍ വല നെയ്ത് പോലീസ്

അന്വേഷണം നടക്കുന്നതിനിടെ പ്രതി വീണ്ടും കുട്ടിയുടെ അമ്മയുമായി ബന്ധപ്പെടുകയും മോചനദ്രവ്യം യു.പി.ഐ വഴി നല്‍കാന്‍ ആവശ്യപ്പെടുകയും ചെയ്തു. പണമടയ്ക്കാനായി പ്രതി ഒരു ക്യൂആര്‍ കോഡ് പങ്കുവെച്ചു.

ഇതോടെ, പോലീസ് തന്ത്രപരമായി പ്രതിയുടെ നീക്കം നിരീക്ഷിക്കാന്‍ ആരംഭിച്ചു. അന്വേഷണസംഘത്തിലുണ്ടായിരുന്ന ഒരു പോലീസ് ഉദ്യോഗസ്ഥന്റെ വ്യക്തിഗത ബാങ്ക് അക്കൗണ്ടില്‍ നിന്ന് 5,000 രൂപ ഈ ക്യൂആര്‍കോഡിലേക്ക് അയച്ചുകൊടുത്തു. ഇതിന്റെ ഡിജിറ്റല്‍ ട്രാക്കിംഗിലൂടെ തുക എത്തിയത് കരാവല്‍ നഗറിലെ ഒരു സൈബര്‍ കഫേയിലാണെന്ന് അന്വേഷണസംഘം കണ്ടെത്തി.

പോലീസ് ഉടനടി സൈബര്‍ കഫേയിലെത്തി ഉടമയെ ചോദ്യം ചെയ്തപ്പോള്‍, 50 രൂപ കമ്മീഷന്‍ വാങ്ങി ഒരു യുവാവ് തന്റെ ബാര്‍കോഡ് ഉപയോഗിച്ച് 5,000 രൂപ അക്കൗണ്ടിലേക്ക് വാങ്ങുകയും അത് പണമായി കൈപ്പറ്റുകയും ചെയ്തുവെന്ന് സ്ഥിരീകരിച്ചു. കഫേയിലെ സി.സി.ടി.വി ദൃശ്യങ്ങള്‍ പരിശോധിച്ചതോടെ കുട്ടിയുടെ അമ്മ മകനെ തിരിച്ചറിഞ്ഞു.

രണ്ടാമത്തെ ‘ട്രാപ്പ്’; പ്രതി വലയില്‍

പ്രതി അതേ സ്ഥലത്തേക്ക് വീണ്ടുമെത്തുന്നുവെന്ന് ഉറപ്പാക്കാന്‍ പോലീസ് രണ്ടാമതൊരു തന്ത്രം കൂടി മെനഞ്ഞു. അതേ ബാര്‍കോഡിലേക്ക് വീണ്ടും 5,000 രൂപ കൂടി അയച്ചുകൊടുത്തു. അക്കൗണ്ടിലേക്ക് പണമെത്തിയെന്ന് ഉറപ്പുവരുത്തിയ ആകാശ്, കുട്ടിയുമായി വീണ്ടും പണം കൈപ്പറ്റാന്‍ സൈബര്‍ കഫേയിലേക്ക് തിരികെ എത്തി.

കഫേ ഉടമയുടെ സഹായത്തോടെ അവിടെ രഹസ്യമായി നിലയുറപ്പിച്ചിരുന്ന പോലീസ് സംഘം പ്രതിയെ സാഹസികമായി കീഴ്‌പ്പെടുത്തുകയും കുട്ടിയെ സുരക്ഷിതമായി രക്ഷപ്പെടുത്തുകയുമായിരുന്നു.

കസിന്‍ വഴിയുള്ള പരിചയം; മുന്‍ കുറ്റകൃത്യങ്ങളില്ല

സദര്‍ ബസാറില്‍ ഡെലിവറി ഹെല്‍പ്പറായി ജോലി ചെയ്യുകയായിരുന്നു ആകാശ്. ഒരു ബന്ധു വഴിയാണ് കുട്ടിയെ പരിചയപ്പെട്ടതെന്ന് ആകാശ് പോലീസിനെടോ പറഞ്ഞു. കുട്ടി വഴിയരികില്‍ നില്‍ക്കുമ്പോള്‍ സ്‌കൂട്ടറില്‍ കയറ്റി കൂട്ടിക്കൊണ്ടുപോയി തട്ടിക്കൊണ്ടുപോകല്‍ ആസൂത്രണം ചെയ്യുകയായിരുന്നു.

പ്രതിയില്‍ നിന്ന് 5,000 രൂപ പണവും, കോള്‍ ചെയ്യാന്‍ ഉപയോഗിച്ച മൊബൈല്‍ ഫോണും, തട്ടിക്കൊണ്ടുപോകലിന് ഉപയോഗിച്ച സ്‌കൂട്ടറും പോലീസ് പിടിച്ചെടുത്തു. മുന്‍പ് മറ്റ് കുറ്റകൃത്യങ്ങളിലൊന്നും ഉള്‍പ്പെട്ടിട്ടില്ലാത്ത ആളാണ് ആകാശെന്ന് പോലീസ് വ്യക്തമാക്കി. കുറ്റകൃത്യത്തില്‍ ഇയാള്‍ ഒറ്റയ്ക്കായിരുന്നോ അതോ മറ്റാരുടെയെങ്കിലും സഹായം ലഭിച്ചിട്ടുണ്ടോ എന്ന് പോലീസ് തുടര്‍ന്ന് അന്വേഷിച്ചുവരികയാണ്. സുരക്ഷിതമായി വീണ്ടെടുത്ത കുട്ടിയെ പോലീസ് വീട്ടുകാര്‍ക്ക് കൈമാറി.

Tags: Delhi Police Rescue Kidnapped Boy, UPI Ransom Trap Delhi Police, Karawal Nagar Cybercafe Kidnapping, Shahdara Jyoti Nagar Police Case, Crime News Malayalam, News Malayalam

News Tag Live യുട്യൂബ് ചാനല്‍ Subscribe ചെയ്യുക