ആദ്യം കാറിന് മുന്നില്‍ ചാടി; ചികില്‍സ കഴിഞ്ഞെത്തി ആംബുലന്‍സിന് മുന്നില്‍ ചാടി; അതിഥി തൊഴിലാളിക്ക് ദാരുണാന്ത്യം

മലപ്പുറം: ചേളാരിപ്പടിയില്‍ വേഗതയിലെത്തിയ ആംബുലന്‍സിന് മുന്നിലേക്ക് എടുത്തുചാടി അതിഥിത്തൊഴിലാളി ആത്മഹത്യ ചെയ്തു. അതിവേഗം വന്ന വാഹനത്തിന്റെ ഇടിയുടെ ആഘാതത്തില്‍ തലയ്ക്ക് ഗുരുതരമായി പരുക്കേറ്റ ഇയാള്‍ സംഭവസ്ഥലത്തുതന്നെ മരണപ്പെടുകയായിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

നാടിനെ നടുക്കിയ സംഭവത്തിന് തൊട്ടുമുന്‍പും സമാന രീതിയിലുള്ള ആത്മഹത്യാ ശ്രമം ഇയാളുടെ ഭാഗത്തുനിന്നുണ്ടായിരുന്നുവെന്ന് പോലീസ് വ്യക്തമാക്കുന്നു.

ആശുപത്രിയില്‍ നിന്ന് തിരിച്ചെത്തിയ ഉടന്‍ വീണ്ടും കടുംകൈ

ഇന്ന് രാവിലെ ചേളാരിപ്പടി ഭാഗത്തുവെച്ച് ഇയാള്‍ ഓടുന്ന ഒരു കാറിന് മുന്നിലേക്ക് എടുത്തുചാടിയിരുന്നു. ഇതില്‍ നിസ്സാര പരുക്കേറ്റ തൊഴിലാളിയെ നാട്ടുകാരും പോലീസും ചേര്‍ന്ന് ഉടന്‍ തന്നെ സമീപത്തെ ആശുപത്രിയിലെത്തിച്ച് പ്രഥമശുശ്രൂഷ നല്‍കി. ചികിത്സയ്ക്ക് ശേഷം ഇയാള്‍ താമസസ്ഥലത്തേക്ക് മടങ്ങിയെത്തുകയും ചെയ്തു.

എന്നാല്‍, താമസസ്ഥലത്ത് തിരിച്ചെത്തി അധിക സമയം കഴിയും മുന്‍പേ ഇയാള്‍ വീണ്ടും റോഡിലേക്ക് ഇറങ്ങുകയായിരുന്നു. തുടര്‍ന്ന് റോഡിലൂടെ കടന്നുപോവുകയായിരുന്ന ആംബുലന്‍സിന്റെ മുന്നിലേക്ക് ഇയാള്‍ പെട്ടെന്ന് എടുത്തുചാടുകയായിരുന്നുവെന്ന് ദൃക്സാക്ഷികള്‍ പറയുന്നു.

പോലീസ് അന്വേഷണം ആരംഭിച്ചു

സംഭവം നടന്നയുടന്‍ തേഞ്ഞിപ്പലം പോലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു. അപകടത്തില്‍ മരിച്ച അതിഥിത്തൊഴിലാളി ഏത് സംസ്ഥാനക്കാരനാണെന്നും ഇയാളുടെ പേരുവിവരങ്ങളും താമസസ്ഥലവും സംബന്ധിച്ചുള്ള കൂടുതല്‍ വിവരങ്ങള്‍ ശേഖരിച്ചു വരികയാണെന്ന് അന്വേഷണ ഉദ്യോഗസ്ഥര്‍ അറിയിച്ചു.

മൃതദേഹം പോസ്റ്റ്മോര്‍ട്ട നടപടികള്‍ക്കായി താലൂക്ക് ആശുപത്രി മോര്‍ച്ചറിയിലേക്ക് മാറ്റിയിട്ടുണ്ട്. മാനസികാസ്വസ്ഥതയാണോ അതോ മറ്റ് എന്തെങ്കിലും വ്യക്തിപരമായ കാരണങ്ങളാണോ ആത്മഹത്യയിലേക്ക് നയിച്ചതെന്ന് പോലീസ് പരിശോധിച്ച് വരുന്നു.

Tags: Malappuram Chelari Migrant Worker Suicide, Malappuram News Malayalam, Crime News Kerala, News Malayalam

News Tag Live യുട്യൂബ് ചാനല്‍ Subscribe ചെയ്യുക